Read Buku Loyera - Chichewa Nah. 2 Bible Online

Nah. 2 - Buku Loyera - Chichewa bible

Nah. 2

¹Inu a ku Ninive, othira nkhondo akubwera kudzakuwonongani. Ikani ankhondo pa malinga! Muziyang'ana ku mseu! Konzekerani nkhondo! Valani dzilimbe!

²Patsala pang'ono kuti Chauta abwezere ulemerero wa Israele, monga udaaliri kale, ofunkha asanalande zinthu zonse ndi kuwononga mphesa zao.

³Zishango za ankhondo ao nzofiira, asilikali ao onse avala zovala zamlangali. Atandanda pa mizere yankhondo, magaleta ao akuchezimira ngati malaŵi a moto. Akavalo akungoti jodojodo.

⁴Magaleta akuthamanga m'miseu. Ali piringupiringu m'mabwalo. Ali ŵaliŵali ngati miyuni yoyaka. Ali ng'aning'ani ngati mphezi.

⁵Atsogoleri a ankhondo akuitanidwa, akubwera naphunthwa. Akuthamangira ku linga la mzinda, akuimika chipupa chodzitetezera.

⁶Akutsekula zipata zotchinga dziŵe la madzi, kunyumba kwa mfumu kwadzaza mantha.

⁷Mfumukazi yake yatengedwa ukapolo. Adzakazi ake akulira ngati nkhunda, ndipo akudzigunda pa chifuwa.

⁸Ninive wasanduka ngati chidziŵe, chimene madzi ake ali faa kutuluka. Ena akufuula kuti, “Imani! Imani!” Koma palibe amene akubwerera.

⁹Funkhani siliva! Funkhani golide! Chuma chake nchosatha, za mtengo wapatali nzosaŵerengeka.

¹⁰Mzinda wa Ninive waonongeka, wasanduka bwinja, wopanda anthu. Mitima yachokamo, maondo akuwombana, m'nkhongono muli zii, nkhope zasinthika ndi mantha.

¹¹Kodi tsopano mzinda uja uli kuti? Unali ngati phanga la mikango, m'mene ana ake ankadyeramo, m'mene mikango yonse inkakhala mopanda mantha.

¹²Mkango wamphongo unkapha nyama yokwanira mkango waukazi ndi ana ake. Unkadzaza phanga lakelo ndi nyama yokadzulakadzula.

¹³Chauta Wamphamvuzonse akuuza a ku Ninive kuti, “Ine sindikugwirizana nanu, ndidzakutentherani magaleta anu. Lupanga lidzakuwonongerani ankhondo anu amene ali ngati mikango. Ndidzakulandani zonse zimene mudafunkha pa dziko lapansi. Amithenga anu sadzamvekanso mau.”