Read Buku Loyera - Chichewa Ezek. 30 Bible Online

Ezek. 30 - Buku Loyera - Chichewa bible

Ezek. 30

¹Chauta adandipatsira uthenga uwu wakuti,

²“Iwe mwana wa munthu, ulose ndipo ulengeze kuti zimene ndikunena Ine Ambuye Chauta ndi izi: “ ‘Pepani, tsiku latsoka lafika!

³Ndithudi layandikira, tsiku la Chauta lili pafupi. Tsiku lamitambo, tsiku la kutha kwa mitundu ya anthu.

⁴Ku Ejipito kudzafika nkhondo, ndipo ku Etiopiya kudzagwa mavuto. Anthu ambiri adzaphedwa ku Ejipito, chuma chake chidzatengedwa, ndipo maziko ake adzagumuka.’

⁵“Etiopiya, Puti, Ludi, Arabiya yense, Libiya ndiponso anthu a m'dziko logwirizana naye, adzaphedwa nao limodzi pa nkhondoyo.

⁶“Zimene ndikunena Ine Chauta ndi izi: Onse othandiza Ejipito adzaphedwa. Ndipo kunyadira mphamvu zake kudzamthera. Anthu ake adzaphedwa pa nkhondo kuyambira ku Migidoli mpaka ku Siyene. Ndikutero Ine Ambuye Chauta.

⁷Dziko la Ejipito lidzasanduka bwinja kupambana mabwinja onse opasuka. Mizinda yake idzakhala yopasuka kupambana mizinda ina yoonongeka.

⁸Nditamtentha Ejipito ndi kuthyola onse omuthandiza, adzadziŵa kuti Ine ndine Chauta.

⁹“Nthaŵi imeneyo ikadzafika, amithenga adzapita mofulumira kuchokera kwa Ine kukaopsa Aetiopiya, iwowo osadziŵako kanthu. Ndipo adzada nkhaŵa pa tsiku limene Ejipito adzaonongedwa, chifukwa tsikulo lidzafika ndithu.

¹⁰“Mau a Ine Ambuye Chauta ndi aŵa: Ndidzatuma Nebukadinezara mfumu ya ku Babiloni kuti adzathetse chuma cha Ejipito.

¹¹Iyeyo ndi anthu ake, mtundu wa anthu ankhalwe kwambiri aja, adzabwera kudzaononga dzikolo. Adzasolola malupanga ao kuti amenyane ndi Aejipito, ndipo dzikolo lidzadzaza ndi mitembo.

¹²Ndidzaumitsa mtsinje wa Nailo, ndipo Ejipito ndidzamgulitsa kwa anthu oipa. Dzikolo ndidzaliwononga, pamodzi ndi zonse zam'menemo, polipereka m'manja mwa anthu akudza. Ine Chauta ndatero.

¹³“Zimene ndikunena Ine Ambuye Chauta ndi izi: Ndidzathetsa mafano ndi kuwononga milungu yosema ya ku Memfisi. Sikudzakhalanso mfumu ku Ejipito. Ndipo ndidzaŵaopsa onse okhala m'dziko limenelo.

¹⁴“Mzinda wa Patirosi ndidzausandutsa chipululu. Mzinda wa Zowani ndidzautentha. Mzinda wa Thebesi ndidzaulanga.

¹⁵Mzinda wa Peluziumu, linga lolimba la Ejipito, ndidzauthira mkwiyo wanga, ndipo ndidzaononga gulu lankhondo la ku Thebesi.

¹⁶Ejipito yense ndidzamtentha, ndipo Memfisi adzavutika kwambiri. Malinga a ku Thebesi adzagumuka, ndipo makoma ake adzaonongekeratu.

¹⁷Anyamata a ku Oni ndi a ku Pibeseti adzaphedwa pa nkhondo, ndipo akazi adzatengedwa ukapolo.

¹⁸Ku Tehafinehesi kudzachita mdima, pamene ndidzathyole mphamvu za Ejipito kumeneko. Motero kunyada kwake kudzatha. Mitambo idzamuphimba, ndipo okhala m'midzi yake adzatengedwa ukapolo.

¹⁹Motero ndidzamlanga Ejipito, ndipo adzadziŵa kuti Ine ndine Chauta.”

²⁰Pa tsiku lachisanu ndi chiŵiri la mwezi woyamba, chaka cha khumi ndi chimodzi cha ukapolo, Chauta adandipatsira uthenga uwu wakuti:

²¹“Iwe mwana wa munthu, ndathyola dzanja la Farao, mfumu ya ku Ejipito. Ona, sadalimange kuti lichire, ndipo sadalilimbitse ndi nsalu kuti lithe kugwiranso lupanga.

²²Nchifukwa chake Ine Ambuye Chauta ndikuti, Ndikudana naye Farao, mfumu ya ku Ejipito. Ndidzamthyola manja onse, lamoyo ndi lothyokalo, ndipo lupanga lake lidzamtayika.

²³Ndidzaŵamwaza Aejipito pakati pa mitundu ya anthu ndi kuŵabalalitsira ku maiko ambiri.

²⁴Ndidzalimbitsa manja a mfumu ya ku Babiloni, ndipo m'manja mwake ndidzaikamo lupanga langa. Koma Farao ndidzamthyola manja, ndipo adzabuula ngati wolasidwa koopsa pamaso pa mfumu ya ku Babiloniyo.

²⁵Ndithu ndidzalimbitsa manja a mfumu ya ku Babiloni, koma manja a Farao adzafooka. Motero anthu adzadziŵa kuti Ine ndine Chauta, ndikadzaika lupanga langa m'manja mwa mfumu ya ku Babiloni. Ndipo adzaligwiritsa ntchito pomenya nkhondo ndi dziko la Ejipito.

²⁶Ndidzamwaza Aejipito pakati pa mitundu ya anthu, ndi kuŵabalalitsira ku maiko ambiri. Motero adzadziŵa kuti Ine ndine Chauta.”