Read Buku Loyera - Chichewa Hos. 14 Bible Online

Hos. 14 - Buku Loyera - Chichewa bible

Hos. 14

¹Inu Aisraele, bwererani kwa Chauta, Mulungu wanu, pakuti mwagwa chifukwa cha machimo anu,

²Bwererani kwa Chauta, ndipo mumpemphe kuti, “Mutikhululukire machimo athu onse. Mumvere pempho lathu ndipo tidzakuyamikani ndi mau otamanda.

³Aasiriya sadzatipulumutsa, akavalo ankhondo sadzatiteteza. Chimene tidapanga ndi manja athu sitidzachitchulanso kuti, ‘Mulungu wathu,’ pakuti ndinu amene mumachitira chifundo amasiye.”

⁴Chauta akuti, “Ndidzachiza matenda ao a kusakhulupirika. Ndidzaŵakonda kwambiri, pakuti ndaleka kuŵakwiyira.

⁵Ndidzatsitsimutsa Israele ngati mame. Adzachita maluŵa ngati kakombo, adzazika mizu ngati mtengo wa ku Lebanoni.

⁶Ziphukira zake zidzatambasukira kutali, adzakhala wokongola ngati mtengo wa olivi, adzakhala wonunkhira ngati mkungudza wa ku Lebanoni.

⁷Aisraele adzapezanso chitetezo mwa Ine. Adzakolola tirigu wambiri, adzachuluka ngati mphesa. Adzakhala otchuka ngati vinyo wa ku Lebanoni.

⁸Kodi Aefuremu adzachita nawonso chiyani mafano? Ndine amene ndimamva pemphero lao ndi kuŵasamala. Ndili ngati mkungudza wogudira nthaŵi zonse, ndine amene ndimaŵapatsa zipatso.”

⁹Amene ali wanzeru amvetse zimenezi. Amene ali womvetsa, azisunge. Pakuti njira za Chauta nzolungama, ndipo olungama amayendamo, koma ochimwa amakhumudwamo.