Read Buku Loyera - Chichewa Mik. 5 Bible Online

Mik. 5 - Buku Loyera - Chichewa bible

Mik. 5

¹Tsopano konzekani m'magulu ankhondo, inu a ku Yerusalemu. Atizinga ndi zithando zankhondo, akuthira nkhondo likulu la Israele.

² Chauta akuti, “Koma iwe Betelehemu wa ku Efurata, inde ndiwe wamng'ono pakati pa mafuko a Yuda, komabe mwa iwe ndidzatulutsa munthu amene adzakhala wolamulira Israele. Iyeyo chiyambi chake nchakalekale, cha masiku amakedzana.”

³Nchifukwa chake Mulungu adzasiya Israele mpaka pa nthaŵi yoti achire mkazi amene adzabale mwana. Pamenepo, otsala a mtundu wake adzabwereranso kwa Aisraele anzao.

⁴Iye adzalimbikira, ndipo adzaŵeta nkhosa zake mwa mphamvu za Chauta ndi ulemerero wa dzina la Chauta, Mulungu wake. Ndipo iwo adzakhala mu mtendere, poti ukulu wake udzakhazikika pa dziko lonse lapansi.

⁵Ndiye amene adzakhazikitse mtendere. Aasiriya akadzaloŵa m'dziko mwathu ndi kuyamba kutithira nkhondo, tidzaŵatumira atsogoleri ankhondo asanu ndi aŵiri kapena akalonga asanu ndi atatu.

⁶Iwowo adzagonjetsa dziko la Asiriya ndi lupanga, dziko la Nimirodi adzalilamulira mwankhondo. Adzatipulumutsa kwa Aasiriya, iwowo akadzakaloŵa m'dziko mwathu, kudzatithira nkhondo.

⁷Onse otsalira a Yakobe adzakhala dalitso pakati pa mitundu yambiri ya anthu ngati mame ochoka kwa Chauta. Adzakhala ngati mvula yowaza pa udzu, imene sichita kulamulidwa ndi anthu, siidikira lamulo la munthu.

⁸Onse otsalira a Yakobe adzakhala temberero pakati pa mitundu ya anthu, ngati mkango pakati pa nyama zam'nkhalango. Adzakhala ngati mwana wa mkango, pakati pa gulu la nkhosa, amene amati akadzaziloŵerera, amazimbwandira ndi kuzikadzula. Ndipo sipakhala wozipulumutsa.

⁹Inu Aisraele, mudzapambana adani anu, ndipo adani anu onsewo adzaonongeka.

¹⁰Komabe Chauta akuuza Aisraele kuti, “Pa tsiku limenelo ndidzaononga akavalo anu onse, ndipo ndidzaphwasula magaleta anu.

¹¹Ndidzaononga mizinda ya m'dziko mwanu ndi kugwetseratu malinga anu.

¹²Ndidzasakaza masenga anu onse, ndipo pakati panu sipadzakhalanso oombeza.

¹³Ndidzaononga mafano anu onse pamodzi ndi miyala yoimika yopembedzerapo m'dziko mwanu. Simudzazigwadiranso zinthuzo zimene mudapanga ndi manja anu.

¹⁴Ndidzagwetsa mafano anu a Asera m'dziko mwanu, ndipo ndidzaononga mizinda yake.

¹⁵Mwaukali ndi mokwiya ndidzalanga mitundu yonse ya anthu imene sidandimvere.”