Read Buku Loyera - Chichewa Num. 1 Bible Online

Num. 1 - Buku Loyera - Chichewa bible

Num. 1

¹ Chauta adalankhula ndi Mose ku chipululu cha Sinai, m'chihema chamsonkhano, pa tsiku loyamba la mwezi wachiŵiri, chaka chachiŵiri atatuluka ku dziko la Ejipito, ndipo adamuuza kuti,

²“Uŵerenge anthu a mpingo wonse wa Aisraele potsata mabanja ao ndiponso banja la makolo ao. Ulembe dzina la munthu wamwamuna aliyense mmodzimmodzi.

³Iwe ndi Aroni muŵerenge anthu, gulu ndi gulu, a zaka makumi aŵiri ndi opitirirapo, ndiye kuti anthu onse a ku Israele amene angathe kumenya nkhondo.

⁴Pa fuko lililonse mutenge munthu mmodzi, mtsogoleri wa banja lake, kuti akuthandizeni pa ntchito yanuyo.

⁵Maina a anthu okuthandizaniwo ndi aŵa: fuko la Rubeni, akuthandizeni ndi Elizuri mwana wa Sedeuri;

⁶fuko la Simeoni, Selumiele mwana wa Zurishadai;

⁷fuko la Yuda, Nasoni mwana wa Aminadabu;

⁸fuko la Isakara, Netanele mwana wa Zuwara;

⁹fuko la Zebuloni, Eliyabu mwana wa Heloni.

¹⁰Mwa ana a Yosefe: fuko la Efuremu, Elisama mwana wa Amihudi; fuko la Manase, Gamaliele mwana wa Pedazuri;

¹¹fuko la Benjamini, Abidani mwana wa Gideoni;

¹²fuko la Dani, Ahiyezere mwana wa Amishadai;

¹³fuko la Asere, Pagiyele mwana wa Okarani;

¹⁴fuko la Gadi, Eliyasafu mwana wa Deuwele;

¹⁵fuko la Nafutali, Ahira mwana wa Enani.”

¹⁶Ameneŵa ndiwo anthu amene adasankhidwa mu mpingo, atsogoleri a mabanja ao, akulu a mafuko a Aisraele.

¹⁷Mose ndi Aroni adaŵatenga anthu amene atchulidwaŵa,

¹⁸ndipo pa tsiku loyamba la mwezi wachiŵiri, adasonkhanitsa mpingo wonse. Tsono Aisraele adalembetsa maina ao potsata mabanja ao ndiponso banja la makolo ao. Ankalembetsa ndi anthu a zaka makumi aŵiri ndi kupitirirapo, mmodzimmodzi,

¹⁹monga momwe Chauta adaalamulira Mose. Umu ndi m'mene adaŵerengera anthuwo m'chipululu cha Sinai.

²⁰Mwa zidzukulu za Rubeni, mwana woyamba wa Yakobe, adalemba maina a amuna onse otha kumenya nkhondo, a zaka 20 ndi zaka zopitirirapo, potsata mabanja ao ndiponso banja la makolo ao.

²¹Tsono ataŵerenga maina onse a m'fuko la Rubeni, adapezeka kuti ali 46,500.

²²Mwa zidzukulu za Simeoni adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

²³Tsono ataŵerenga maina onse a m'fuko la Simeoni, adapezeka kuti ali 59,300.

²⁴Mwa zidzukulu za Gadi adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

²⁵Tsono ataŵerenga maina onse a m'fuko la Gadi, adapezeka kuti ali 45,650.

²⁶Mwa zidzukulu za Yuda adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

²⁷Tsono ataŵerenga maina onse a m'fuko la Yuda, adapezeka kuti ali 74,600.

²⁸Mwa zidzukulu za Isakara adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

²⁹Tsono ataŵerenga maina onse a m'fuko la Isakara, adapezeka kuti ali 54,400.

³⁰Mwa zidzukulu za Zebuloni adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

³¹Tsono ataŵerenga maina onse a m'fuko la Zebuloni, adapezeka kuti ali 57,400.

³²Mwa zidzukulu za Yosefe, ndiye kuti anthu a m'fuko la Efuremu, adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

³³Tsono ataŵerenga maina onse a m'fuko la Efuremu, adapezeka kuti ali 40,500.

³⁴Mwa zidzukulu za Manase adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

³⁵Tsono ataŵerenga maina onse a m'fuko la Manase, adapezeka kuti ali 32,200.

³⁶Mwa zidzukulu za Benjamini adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

³⁷Tsono ataŵerenga maina onse a m'fuko la Benjamini, adapezeka kuti ali 35,400.

³⁸Mwa zidzukulu za Dani adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

³⁹Tsono ataŵerenga maina onse a m'fuko la Dani, adapezeka kuti ali 62,700.

⁴⁰Mwa zidzukulu za Asere adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

⁴¹Tsono ataŵerenga maina onse a m'fuko la Asere, adapezeka kuti ali 41,500.

⁴²Mwa zidzukulu za Nafutali adalemba maina a amuna onse otha kumenya nkhondo, a zaka 20 ndi a zaka zopitirirapo, potsata mabanja ao ndiponso banja la makolo ao.

⁴³Tsono ataŵerenga maina onse a m'fuko la Nafutali, adapezeka kuti ali 53,400.

⁴⁴Ameneŵa ndiwo anthu amene Mose ndi Aroni adaŵaŵerenga, mothandizidwa ndi atsogoleri a Aisraele khumi ndi aŵiri amene ankaimirira mafuko ao.

⁴⁵Choncho amuna onse a mu Israele otha kumenya nkhondo, a zaka 20 ndi a zaka zopitirirapo, potsata banja la makolo ao,

⁴⁶adapezeka kuti ali 603,550.

⁴⁷Alevi okha sadaŵaŵerengere kumodzi ndi enawo, potsata banja la makolo ao,

⁴⁸chifukwa Chauta adaauza Mose kuti,

⁴⁹“Fuko la Levi usaliŵerenge ai, anthu ake usaŵalembere kumodzi ndi Aisraele enawo.

⁵⁰Uike Aleviwo kuti aziyang'anira chihema changa chaumboni, zipangizo zake ndi zonse zimene zili m'menemo. Azinyamula chihemacho, pamodzi ndi zipangizo zake, ndipo azichisamala. Zithando zao azimange pozungulira chihemacho.

⁵¹Nthaŵi imene anthu akunyamuka ulendo, Alevi ndiwo amene azichitsitsa, ndipo nthaŵi imene anthu aima, Alevi omwewo ndiwo amene azichiimiritsa. Munthu wina aliyense wochiyandikira adzaphedwa.

⁵²Aisraele azimanga mahema ao m'magulumagulu, aliyense pa chithando chake, ndipo onse azimanga pafupi ndi mbendera yao.

⁵³Koma Alevi amange mahema ao pozungulira chihema chaumboni, kuti Mulungu asakwiyire mpingo wa Aisraele. Alevi ndiwo amene aziyang'anira chihema chaumbonicho.”

⁵⁴Umu ndi m'mene adachitira Aisraele. Adachita zonse monga momwe Chauta adaalamulira Mose.