Read Buku Loyera - Chichewa Num. 34 Bible Online

Num. 34 - Buku Loyera - Chichewa bible

Num. 34

¹Chauta adauza Mose kuti,

²“Ulamule Aisraele, uŵauze kuti, ‘Posachedwa muloŵa m'dziko la Kanani, (dziko limenelo ndilo lidzakhala choloŵa chanu, dziko lonse la Kananilo).

³Chigawo chakumwera cha dziko lanu chidzayambira ku chipululu cha Zini kulambalala malire a Edomu. Malire anu akumwera ayambira kuvuma, kumathero a Nyanja ya Mchere.

⁴Malire anuwo apite kumwera, ndipo akwere phiri la Akarabimu ndi kuwolokera ku Zini. Mathero ake akhale kumwera kwa Kadesi-Baranea. Tsono apitirire mpaka ku Hazaradara, ndipo alambalale kukafika ku Azimoni.

⁵Malirewo akhotere ku Azimoni ndi kumapita ku mtsinje wa ku Ejipito, ndipo akathere ku Nyanja.’

⁶“Malire anu akuzambwe akhale Nyanja Yaikulu ndi gombe lake. Ameneŵa ndiwo malire akuzambwe.

⁷“Malire anu akumpoto ndi aŵa, mulembe malire kuyambira ku Nyanja yaikulu mpaka ku phiri la Hori.

⁸Kuchokera ku phiri la Horiko, mulembe malire kufikira ku chipata cha Hamati, ndipo mathero a malirewo akhale ku Zedadi.

⁹Tsono malirewo afike mpaka ku Zifuroni, ndipo mathero ake akhale ku Hazarenani.

¹⁰“Mulembe malire anu akuvuma kuyambira ku Hazarenaniko mpaka ku Sefamu.

¹¹Atsike kuchokera ku Sefamu mpaka ku Ribula, kuvuma kwa Aini. Atsikebe mpaka ku gombe la Nyanja ya Galilea, kuvuma,

¹²atsike ndithu mpaka ku mtsinje wa Yordani, ndipo akathere ku Nyanja ya Mchere. Limeneli ndilo dziko lanu pamodzi ndi malire ake ozungulira dzikolo.”

¹³ Mose adalamula Aisraele kuti, “limeneli ndilo dziko limene mudzalandira mwamaere kuti likhale choloŵa chanu, limene Chauta walamula kuti lipatsidwe kwa mafuko asanu ndi anai ndi theka.

¹⁴Fuko la ana a Rubeni mwa mabanja a makolo ao, ndi fuko la ana a Gadi mwa mabanja a makolo ao, pamodzi ndi theka la fuko la Manase, adalandira kale choloŵa chao.

¹⁵Mafuko aŵiriwo ndi thekalo adalandira kale choloŵa chao patsidya pa mtsinje wa Yordani ku Yeriko chakuvuma kotulukira dzuŵa.”

¹⁶Chauta adauza Mose kuti,

¹⁷“Maina a anthu amene adzakugaŵireni dzikolo kuti likhale choloŵa chanu, ndi wansembe Eleazara ndi Yoswa mwana wa Nuni.

¹⁸Mutenge mtsogoleri mmodzi pa fuko lililonse, kuti agaŵe dzikolo ngati choloŵa.

¹⁹Maina a anthuwo naŵa: M'fuko la Yuda akhale Kalebe mwana wa Yefune.

²⁰M'fuko la ana a Simeoni akhale Semuele mwana wa Amihudi.

²¹M'fuko la Benjamini akhale Elidadi mwana wa Kisiloni.

²²M'fuko la ana a Dani akhale Buki mwana wa Yogili.

²³Mwa ana a Yosefe, m'fuko la ana a Manase akhale Haniyele mwana wa Efodi.

²⁴M'fuko la ana a Efuremu akhale Kemuwele mwana wa Sifutani.

²⁵M'fuko la ana a Zebuloni akhale Elizafani mwana wa Paranaki.

²⁶M'fuko la ana a Isakara akhale Palatiele mwana wa Azani.

²⁷M'fuko la ana a Asere akhale Ahihudi mwana wa Selomi.

²⁸M'fuko la ana a Nafutali akhale Pedahele, mwana wa Amihudi.

²⁹Ameneŵa ndiwo amene Chauta adalamula kuti agaŵe choloŵa cha Aisraele m'dziko la Kanani.”