Read Buku Loyera - Chichewa Ezek. 32 Bible Online

Ezek. 32 - Buku Loyera - Chichewa bible

Ezek. 32

¹Pa tsiku loyamba la mwezi wa khumi ndi chiŵiri, chaka cha khumi ndi chiŵiri cha ukapolo, Chauta adandipatsira uthenga uwu wakuti,

²“Iwe mwana wa munthu, imbira Farao, mfumu ya ku Ejipito, nyimbo yamaliro. Umuuze uthenga uwu wakuti: “Iwe umadziyesa mkango pakati pa mitundu ya anthu, koma uli ngati ng'ona. Umakhuvula m'mitsinje yako. Umavonongera madzi ndi mapazi ako, ndi kudetserera mitsinje.

³Ine Ambuye Chauta ndikuti, Ndikadzasonkhanitsa pamodzi anthu a mitundu yambiri, ndidzakuponyera khoka ndipo iwowo adzakugwira m'kombe mwanga.

⁴Ndidzakuponya ku mtunda ndi kukutaya pansi. Ndidzabweretsa mbalame zamumlengalenga kuti zidzatere pa iwe, ndiponso zilombo za m'dziko lonse kuti zidzakudye.

⁵Nyama yako ndidzaiyanika pa mapiri, ndipo zigwa zidzadzaza ndi zotsala zako.

⁶Ndidzanyowetsa dziko ndi magazi ako, mpaka ku mapiri komwe, ndipo mitsinje idzadzaza ndi nyama yako.

⁷ Ndikadzakuwononga, ndidzaphimba thambo, ndipo ndidzadetsa nyenyezi. Ndidzaphimba dzuŵa ndi mtambo, ndipo mwezi sudzaŵala.

⁸Ndidzazimitsa zoŵala zonse zamumlengalenga, ndipo dziko lako ndidzalichititsa mdima. Ndikutero Ine Ambuye Chauta.

⁹“Ndidzavutitsa mitima ya anthu a mitundu yambiri, pamene ndidzakupititsa ku ukapolo pakati pa mitundu ina, ku maiko amene sudaŵadziŵe.

¹⁰Ndidzadabwitsa anthu ambiri ndi zimene zidzakugwere. Mafumu ao adzanjenjemera pokumbukira iwe, nditaŵaonetsa lupanga langa. Pa tsiku la kugwa kwako, aliyense adzadera nkhaŵa moyo wake.

¹¹“Zimene ndikunena Ine Ambuye Chauta ndi izi: Nkhondo ya mfumu ya ku Babiloni idzakufika.

¹²Ndidzagwetsa gulu lako lonse lankhondo ndi malupanga a asilikali oopsa kwambiri kupambana a mitundu ina yonse. “Adzathetsa kunyada kwa Ejipito, ndipo gulu lake lonse lankhondo lidzaonongeka.

¹³Ndidzaononga ziŵeto zao zonse zokhala pambali pa madzi am'dzikomo. Kumadziko sikudzaonekanso phazi la munthu, ndipo phazi la nyama silidzavonongeranso madzi.

¹⁴Pambuyo pake ndidzayeretsa madzi akumeneko, ndipo mitsinje idzayenda mokometsera ngati mafuta. Ndikutero Ine Ambuye Chauta.

¹⁵Ejipito nditamsandutsa bwinja, ndipo dziko lonse nditaliwononga, nditapha onse okhala kumeneko, adzadziŵa kuti Ine ndine Chauta.

¹⁶“Mau angaŵa adzakhala nyimbo yamaliro, ndipo akazi a mitundu yachilendo adzaiimba, kuimbira Ejipito ndi gulu lake lonse lankhondo. Ndikutero Ine Ambuye Chauta.”

¹⁷Pa tsiku la khumi ndi chisanu la mwezi woyamba, chaka cha khumi ndi chiŵiri cha ukapolo, Chauta adandipatsira uthenga uwu wakuti,

¹⁸“Iwe mwana wa munthu, lira kwambiri chifukwa cha anthu ochuluka a ku Ejipito, ndipo uŵaloŵetse, pamodzi ndi anthu a m'maiko ena amphamvu, ku dziko la anthu akufa.

