Read Buku Loyera - Chichewa Hab. 3 Bible Online

Hab. 3 - Buku Loyera - Chichewa bible

Hab. 3

¹Pemphero la mneneri Habakuku potsata maimbidwe a Sigionoti.

²Inu Chauta, ndamva za mbiri yanu, Inu Chauta, ntchito zanu zandiwopsa. Muzichitenso masiku ano, zikhale zodziŵika makono. Ngakhale muli okwiya, musaiŵale chifundo chanu.

³Mulungu adabwera kuchokera ku Temani, Woyera uja adabwera kuchokera ku phiri la Parani. Ulemerero wake udaphimba mlengalenga, dziko lonse lapansi linkamutamanda.

⁴Adaŵala ngati dzuŵa, kunyezimira kunkatuluka m'manja mwake, m'mene adabisamo mphamvu zake.

⁵Kutsogolo kwake kudagwa mliri, kumbuyo kwake kudagwa nthenda yoopsa.

⁶Adaimirira ndipo dziko lapansi lidagwedezeka. Adayang'ana ndipo mitundu ya anthu idanjenjemera. Pomwepo mapiri okhazikika adagumuka, ndipo magomo akalekale adatera, njira zake nzachikhalire.

⁷Ndidaona anthu a ku Kusani ali pa mavuto, nawonso a ku Midiyani adaagwedezeka.

⁸Inu Chauta, kodi mudaakwiyira mitsinje? Kodi mudaakalipira mifuleni? Kodi mudaazazira nyanja? Mutakwera pa akavalo anu mudapambanitsa anthu anu pa nkhondo.

⁹Mudasolola uta wanu m'chimake, ndipo mudatulutsa mivi m'phodo lake. Mudang'amba dziko lapansi ndi mitsinje.

¹⁰Mapiri atakuwonani adayamba kugwedezeka. Madzi amphamvu am'mitsinje adasefukira. Nyanja yozama idakokoma, mafunde ake adakwera kwambiri.

¹¹Dzuŵa ndi mwezi zidangoti jega mu mlengalenga, zitaona kung'anipa kwa mivi yanu, ndi kunyezimira kwa mikondo yanu.

¹²Mudayendayenda m'dziko lapansi muli okwiya, mudapondereza anthu a mitundu yonse mwaukali.

¹³Mudapita kukapulumutsa anthu anu, mudabwera kudzalanditsa wodzozedwa wanu. Mudakantha mtsogoleri wa dziko la anthu oipa, mudaonongeratu anthu ake onse.

¹⁴Ndi mivi yanu mudalasa mtsogoleri wa ankhondo ake, amene adaabwera ngati kamvulumvulu kuti atibalalitse. Ankakondwerera ngati kuti akudzaononga osauka mwachinsinsi.

¹⁵Mudapondaponda pa nyanja ndi akavalo anu, ndipo madzi amphamvu adavwanduka.

¹⁶Izi ndazimva, ndipo thupi langa likunjenjemera, m'kamwa fuu chifukwa cha phokosolo. M'mafupa mwazizira, ndipo maondo akuwombana. Ndikudikira tsiku la chilango chimene chidzagwera amene akutithira nkhondo.

¹⁷Ngakhale mikuyu ipande kuchita maluŵa, mipesa ipande kukhala ndi mphesa, mitengo ya olivi ipande kubala zipatso, m'minda musatuluke kanthu, ndipo nkhosa ndi ng'ombe zithe m'khola,

¹⁸komabe kwanga nkukondwerera mwa Chauta, kwanga nkusangalala chifukwa cha Mulungu Mpulumutsi wanga.

¹⁹Ambuye anga, Chauta, ndiwo amandipatsa mphamvu. Amalimbitsa miyendo yanga kuti ikhale ngati ya mbaŵala, kuti ndikafike mpaka pamwamba pa phiri. Kwa Woimbitsa nyimbo. Aimbire zazingwe.