Read Buku Loyera - Chichewa Ezek. 24 Bible Online

Ezek. 24 - Buku Loyera - Chichewa bible

Ezek. 24

¹Pa tsiku lakhumi la mwezi wakhumi, chaka chachisanu ndi chinai cha ukapolo, Chauta adandipatsira uthenga uwu wakuti,

² “Iwe mwana wa munthu, lemba dzina la tsiku lalero, lero lomwe lino. Lero ndilo tsiku limene mfumu ya ku Babiloni yazinga Yerusalemu ndi zithando zankhondo.

³Uŵaphere mwambi anthu aupanduŵa. Uŵauze kuti Ine Ambuye Chauta ndikuti, “ ‘Ikani mphika pa moto, ndipo muthiremo madzi.

⁴Mumphikamo muikemo nthuli za nyama, nthuli zabwino kwambiri za mwendo wathako ndi mwendo wamwamba. Mudzazemo mafupa abwino.

⁵Pa gulu la nkhosa musankhulepo nkhosa yabwino kwambiri, ndipo muike nkhuni pansi pa mphikawo. Madziwo aŵire, kenaka muphike nyama ija pamodzi ndi mafupa omwe’.

⁶“Tsono zimene ndikunena Ine Ambuye Chauta ndi izi: Tsoka kwa mzinda wamagaziwe, tsoka kwa mphika wa dzimbiri lokangamira ndi losachoka. Mutulutsemo nthuli imodziimodzi, osasankhula.

⁷Magazi amene adakhetsa mumzindamo akadali pakati pake, chifukwa adaŵataya pa thanthwe losalala osati pa dothi, kuti fumbi lingaŵafotsere.

⁸Ndidaŵasiyadi magaziwo pa mwala wambee, kuti asafotsereke, chifukwa chofuna kuwonetsa mkwiyo wanga ndi kulipsira.

⁹“Tsono Ine Ambuye Chauta ndikuti, Tsoka kwa mzinda wamagaziwo! Inenso ndidzayatsa chimulu chachikulu cha nkhuni.

¹⁰Onjeza nkhuni, usonkhe moto, uphike nyama, uiphike bwino, utsanyule msuzi, ndipo upsereze mafupa.

¹¹Tsono uike pa makala mphika wopanda kanthuwo, kuti chitsulo chake chipse, kuchita kuti psuu. Zonyansa zake zonse zisungunuke, dzimbiri lichoke.

¹²Koma nkuuyeretsa bwanji? Dzimbiri lake lidaloŵerera, silingathe kuchoka ngakhale ndi moto womwe.

¹³Dzimbiri limeneli ndi zilakolako za dama lako, poti nditakutsuka sudayere. Tsono sudzayeranso mpaka mkwiyo wanga utakwaniratu pa iwe.

¹⁴Ine Chauta ndalankhula zimenezi. Zilikudza ndipo ndidzazichitadi. Sindidzabwerera m'mbuyo, sindidzakulekerera kapena kukhululuka ai. Ndidzakulanga potsata makhalidwe ako ndi zimene udachita. Ndikutero Ine Ambuye Chauta.”

¹⁵Chauta adandipatsiranso uthenga uwu wakuti,

¹⁶“Iwe mwana wa munthu, ndikulanda mwadzidzidzi mkazi wako amene amakukomera m'maso kwambiri. Koma usadandaule, usalire kapena kukhetsa misozi.

¹⁷Udzume, koma m'chikatikati, usabume maliro. Nduŵira yako uvale ndithu, nsapatonso uvale. Usaphimbe kumaso kapena kudya chakudya cha olira.”

¹⁸Choncho ndidalankhula ndi anthu m'maŵa, madzulo mkazi wanga nkumamwalira. M'maŵa mwake, ndidachita monga momwe adandilamulira.

¹⁹Anthu adandifunsa kuti, “Bwanji osatifotokozera tanthauzo lake la zimene ukuchitazi? Kodi ukuchitiranji zotere?”

²⁰Ndidaŵayankha kuti, “Chauta adandipatsira uthenga uwu, adati,

²¹‘Uza Aisraele mau anga akuti, Ndidzaipitsa Nyumba yanga imene mwakhala mukuinyadira kwambiri. Mumakondwa kwambiri poiwona, ndipo mumaikonda ndi mtima wonse. Ana anu aamuna ndi aakazi amene mudaŵasiya m'mbuyo, adzaphedwa ndi lupanga.’

²²Koma inu mudzachita monga ndachitira inemu. Simudzaphimba kumaso, kapena kudya chakudya cha anthu olira.

²³Nduŵira mudzavala ndithu ku mutu, nsapatonso mudzavala. Simudzalira maliro kapena kukhetsa misozi. Koma mudzavutika zedi chifukwa cha machimo anu, ndipo muzidzangodzumirana.

²⁴Tsono ine Ezekielene ndidzakhala chitsanzo kwa inu, mudzachita monga momwe ine ndachitira. Chauta akuti zimenezi zikadzachitika, mudzadziŵa kuti Iye ndi Ambuye Chauta.”

²⁵Pambuyo pake Chauta adandiwuza kuti, “Iwe mwana wa munthu, tsiku lina anthuŵa ndidzaŵachotsera linga lao limene ankakondwerera kukongola kwake, limene linkaŵakomera m'maso poliwona, limenenso ankaikapo mtima kwambiri. Ndidzaŵachotseranso ana ao aamuna ndi aakazi.

²⁶Pa tsiku limenelo wopulumuka adzabwera kudzakuuza zimenezo.

²⁷Pa tsiku lomwelo udzathanso kulankhula, choncho udzalankhula naye wopulumukayo, sudzakhalanso bububu. Motero udzakhala chizindikiro kwa iwo, ndipo adzadziŵa kuti Ine ndine Chauta.”