Read Buku Loyera - Chichewa Amo. 9 Bible Online

Amo. 9 - Buku Loyera - Chichewa bible

Amo. 9

¹Tsono ndidaona Chauta ataima pambali pa guwa. Adati, “Gwetsani makapotolosi a Nyumba ya Mulungu, kuti maziko ake agwedezeke. Muŵagwetsere pamitu pa anthu. Onse otsalira Ine ndidzaŵapha pa nkhondo. Palibe ndi mmodzi yemwe amene adzathaŵe. Palibe ndi mmodzi yemwe amene adzapulumukepo.

²“Ngakhale akakumbe pansi mpaka ku malo a anthu akufa, dzanja langa lidzaŵadukhululako kumeneko. Ngakhale akakwere mpaka kumwamba, ndidzaŵatsakamutsako.

³Ngakhale akabisale pamwamba pa phiri la Karimele, ndidzaŵaunguza nkuŵagwira. Ngakhale akabisale pansi pa nyanja yaikulu, ndidzalamula chilombo cham'nyanjamo kuti chiŵalume.

⁴Ngakhale adani ao aŵakusire ku ukapolo, komweko ndidzalamula kuti aphedwe pa nkhondo. Ndidzaŵayang'anitsitsa kuti ziŵagwere zoipa osati zabwino.”

⁵Ambuye Chauta Wamphamvuzonse, akakhudza dziko, limanyenyeka, ndipo zonse zokhala m'menemo zimalira. Apo dziko lonse limafufuma ngati mtsinje wa Nailo ndipo limateranso ngati mtsinje wa Nailo wa ku Ejipito.

⁶Ndiwo amene amamanga malo ao okhalamo kumwamba, naika thambo ngati denga la dziko lapansi, amaitana madzi akunyanja naŵakhuthulira pa dziko lapansi. Iwowo dzina lao ndi Chauta.

⁷“Kwa Ine, Aisraelenu muli ngati Aetiopiya.” Akuterotu Chauta. “Kodi sindine uja ndidatulutsa Aisraele ku Ejipito? Kodi sindine uja ndidatulutsa Afilisti ku Kafitori ndi Asiriya ku Kiri?

⁸Ine, Ambuye Chauta, maso anga ali pa dziko lochimwalo, ndipo ndidzalifafaniza pa dziko lapansi. Komabe banja la Yakobe lokha sindidzaliwononga kotheratu.” Akuterotu Chauta.

⁹“Ai, ndidzalamula, ndipo ndidzagwedeza Aisraele uku ndi uku pakati pa mitundu yonse ya anthu monga momwe amagwedezera sefa uku ndi uku, popanda kamwala nkamodzi komwe kogwa pansi.

¹⁰Adzafera pa nkhondo anthu anga onse ochimwa, iwo amene amati, ‘Chilango sichidzatifika, kapena kutipambana.’ ”

¹¹ Chauta akuti, “Nthaŵi imeneyo ndidzakwezanso ufumu wa Davide umene udagwa ngati nyumba. Ndidzakonzanso makoma ake ogumuka ndi kumanganso mabwinja ake. Ndidzaubwezeranso mwake mwakale.

¹²Nthaŵi imeneyo Aisraele otsala adzagonjetsa zimene zatsala za ku Edomu, pamodzi ndi maiko onse amene amadziŵika ndi dzina langa.” Akuterotu Chauta, amene adzachitedi zimene wanenazi.

¹³Chauta akunena kuti, “Nthaŵi ikubwera pamene mlimi adzabzola wokolola, ndipo woponda mphesa adzabzola wobzala mbeu. M'mapiri mudzatuluka vinyo wokoma, azidzachita kuyenderera pa zitunda zonse.

¹⁴“Ndidzaŵabwezeranso pabwino anthu anga Aisraele. Adzamanganso mizinda yamabwinja ndi kumakhalamo. Adzalima minda ya mphesa ndipo adzamwa vinyo wake. Adzalima minda ndipo adzadya zipatso zake.

¹⁵Ndidzaŵakhazikanso m'dziko mwao, ndipo palibe amene adzaŵachotsemo m'dziko limene ndidzaŵapatsalo.” Akuterotu Chauta, Mulungu wanu.