Read Buku Loyera - Chichewa Ezek. 11 Bible Online

Ezek. 11 - Buku Loyera - Chichewa bible

Ezek. 11

¹Mzimu wa Mulungu udandinyamula kupita nane ku chipata chakuvuma cha Nyumba ya Chauta. Poloŵerapo panali anthu 25, ndipo pakati pa anthuwo ndidaona atsogoleri aŵa a anthu: Yazaniya mwana wa Azuri, ndi Pelatiya mwana wa Benaya.

²Chauta adandiwuza kuti, “Iwe mwana wa munthu, anthu aŵiri ameneŵa ndiwo amene amapangana zoipa nkumalangiza anthu zoipa mumzinda muno.

³Iwo amati, ‘Nthaŵi sinafike yoti nkumanga nyumba. Mzindawu uli ngati mphika umene uli pa moto, ifeyo tili ngati nyama imene ili mumphikamo.’

⁴Tsono iwe mwana wa munthu, ulose moŵadzudzula, ulose ndithu.”

⁵Pamenepo Mzimu wa Chauta udandigwira, ndipo udandiwuza kuti, “Unene kuti zimene akunena Chauta ndi izi, akuti, ‘Inu a m'banja la Israele, ndikudziŵa zimene zili mumtima mwanu.

⁶Mwakhala mulikupha anthu ambiri mumzinda muno, ndipo mwaunjika mitembo yao m'miseu.’

⁷“Nchifukwa chake Ambuye Chauta akunena kuti, ‘Mitembo ya anthu ophedwa imene mwaika kumeneko, imeneyo ndiyo nyama. Mzindawu ndiwo mphika ndithu. Koma ndidzakutulutsanimo.

⁸Mukuwopa lupanga, tsono ndidzakugwetserani lupangalo.

⁹Ndidzakutulutsani mumzimdamo, ndidzakuperekani kwa anthu akudza kuti akulangeni.

¹⁰Inunso mudzafa ndi lupanga, ndidzakulangani mpaka ku malire a Israele. Pamenepo mudzadziŵa kuti Ine ndine Chauta.

¹¹Choncho mzindawo sudzakhalanso ngati mphika wokutetezani, ndipo simudzakhalanso ngati nyama yam'menemo ai. Ndidzakulangani mpaka ku malire a Israele.

¹²Pamenepo mudzadziŵa kuti Ine ndine Chauta. Simudatsate malangizo anga, simudamvere malamulo anga. Koma mwakhala mukutsata malamulo a mitundu ya anthu okuzungulirani.’ ”

¹³Pamene ndinkalosa, nthaŵi yomweyo Pelatiya mwana wa Benaya adafa. Tsono ndidadzigwetsa pansi chafufumimba nkufuula kuti, “Inu Ambuye Chauta, kodi mukufuna kuŵatheratu Aisraele onse otsala?”

¹⁴Pambuyo pake Chauta adandipatsira uthenga uwu wakuti,

¹⁵“Iwe mwana wa munthu, achibale ako, ndiye kuti abale ako, anzako a ku ukapolo, onse a m'banja la Israele, anthu okhala ku Yerusalemu akuŵanena kuti, ‘Onse aja amene adatengedwa ukapolo ali kutali ndi Chauta, dziko lino tsopano nlathu.’ ”

¹⁶“Nchifukwa chake uza anzako a ku ukapolo kuti zimene ndikunena Ine Ambuye Chauta ndi izi: Ndine amene ndidaŵatumiza kutali pakati pa anthu a mitundu ina ndi kuŵabalalitsa ku maiko ambiri. Pakali pano ndikuŵasungabe kumaiko kumene adatengedwako.”

¹⁷“Nchifukwa chake unene ndithu kuti Ine Chauta mau anga ndikuti, Ndidzaŵasonkhanitsa kuchokera kwa anthu a mitundu inayo ndi kuŵasonkhanitsa pamodzi, kuchokera kumaiko kumene ndidaŵabalalitsa. Kenaka ndidzaŵapatsa dziko la Israele.

¹⁸Akadzaloŵa m'dzikomo, azidzachotsamo mafano onse oipa ndi onyansa.

¹⁹ Ndidzaŵapatsa mtima watsopano, ndipo ndidzaika moyo watsopano mwa iwo. Ndidzachotsa mtima wouma ngati mwala mwa iwo, ndipo ndidzaŵapatsa mtima wofeŵa ngati mnofu.

²⁰Motero adzatsata malamulo anga, adzasunga ndi kumvera malangizo anga. Choncho adzakhala anthu anga, ndipo Ine ndidzakhala Mulungu wao.

²¹Koma amene mitima yao yazama m'zonyansa ndi zoipa zinazo, ndidzaŵalanga chifukwa cha zonse zimene adachita. Ndikutero Ine Chauta.”

²² Tsono akerubi aja adayamba kuuluka, mikombero ili m'mbali mwao, ndipo ulemerero woŵala wa Mulungu wa Israele unali pamwamba pa iwo.

²³Ulemerero wa Chautawo udakwera ndi kusiya mzindawo, nukaima pa phiri chakuvuma kwake kwa mzindawo.

²⁴Pambuyo pake Mzimu wa Mulungu udandinyamula nukandifikitsa kwa akapolo ku dziko la Babiloni. Zonsezi zidachitika m'masomphenya, monga momwe Mzimu wa Mulungu udaandiwonetsera. Kenaka zinthu zimene ndinkaziwonazo zidayamba kuzimirira.

²⁵Ndipo ndidaŵasimbira akapolo zonse zimene Chauta adaandiwonetsa.