Read Buku Loyera - Chichewa Nah. 1 Bible Online

Nah. 1 - Buku Loyera - Chichewa bible

Nah. 1

¹ Uwu ndi uthenga wonena za mzinda wa Ninive. Uthengawu ukufotokoza za zimene Nahumu wa ku Elikosi adaziwona m'masomphenya.

²Chauta ndi Mulungu wansanje ndiponso wolipsira. Chauta amalanga, ndipo ndi wamkali. Chauta amalipsira amaliwongo ake amakwiyira adani ake.

³Chauta ndi wamphamvu zedi. Ndi wosakwiya msanga, komabe sadzalola kuti munthu wochimwa akhale wosalangidwa. Pamene amayenda pamachitika kamvulumvulu ndi mphepo yamkuntho, mitambo ndiye fumbi limene mapazi ake amachititsa.

⁴Akangoilamula nyanja, imauma, amaumitsanso mitsinje yonse. Zomera za ku Basani ndi za ku Karimele zimauma, maluŵa a ku Lebanoni amafota.

⁵Mapiri amagwedezeka pamaso pake, magomo amasungunuka. Dziko lapansi limanjenjemera pamaso pake, ndiye kuti dziko ndi zonse zokhala m'menemo.

⁶Kodi ndani angathe kuima pamaso pa Chauta, Iye atakwiya? Kodi ndani angathe kupirira ukali wake? Ukali wake umayaka ngati moto, matanthwe amadyukuka pamaso pake.

⁷Chauta ndi wabwino, ndiye kothaŵira pa nthaŵi yamavuto. Amasamala onse amene amadalira Iye.

⁸Koma ndi madzi achigumula adzaononga adani ake, ndipo adzaŵapirikitsira ku malo amdima.

⁹Kodi mukukonzekera kumchita Chauta chiwembu chotani? Adzakuwonongani kotheratu. Sadzalira kuŵalipsira kaŵiri adani akewo.

¹⁰Adzaŵatentha kotheratu ngati ziyangoyango za minga ndiponso ngati ziputu zouma.

¹¹Ku Ninive kudachokera munthu wa cholinga choipa, wofuna kuchita Chauta chiwembu.

¹²Zimene akunena Chauta ndi izi, akuti, “Ngakhale Aasiriyawo ndi amphamvu ndiponso ndi ambiri, adzaonongeka ndi kutheratu. Koma inu anthu anga, ngakhale ndidakulangani, sindidzakulanganinso.

¹³Tsopano ndidzathyola goli limene adakuikani m'khosi, ndipo ndidzadula maunyolo anu.”

¹⁴Za inu a ku Ninive Chauta walamula kuti, “Simudzakhala ndi adzukulu otchedwa dzina lanu. Ndidzaononga mafano osema ndi oumba m'nyumba ya milungu yanu. Ndidzakukumbirani manda, chifukwa ndinu opandapake.”

¹⁵Ona, kumapiri kukubwera munthu, iyeyu ali ndi uthenga wabwino, akulengeza za mtendere. Inu a ku Yuda muzisunga masiku achikondwerero; zimene mudalumbira, muzizichitadi. Anthu oipawo sadzakuthiraninso nkhondo. Adaonongeka kotheratu.