Read Buku Loyera - Chichewa Hab. 2 Bible Online

Hab. 2 - Buku Loyera - Chichewa bible

Hab. 2

¹Ndidzakhala ngati mlonda, woimirira pa linga. Ndidzaona zimene adzandiwuze, apo ndidzadziŵa zimene adzayankhe za dandaulo langa.

²Chauta adandiyankha kuti, “Lemba uthengawu, ulembe mooneka bwino pa mapale, kuti woŵerenga aŵerenge mosavuta.

³ Uthengawu ukudikira nthaŵi yake. Nthaŵi yakeyo idzabwera mofulumira, sizidzalephera kuchitika. Ngati ziwoneka kuti zikuchedwa, mudikire. Zidzafika ndithu, si kuchedwa ai.

⁴ Ochita zoipa adzalephera, koma ochita chifuniro cha Chauta adzakhala ndi moyo chifukwa cha kukhulupirika[1] kwake.

⁵Monga munthu wokhuta vinyo ali wosokonezeka, chonchonso munthu wodzitama ndi wosakhazikika. Ndi waumbombo kwambiri ngati manda, ngati imfa amakhala wosakhuta. Amagwira anthu a mitundu yonse, amaŵasonkhanitsa ngati ake.”

⁶Koma ogwidwawo adzamnyoza, adzamnyodola ponena kuti, “Tsoka kwa amene amadzikundikira chuma chosakhala chake, amene amalemera ndi ngongole zosalungama. Adzatero mpaka liti?”

⁷Angongolewo adzakuukira mwadzidzidzi. Adzakuchititsa mantha ndi kukulanda zako zonse.

⁸Chifukwa iweyo udafunkha mitundu yambiri ya anthu, koma otsala adzakufunkha iweyo, chifukwa chokhetsa magazi a anthu ambiri, ndiponso chifukwa choononga mwankhanza mizinda ndi onse okhalamo.

⁹Tsoka kwa amene amalemera ndi phindu lobera anzake, kuti akweze malo ake ndi kupewa zovuta.

¹⁰Udafuna kuwononga anthu a mitundu yambiri koma potero wachititsa manyazi banja lako, ndipo wataya moyo wako.

¹¹Ndi njerwa zomwe za nyumba yako zidzafuula chidzudzulo, ndipo mitanda idzathira mang'ombe ake.

¹²Tsoka kwa amene wamanga mzinda pokhetsa magazi, ndipo waukhazikitsa pozunza anthu.

¹³Koma Chauta Wamphamvuzonse ndiye watsimikiza kuti zimene anthu amagwirira ntchito zili ngati nkhuni pa moto. Anthu a mitundu yonse amangodzitopetsa popanda phindu.

¹⁴Motero anthu onse adzazindikira ulemerero wa Chauta kuti ndi wodzaza, monga momwe madzi amadzazira nyanja.

¹⁵Tsoka kwa amene amamwetsa anzake zaukali, amene amaŵaledzeretsa kuti aŵachititse manyazi.

¹⁶Koma amene udzachite manyazi ndiwe ndipo onse adzakunyoza kwambiri. Tsopano imwa ndiwe, mpaka kudzandira. Chikho cha chilango cha Chauta chikupeza, ndipo manyazi adzaphimba ulemerero wako.

¹⁷Udzachita mantha chifukwa cha kusakaza nkhalango za ku Lebanoni. Udzaopsedwa chifukwa cha kuwononga nyama zake. Wakhetsa magazi a anthu mwankhanza, waononga mizinda ndi onse okhalamo.

¹⁸Kodi phindu la fano nchiyani? Adalipanga ndi munthu. Ndi chifanizo chabe, ndipo nchinthu chonyenga. Munthu wopangayo amakhulupirira zimene wachita, koma mafano akewo satha nkulankhula komwe.

¹⁹Tsoka kwa amene amauza mtengo kuti, “Nyamuka!” Amene amauza mwala waduu kuti, “Dzuka!” Kodi zimenezi zingathe kulangiza? Nzopangidwa ndi golide ndi siliva, ndipo sizitha konse kupuma.

²⁰Koma Chauta ali m'Nyumba yake yoyera. Dziko lonse lapansi likhale chete pamaso pake.