Read Buku Loyera - Chichewa Hos. 6 Bible Online

Hos. 6 - Buku Loyera - Chichewa bible

Hos. 6

¹Anthu akunena kuti, “Tiyeni, tibwerere kwa Chauta. Watikadzula, komabe adzatichiritsa. Watikantha, komabe adzamanga mabala athu.

²Posachedwa adzatitsitsimutsa. Patangopita masiku aŵiri kapena atatu, adzatiwukitsa kuti tikhale ndi moyo pamaso pake.

³Tiyeni tilimbikire kusamala za Chauta. Adzabwera kwa ife mosapeneka konse ngati mbandakucha. Kubwera kwake kudzakhala madalitso ngati mvula, mvula yake yachilimwe imene imakhathamiza nthaka.”

⁴Koma Chauta akuti, “Inu Aefuremu, kodi ndikuchiteni chiyani? Nanga inu Ayuda, ndikuchiteni chiyani? Chikondi chanu chimazimirira ngati nkhungu yam'maŵa, chili ngati mame okamuka msanga.

⁵Nchifukwa chake ndakuŵazani ngati nkhuni ndi machenjezo a aneneri, ndakuphani ndi mau anga. Chigamulo changa nchoonekeratu ngati kuŵala kwa dzuŵa.

⁶Kunena zoona Ine ndimafuna chikondi chosasinthika, osati nsembe chabe. Ndifuna kuti anthu andidziŵe Ine Mulungu m'malo mwa kumangopereka nsembe zopsereza.

⁷“Koma anthuwo adaphwanya chipangano changa monga adachitira Adamu. Potero, adandichitira zosakhulupirika.

⁸Giliyadi ndi mzinda wa anthu ochita zoipa, akungophana basi.

⁹Monga mbala zimalalira munthu, momwemonso ansembe amasonkhana kuti azipha anthu pa njira ya ku Sekemu. Zoonadi amachita zachifwamba zambiri.

¹⁰Pakati pa Aisraele ndaonapo zinthu zonyansa. Aefuremu adachita zadama, Aisraele adadziipitsa pakupembedza mafano.

¹¹“Inunso Ayuda mudzakolola chilango.