Read Buku Loyera - Chichewa Num. 31 Bible Online

Num. 31 - Buku Loyera - Chichewa bible

Num. 31

²“Ulipsire Amidiyani chifukwa cha zimene adachitira Aisraele, tsono pambuyo pake udzafa.”

³Mose adauza Aisraele kuti, “Amuna ena pakati panupa mutenge zida zankhondo, kuti mukamenyane ndi Amidiyani, kuti Chauta aŵalipsire.

⁴Mutumize ku nkhondo anthu chikwi chimodzi pa fuko lililonse la Israele.”

⁵Choncho pa anthu a Aisraele ambirimbiri aja, Mose adatumiza anthu chikwi chimodzi pa fuko lililonse, ndipo onse anali 12,000 pamodzi.

⁶Mose adaŵatumiza ku nkhondo anthuwo, chikwi chimodzi pa fuko lililonse, pamodzi ndi Finehasi mwana wa wansembe Eleazara, iyeyu atanyamula zipangizo za ku malo opatulika ndi malipenga ochenjeza m'manja mwake.

⁷Aisraelewo adamenyana nkhondo ndi Amidiyani, monga momwe Chauta adaalamulira Mose, ndipo adapha amuna onse.

⁸Adapha mafumu a ku Midiyani pamodzi ndi anthu ao omwe. Mafumuwo anali Evi, Rekemu, Zuri, Huri ndi Reba, mafumu asanu a ku Midiyani. Adaphanso ndi lupanga Balamu mwana wa Beori.

⁹Ndipo adagwira akazi a ku Midiyani ukapolo, pamodzi ndi ana ao. Adalandanso ng'ombe zao, nkhosa zao, ndi chuma chao chonse.

¹⁰Adatentha mizinda yonse imene iwo ankakhalamo, ndi zithando zao zonse,

¹¹natenga zonse zimene adalanda kunkhondoko, anthu pamodzi ndi nyama zomwe.

¹²Tsono adabwera nawo akapolowo, pamodzi ndi zonse zimene adalandazo, kwa Mose, kwa wansembe Eleazara ndi kwa mpingo wonse wa Aisraele, ku zithando za ku zigwa za Mowabu, pafupi ndi mtsinje wa Yordani ku Yeriko.

¹³Mose ndi wansembe Eleazara, pamodzi ndi atsogoleri a mpingo, adakaŵachingamira kunja kwa zithando.

¹⁴Ndipo Mose adakwiyira akulu ankhondowo, atsogoleri olamulira ankhondo zikwi ndiponso atsogoleri olamulira ankhondo mazana, amene ankachokera ku nkhondo.

¹⁵Mose adaŵafunsa kuti, “Chifukwa chiyani mwaŵasiya amoyo akazi onse?

¹⁶ Paja akazi ameneŵa adatsata uphungu wa Balamu, nasokeretsa Aisraele kuti asachitenso zokhulupirika pamaso pa Chauta ku Peori kuja, kotero kuti mliri udagwera mpingo wa Chauta.

¹⁷Nchifukwa chake tsono iphani mwana wamwamuna aliyense, ndi mkazi aliyense amene adadziŵapo ndi mwamuna.

¹⁸Koma atsikana amene sadagone ndi mwamuna, muŵasunge akhale anu.

¹⁹Tsono aliyense mwa inu amene wapha munthu, kapena amene wakhudza mtembo, akhale kunja kwa mahema masiku asanu ndi aŵiri. Pa tsiku lachitatu ndi pa tsiku lachisanu ndi chiŵiri, mudziyeretse inuyo pamodzi ndi akapolo anu.

²⁰Muyeretse chovala chilichonse, chinthu chilichonse chachikopa, chinthu chilichonse chopangidwa ndi ubweya wambuzi, ndi chinthu chilichonse chopangidwa ndi mtengo.”

²¹Tsono wansembe Eleazara adauza ankhondo amene adaapita ku nkhondowo kuti, “Lamulo limene Chauta walamula Mose ndi ili:

²²Izi zokha, golide, siliva, mkuŵa, chitsulo, chiwaya ndi mtovu,

²³zonse zimene sizingathe kupsa ndi moto, muziike pa moto, ndipo zidzayeretsedwa. Komabe ziyeretsedwenso ndi madzi oyeretsera, ndipo chilichonse chimene chingathe kupsa ndi moto, muchiviike m'madzi omwewo.

