Read Buku Loyera - Chichewa Hos. 11 Bible Online

Hos. 11 - Buku Loyera - Chichewa bible

Hos. 11

¹ Chauta akuti, “Pamene Israele anali mwana, ndinkamukonda. Mwana wangayo ndidamuitana kuti atuluke ku Ejipito.

²Ine ndikamakangaza kumuitana, iye ndiye kumandithaŵa kunka kutali. Ankaperekabe nsembe kwa Baala ndi kulitenthera lubani fanolo.

³Komabe ndine amene ndidaphunzitsa Aefuremu kuyenda. Ndidaŵalera, koma sadavomereze kuti amene ndidaŵasamala ndine.

⁴Ndidaŵakokera kwa Ine mwachifundo ndi mwachikondi. Ndidaŵanyamula nkuŵatsamiza kutsaya kwanga. Ndidaŵerama, nkuŵadyetsa.

⁵“Tsono anthuwo adzabwereranso ku ukapolo ku Ejipito. Aasiriya adzakhala oŵalamulira, pakuti iwo akana kubwerera kwa Ine.

⁶Nkhondo idzaononga mizinda yao. Adani adzaphwanya zipata za malinga ao ndi kuŵaononga, chifukwa chotsata nzeru zaokha.

⁷Anthu anga akangamira zondipandukira Ine. Tsono adzalira chifukwa cha goli lachilango limene lili pa iwo, koma palibe amene adzaŵachotsere.

⁸ “Kodi ndingakusiye bwanji iwe Efuremu? Kodi ndingathe kukutaya bwanji iwe Israele? Kodi ndingathe bwanji kukusandutsa ngati Adima? Kodi ndingathe kukuwononga ngati Zeboimu? Mtima wanga wakana kutero, chifundo changa chikukula.

⁹Sindidzalekerera kuti mkwiyo wanga ukulangitse, sindidzamuwononganso Efuremu, pakuti Ine ndine Mulungu osati munthu. Ine, Woyera uja, ndili nawe, ndipo sindidzabwera kudzakuwononga.

¹⁰“Ndidzaŵabangulira ngati mkango, ndipo anthu anga adzanditsata. Ndidzabanguladi, ndipo adzathamangira kwa Ine ali njenjenje kuchokera kuzambwe.

¹¹Adzabwera akunjenjemera ngati mbalame kuchokera ku Ejipito, adzabwera ngati njiŵa kuchokera ku Asiriya. Motero ndidzaŵabwezeranso kwao. Ndikutero Ine Chauta.”

¹²Chauta akuti, “Anthu a ku Efuremu andizinga ndi mabodza. Banja limeneli la Israele nlonama kwambiri. Nawonso anthu a ku Yuda akundipandukirabe Ine Mulungu, Woyera ndi wokhulupirika.