Read Buku Loyera - Chichewa Ezek. 19 Bible Online

Ezek. 19 - Buku Loyera - Chichewa bible

Ezek. 19

¹Chauta adandiwuza kuti, “Tsono iwe, uimbe nyimbo yamadandaulo, kuimbira akalonga aŵiri aja a ku Yerusalemu. Mau ake unene kuti:

²“ ‘Mai wako anali ngati mkango waukazi pakati pa mikango yaimuna. Ankagona pakati pa mikango yaimuna akulera ana ake.

³Adalera mmodzi mwa ana ake, ndipo mwanayo adasanduka mkango. Udaphunzira kugwira nyama, nuyamba kudya anthu.

⁴Tsono mitundu ya anthu idachenjezana za mkangowo, ndipo tsiku lina udagwa m'mbuna yao. Adaukoka ndi ngoŵe kupita nawo ku dziko la Ejipito.

⁵Mai uja ataona kuti mwana ankamukhulupirirayu wagwidwa, adakuzanso wina mwa ana ake, namsandutsa mkango wamphamvu.

⁶Unkayendayenda pakati pa mikango inzake, pakuti unali mkango wokhwima. Udaphunzira kugwira nyama, nuyamba kudya anthu.

⁷Udagwetsa malinga ao, ndipo udaononga mizinda yao. Onse a m'dzikolo adachita mantha chifukwa cha phokoso la kubangula kwake.

⁸Tsono mitundu ya anthu, makamaka a m'maiko ozungulira, adabwera kudzalimbana nawo. Adautchera ukonde, ndipo udagweradi m'mbuna yao.

⁹Adaukoka ndi ngoŵe nauponya m'chitatanga. Adapita nawo kwa mfumu ya ku Babiloni, mfumuyo nkuuponya m'ndende. Choncho liwu lake silidamvekenso ku mapiri a ku Israele.

¹⁰“ ‘Mai wako anali ngati mpesa m'munda wa mphesa wobzalidwa m'mbali mwa madzi. Udabereka bwino ndipo unali ndi nthambi zambiri, chifukwa panali madzi ambiri.

¹¹Unali ndi nthambi zolimba zoyenera kupangira ndodo zaufumu. Udatalika nusomphoka pakati pa zomera zina, ndipo unkaoneka bwino chifukwa cha kutalika kwake ndi kuchuluka kwa nthambi zake.

¹²Koma adauzula mwaukali naugwetsa pansi. Udauma ndi mphepo yakuvuma, zipatso zake zidayoyoka, thunthu lake lidauma, mtengo wonse nkupserera ndi moto.

¹³Tsono adauwokanso ku chipululu ku dziko louma, lopanda madzi.

¹⁴Ndipo moto udayaka mumtengomo, nupsereza nthambi ndi zipatso zake. Motero ulibenso nthambi yolimba yoti nkupangira ndodo ya mfumu.’ ” Imeneyi ndi nyimbo yachisoni, ndipo yasanduka nyimbo yapamaliro.