¹⁹Uŵafunse kuti, ‘Kani ndinu okongola kupambana ena? Tsikirani ku manda pamodzi ndi ena onse osaumbalidwa.’

²⁰Aejipito adzagwa pakati pa anthu amene adaphedwa pa nkhondo. Lupanga nlosololasolola, iwowo adzaphedwa pamodzi ndi anthu ao ochuluka.

²¹M'kati mwa manda atsogoleri amphamvu pamodzi ndi ogwirizana nawo azidzakambirana kuti, ‘Kani anthu osaumbalidwa aja, ophedwa pa nkhondo, afika kunsi kuno. Si aŵa agona apaŵa!’

²²“Komweko kuli Asiriya ndipo ankhondo ake onse ali m'manda omzungulira. Onsewo adaphedwa pa nkhondo.

²³Manda ao ali m'malo ozama kwambiri m'dziko la anthu akufa, ndipo manda ao adazungulira manda ake. Iwowo kale ankaopsa m'dziko la anthu amoyo, koma tsopano onsewo adafa, adaphedwa pa nkhondo.

²⁴“Komweko kulinso Elamu ndipo ankhondo ake onse ali m'manda omzungulira. Onsewo adaphedwa pa nkhondo. Anthuwo adatsikira ku manda ali osaumbalidwa. Iwowo kale ankaopsa m'dziko la anthu amoyo. Tsopano akuchita manyazi, pamodzi ndi amene ali m'manda.

²⁵Elamuyo amupangira malo ogonapo pakati pa anthu ophedwa, pamodzi ndi gulu lake lonse lankhondo, loikidwa momzungulira. Onsewo ndi osaumbalidwa, ophedwa pa nkhondo. Zoonadi, anthu amene kale ankaopsa m'dziko la anthu amoyo, tsopano akuchita manyazi pamodzi ndi amene ali m'dziko la anthu akufa. Aikidwa pakati pa anthu ophedwa.

²⁶“Komwekonso kuli Meseki ndi Tubala. Ankhondo ao onse ali m'manda oŵazungulira. Anthuwo ndi osaumbalidwa, ndipo adaphedwa pa nkhondo. Iwowo kale ankaopsa m'dziko la anthu amoyo.

²⁷Sadaikidwe mwaulemu ngati ankhondo amphamvu amakedzana, amene adatsikira ku dziko la anthu akufa ndi zida zao zomwe zankhondo. Malupanga ao adaŵaika ku mitu yao, ndipo zishango zao adaphimbira mafupa ao. Kale anthu amphamvu ameneŵa ankaopsa m'dziko la anthu amoyo.

²⁸“Iwenso Farao, udzatswanyika ndipo udzagona pamodzi ndi anthu akufa osaumbalidwa, pamodzi ndi amene adaphedwa pa nkhondo.

²⁹Komweko kuli Edomu pamodzi ndi mafumu ake ndi akalonga ake onse. Ngakhale anali amphamvu, komabe adaikidwa m'manda. Akugona pamodzi ndi anthu osaumbalidwa, pamodzi ndi onse amene adatsikira ku dziko la anthu akufa.

³⁰“Komweko kulinso akalonga onse akumpoto, pamodzi ndi anthu onse a ku Sidoni, amene adatsikira ku dziko la anthu akufa mwamanyazi, pamodzi ndi ophedwa, ngakhale anali oopsa ndi mphamvu zao. Akugona osaumbalidwa pamodzi ndi ophedwa pa nkhondo. Kumeneko akuchita manyazi pamodzi ndi onse amene adatsikira kale ku dziko la anthu akufa.

³¹“Farao akadzaona onseŵa, iye ndi magulu ake ankhondo adzathuza mtima pokumbukira kuchuluka kwa anthu ake amene adaphedwa pa nkhondo. Ndikutero Ine Ambuye Chauta.

³²Ndithudi ankaopsa m'dziko la anthu amoyo, koma iyeyo ndi magulu ake onse ankhondo adzaikidwa pamodzi ndi osaumbalidwa, pamodzi ndi onse ophedwa pa nkhondo. Ndikutero Ine Ambuye Chauta.”