²⁴Muchape zovala zanu pa tsiku lachisanu ndi chiŵiri, ndipo mudzayeretsedwa. Pambuyo pake muloŵe ku mahema.”

²⁵Chauta adauza Mose kuti,

²⁶“Iwe, ndi wansembe Eleazara, pamodzi ndi atsogoleri a mabanja a mpingo, muŵerenge zofunkha zimene adalanda pa nkhondo, anthu pamodzi ndi nyama zomwe.

²⁷Ndipo mugaŵe zofunkhazo magawo aŵiri, lina la ankhondo amene adaapita ku nkhondo, lina la mpingo wonse.

²⁸Pa gawo la ankhondowo, mutengeko gawo la Chauta, pa zofunkha mazana asanu aliwonse mutengeko chimodzi, pa akapolo, pa ng'ombe, pa abulu ndi pa nkhosa.

²⁹Mutenge zimenezo pa gawo la ankhondowo ndipo mupatse wansembe Eleazara, kuti zikhale zopereka zanu kwa Chauta.

³⁰Ndipo pa gawo la Aisraele, mtengeko chofunkha chimodzi pa zofunkha makumi asanu aliwonse, pa anthu, ng'ombe, abulu, nkhosa ndi pa nyama zonse zoŵeta, ndipo mupatse Alevi amene amayang'anira Chihema cha Chauta.”

³¹Tsono Mose ndi wansembe Eleazara adachitadi zomwe Chauta adalamula Mose.

³²Zofunkha zotsala zimene ankhondowo adalanda zinali izi: nkhosa 675,000,

³³ng'ombe 72,000,

³⁴abulu 61,000,

³⁵ndi atsikana amene sadagonepo ndi amuna 32,000 pamodzi.

³⁶Gawo la ankhondo amene adapita ku nkhondo linali nkhosa 337,500,

³⁷ndipo gawo la Chauta linali nkhosa 675.

³⁸Ng'ombe zinalipo 36,000, ndipo 72 zinali gawo la Chauta.

³⁹Abulu analipo 30,500, ndipo 61 anali gawo la Chauta.

⁴⁰Anthu analipo 16,000, ndipo 32 anali gawo la Chauta.

⁴¹Mose adapereka kwa wansembe Eleazara gawo limene linali loyenera kulipereka kwa Chauta, monga momwe Chauta adaalamulira Moseyo.

⁴²Mose adagaŵa zofunkha napatsa Aisraele theka limodzi, kuchotsa pa zofunkha zonse zobwera ndi ankhondo aja.

⁴³Tsono gawo la Aisraele linali ili: nkhosa 337,500,

⁴⁴ng'ombe 36,000,

⁴⁵abulu 30,500,

⁴⁶ndiponso anthu 16,000.

⁴⁷Pa gawo la Aisraelelo, Mose adatengako chofunkha chimodzi pa zofunkha makumi asanu aliwonse, anthu ndi nyama, ndipo adapatsa Alevi amene ankayang'anira Chihema cha Chauta, monga momwe Chauta adaalamulira Mose.

⁴⁸Pamenepo akulu a nkhondo amene ankayang'anira ankhondo onse, ndiye kuti atsogoleri olamulira ankhondo zikwi, ndi atsogoleri olamulira ankhondo mazana, adabwera kwa Mose.

⁴⁹Adauza Moseyo kuti, “Atumiki anufe taŵerenga ankhondo amene tikuŵalamulira, ndipo palibe munthu ndi mmodzi yemwe amene akusoŵa.

⁵⁰Ndipo ife tabwera ndi zopereka kwa Chauta zimene munthu aliyense adapeza, monga golide, zibangiri, zikono, mphete zosindikizira, ndolo ndi mikanda, kuti achitire mwambo wopepesera machimo athu pamaso pa Chauta.”

⁵¹Apo Mose ndi wansembe Eleazara adalandira golide kwa atsogoleriwo, pamodzi ndi zinthu zonse zosula.

⁵²Golide yense amene iwo adapereka kwa Chauta kuchokera kwa atsogoleri a ankhondo zikwi, ndi kwa atsogoleri a ankhondo mazana, anali wolemera makilogaramu 200 yense pamodzi.

⁵³(Ankhondo aja anali atatenga zofunkha, aliyense zakezake.)

⁵⁴Tsono Mose ndi wansembe Eleazara adalandira golideyo kwa atsogoleri a ankhondo zikwi ndi a ankhondo mazana, namuika m'chihema chamsonkhano, kuti akhale chikumbutso cha Aisraele pamaso pa Chauta.