Read Buku Loyera - Chichewa Nah. 3 Bible Online

Nah. 3 - Buku Loyera - Chichewa bible

Nah. 3

¹Tsoka kwa mzinda wokhetsa magazi a anthu ambiri, mzinda wodzaza ndi mabodza ndi zakuba, wokonda kufunkha mosalekeza.

²Imvani kulira kwa zikoti, kukokoma kwa mikombero, likitilikiti wa akavalo ndi kulilima kwa magaleta.

³Okwera pa akavalo akuthamanga, malupanga ali ŵaliŵali, mikondo ili phuliphuli. Afa anthu ambiri, mitembo yati vuu, yosaŵerengeka, anthu kumaphunthwa pa mitemboyo.

⁴Zonsezo zachitika chifukwa cha zonyansa zochuluka za Ninive, mkazi wachiwerewere uja. Ankakopa anthu ndi kukongola kwake konyenga. Ankanyengadi anthu a mitundu yonse ndi zadama zake nakopa mafuko ndi zithumwa zake.

⁵Chauta Wamphamvuzonse akunena kuti, “Ine sindikugwirizana nawe, ndidzakuvula ndi kukunyazitsa. Anthu a mitundu yonse adzaona maliseche ako, udzachita manyazi pamaso pa maiko onse.

⁶Ndidzakuthira zonyansa, ndidzakunyodola, ndipo ndidzakusandutsa chinthu chomachiseka.

⁷Ndipo onse okuwona adzakuthaŵa, adzati, ‘Ninive wasanduka bwinja, adzamlira ndani?’ Ndidzamtenga kuti woti akusangalatse?” Akuterotu Chauta.

⁸Kodi iwe Ninive ndiwe wopambana Thebesi? Suja mzinda umenewu unali m'mbali mwa mtsinje wa Nailo utazingidwa ndi madzi. Madziwo anali ngati khoma lake ndi linga lake?

⁹Mzindawo unkalamulira Etiopiya ndi Ejipito, mphamvu zake zinali zopanda malire. Aputi ndi Alibiya ndiwo ankagwirizana nawo.

¹⁰Komabe anthu a ku Thebesi adagwidwa, adasanduka akapolo. Ana ao adaŵakankhanthitsa pansi m'miseu yonse ya mumzindamo. Adani adagaŵana anthu otchukawo mwamaere. Akuluakulu onse adaŵamanga ndi maunyolo.

¹¹Iwenso Ninive udzachita ngati waledzera, mutu wako udzazungulira. Nawenso udzafunafuna malo othaŵirako.

¹²Malinga ako onse adzakhala ngati mitengo ya nkhuyu zoyamba kupsa. Akaigwedeza, nkhuyuzo zimagwera m'kamwa mwa wofuna kuzidya.

¹³Ankhondo ako ali ngati akazi. Zipata za dziko lako zaŵatsekukira adani ako, ndipo moto wapsereza mipiringidzo yake.

¹⁴Mutungiretu madzi kuti adzakwanire pa nthaŵi yokuzingani, limbitsani malinga anu. Pondani dothi, ponyani m'chikombole, ndipo muumbe njerwa.

¹⁵Ngakhale mutero, moto udzakupserezanibe, ndipo lupanga lidzakukanthani, mudzapululuka ngati dzombe. Swanani ngati dzombe, chulukanani ngati ziwala.

¹⁶Mudachulukitsa anthu anu amalonda kupambana nyenyezi zamumlengalenga. Koma onsewo adamwazikana ngati dzombe.

¹⁷Nduna zanu zili ngati dzombe. Akuluakulu anu ali ngati ziwala, zimene zimangokangamira pa khoma kukazizira. Koma dzuŵa likamatuluka, zimauluka, ndipo palibe ndi mmodzi yemwe amene amadziŵa kumene zapita.

¹⁸Iwe mfumu ya Aasiriya, nduna zako zaferatu. Akuluakulu ako apitiratu. Anthu ako amwazikira ku mapiri, ndipo palibe ndi mmodzi yemwe woŵasonkhanitsa.

¹⁹Palibe mankhwala a bala lako, chilonda chako sichingapole. Onse amene amamva za iwe, amaomba m'manja mokondwa. Kodi alipo wina amene sadazilaŵepo nkhanza zako zosathazi?