Read Buku Loyera - Chichewa Hos. 9 Bible Online

Hos. 9 - Buku Loyera - Chichewa bible

Hos. 9

¹Musakondwere Aisraele inu! Musakhale ndi chisangalalo chonga cha mitundu ina ya anthu. Mwasiya Mulungu wanu monga amachitira mkazi wosakhulupirika. Mwadzigulitsa kwa Baala ngati mkazi wadama, kuti mukalandireko zokolola zambiri.

²Tirigu ndi mphesa simudzakhala nazo zokwanira. Mudzasoŵanso vinyo woti muzimwa.

³Simudzakhalanso m'dziko la Chauta. Aefuremu inu, mudzabwerera ku ukapolo ku Ejipito, mudzadya chakudya choletsedwa ku dziko la Asiriya.

⁴Kumeneko anthu sadzaperekanso zopereka za chakumwa kupereka kwa Chauta. Sadzamkondwetsanso ndi nsembe zao. Chakudya chao chidzakhala ngati chakudya chapamaliro, onse amene adzadya chakudya chimenecho adzaipitsidwa. Chakudyacho chidzangokhala chodyera njala chabe, osati choti nkukapereka ku Nyumba ya Chauta.

⁵Kodi pa tsiku la chikondwerero, tsiku lolemekeza Chauta, anthuwo adzachitapo chiyani?

⁶Nthaŵi ya chilango ikadzafika, iwo nkubalalika, Aejipito adzaŵakusa, nakaŵaika m'manda komweko ku Memfisi. Khwisa adzamera pa ziŵiya zao zasiliva. M'nyumba mwao mudzamera minga.

⁷ Nthaŵi ya chilango yafikadi, masiku olipsira aŵagwera. Pamenepo adzadziŵa kuti zimenezi nzoonadi. Tsopano akunena kuti, “Mneneriyu nchitsilu, munthu wa nzeru za kwa Mulunguyu ndi wamsala!” Amatero chifukwa zolakwa zao zachuluka, chidani chao nchachikulukulu.

⁸Mneneri ndiye wochenjeza Aefuremu, anthu a Mulungu wanga. Koma mneneriyo amtchera msampha m'njira zake zonse, ndipo adani akumlalira m'Nyumba ya Mulungu.

⁹ Anthu aipiratu monga zidachitikira ku Gibea.[3] Nchifukwa chake Mulungu sadzaiŵala kuipa kwao, ndipo adzalanga machimo ao.

¹⁰ Chauta akuti, “Israele ndidampeza ngati mphesa zam'thengo. Makolo ake aja ndidaŵakondwerera ngati nkhuyu zoyamba kupsa. Koma iwowo adapita kwa Baala-Peori, ndipo kumeneko adadzipereka kwa Baala. Motero adasanduka chinthu chonyansa ngati fano laolo, limene ankalikonda lija.

¹¹Ulemerero wa Aefuremu udzaŵathaŵa mouluka ngati mbalame. Sadzabalanso ana. Akazi ao sadzaima, sadzatenga pathupi.

¹²Ngakhale abale ana, ndidzaŵaononga, sadzakhalapo ndi mmodzi yemwe. Tsoka kwa anthuwo ndikadzaŵasiya.”

¹³Inu Chauta, monga ndikuwonera, ana a Efuremu adzakhala ngati nyama zojiwa. Aefuremu adzatsogolera ana ao kunkhondo kumene adzaphedwe.

¹⁴Muŵapatse, Inu Chauta. Kodi mudzaŵapatse chiyani? Muŵapatse mimba yopita padera ndi maŵere ouma!

¹⁵Chauta akuti, “Kuipa kwao konse kudaoneka makamaka ku Giligala. Ndidayamba kudana nawo kumeneko. Ndidzaŵapirikitsa m'dziko mwanga, chifukwa makhalidwe ao ndi oipa. Sindidzaŵakondanso, atsogoleri ao onse andiwukira.

¹⁶Efuremu ali ngati mtengo wodulidwa umene mizu yake yauma, ndipo sudzabalanso zipatso. Ngakhale anthuwo abale ana, ndidzaŵapha ana ao okondedwawo.”

¹⁷Mulungu wanga adzaŵataya anthu amenewo chifukwa choti sadamumvere. Adzasanduka oyendayenda pakati pa mitundu ya pa dziko lapansi.