Read Buku Loyera - Chichewa Hos. 12 Bible Online

Hos. 12 - Buku Loyera - Chichewa bible

Hos. 12

¹Efuremu chakudya chake ndi mpweya wokhawokha. Amanka nasaka mphepo yakuvuma tsiku lonse. Amachulukitsa mabodza ndi chiwawa. Amachita chipangano ndi dziko la Asiriya, ndipo amapereka mitulo ya mafuta ku Ejipito.”

²Chauta akuŵaimba mlandu anthu a ku Yuda. Adzalanga a m'banja la Yakobe chifukwa cha makhalidwe ao, adzaŵabwezera zolingana ndi ntchito zao zoipa.

³ Akali m'mimba mwa mai wake, Yakobe adakangana ndi mbale wake, ndipo atakula adalimbana ndi Mulungu.

⁴ Yakobeyo adalimbana ndi mngelo ndipo adapambana. Adalira napempha madalitso. Mulungu adakumana naye ku Betele, ndipo kumeneko podzera mwa iyeyo adalankhula nafe.

⁵Ameneyu ndiye Chauta, Mulungu Wamphamvuzonse. Anthu azimkumbukira ndi dzina lakeli loti Chauta.

⁶Motero bwererani nonsenu ndi chithandizo cha Mulungu wanu. Mukhale achikondi ndi olungama, ndipo muzidalira Mulungu wanu nthaŵi zonse.

⁷Chauta akuti, “Aisraele ali ngati wamalonda wonyenga amene amagwiritsa ntchito masikelo onama. Amakonda kumeta anthu.

⁸Aefuremu akunena kuti, ‘Ndithu talemera, takhuphuka zedi, wina sangatiloze chala pa kulemera kumeneku.’

⁹ Koma Ine ndine Chauta, Mulungu wanu, amene ndidakutulutsani ku Ejipito. Ndidzakukhalitsaninso m'mahema, monga munkachitira masiku amakedzana m'chipululu muja.

¹⁰Ndidalankhula ndi aneneri. Ndine amene ndidaŵaonetsa zinthu zambiri ngati kutulo. Ndidalankhula m'mafanizo kudzera mwa iwo.

¹¹Komabe anthu ankapembedza mafano ku Giliyadi. Ndithu mafano ameneŵa adzaonongedwa. Ankapereka nsembe za nkhunzi ku Giligala, koma maguwa ansembewo ndidzaŵasandutsa miyulu ya miyala m'munda.”

¹² (Yakobe adathaŵira ku dziko la Aramu. Israeleyo adagwira ntchito kumeneko kuti apeze mkazi. Ankaŵeta nkhosa kuti akwatire mkaziyo).

¹³ Chauta adatulutsa Aisraele ku Ejipito kudzera mwa mneneri. Ndipo mwa mneneriyo adaŵasungabe.

¹⁴Koma Aefuremuwo adaputa mkwiyo wake, nchifukwa chake Chauta adzaŵalanga ndi imfa. Adzaŵalanga chifukwa adamchititsa manyazi kwambiri.