Read Buku Loyera - Chichewa Ezek. 5 Bible Online

Ezek. 5 - Buku Loyera - Chichewa bible

Ezek. 5

¹“Iwe mwana wa munthu, tenga lupanga lakuthwa ngati lumo la wometa, umete tsitsi ndi ndevu. Tsono utenge choyesera, ugaŵe tsitsilo patatu.

²Kuzinga mzinda kuja kukatha, chimodzi cha zigawo zitatu za tsitsilo uchitenthe pakati pa mzinda. Chigawo chachiŵiri uchiduledule ndi lupanga, poyenda mozungulira mzinda wonsewo. Chigawo chachitatu uchimwazire ku mphepo, ndidzachitsata nditasolola lupanga.

³Utengeko tsitsi pang'ono, ulimange mu mpendero wa mkanjo wako.

⁴Pa tsitsi limeneli utapepo lina, uliponye pa moto, nkulitentha. Moto wa tsitsilo udzayaka mpaka kutentha Israele yense.”

⁵“Zimene akunena Ambuye Chauta ndi izi, akuti, ‘Uyu ndi Yerusalemu. Ndamuika pakati pa dziko lapansi, ndipo maiko onse akumzungulira.

⁶Koma anthu a ku Yerusalemu adapandukira malamulo anga, kupambana anthu a mitundu ina. Adakhala osamvera kupambana anthu a m'maiko ozungulira. Adakanadi malamulo anga ndipo sadasunge malangizo anga.’

⁷Nchifukwa chake zimene ndikunena Ine Ambuye Chauta ndi izi: Chipongwe chanu nchachikulu kupambana cha anthu a mitundu yokuzungulirani. Simudatsate malamulo anga, simudasunge malangizo anga, koma mudatsata malamulo a anthu a mitundu yokuzungulirani.

⁸Nchifukwa chake Inenso ndakukanani. Ndidzakulangani anthu a mitundu ina akuwona.

⁹Ndidzakulangani ndi chilango chimene sindidakulange nachoni nkale lonse, ndipo sindidzakulanga nachoninso nkutsogolo komwe, poti zolakwa zanu nzonyansa kwambiri.

¹⁰Tsono mwa inu makolo adzadya ana ao ndipo ana adzadya makolo ao. Ndidzakulanganidi, ndipo onse otsala pakati pa inu, ndidzaŵamwazira ku mphepo zonse zinai.”

¹¹“Pali Ine ndemwe Mulungu wamoyo, ndidzakuwonongani mopanda chifundo, chifukwa choti mwaipitsa Nyumba yanga ndi mafano anu oipa ndi miyambo yanu yonyansa. Tsono Ine sindidzakulekererani, sindidzakuchitirani chisoni mpang'ono pomwe.

¹²Chimodzi mwa zigawo zitatu za anthu anu chidzafa ndi mliri, kapena chidzaonongeka ndi njala. Chigawo china chidzaphedwa ndi lupanga kunja kwa mzinda. Ndipo chigawo china ndidzachimwazira ku mphepo zonse zinai, pochita kuchipirikitsa ndi lupanga langa losolola.”

¹³“Ndimo m'mene udzachitire mkwiyo wanga, ndipo ndidzaŵakalipira mpaka mtima wanga utakhala pansi. Choncho adzadziŵa kuti Ine Chauta ndidalankhula mwansanje pokulangani monga m'mene ndachitiramu.”

¹⁴“Iwe Yerusalemu, ndidzakusandutsa bwinja. Udzakhala chinthu chonyozeka m'maso mwa anthu a mitundu yokuzungulira ndi kwa onse odutsapo.

¹⁵Udzakhala chinthu chonyozeka, ndipo adzakunyodola. Udzakhala ngati chenjezo ndi chinthu choopsa kwa mitundu ya anthu okuzungulira, pamene ndidzakulanga mwamphamvu ndi kugamula mlandu wako mokwiya ndi mwaukali. Ndatero Ine Chauta.

¹⁶Ndidzakulasa ndi njala yolasa ngati mivi yoopsa ndi yosakaza, kuti ndikuwononge. Ndidzagwetsa njalayo pa iwe pochepetsa chakudya chako cha tsiku ndi tsiku.

¹⁷Ndidzatumiza njala ndi zilombo zakuthengo ndipo zidzakulanda ana ako. Ndidzakugwetsa ndi mliri ndipo padzakhala kuphana pakati pa anthu ako. Ndidzakudzetsera nkhondo yokuwononga. Ndatero Ine Chauta.”