Read Buku Loyera - Chichewa Zef. 3 Bible Online

Zef. 3 - Buku Loyera - Chichewa bible

Zef. 3

¹Tsoka kwa Yerusalemu, mzinda wopanduka, wonyansa ndi wankhanza.

²Sudamvere mau ouchenjeza. Sudasamale mau oudzudzula. Sudakhulupirire Chauta kapena kuyandikira kwa Mulungu wake.

³Nduna zake zinkakhuluma m'kati mwake, ngati mikango yobangula. Oweruza ake anali ngati mimbulu yoyenda madzulo, yosasiyako ndi fupa lomwe kuti lifike mpaka m'maŵa.

⁴Aneneri ake anali achabechabe, anthu osakhulupirika.

⁵Koma Chauta ndi wolungama mumzindamo, Iyeyo salakwa. Amaweruza molungama tsiku ndi tsiku, nthaŵi zonse salephera, koma osalungama akuchitabe zoipa opanda manyazi.

⁶Chauta akuti, “Ndaononga mitundu yonse ya anthu ndipo malinga ao onse ankhondo ndaŵaphwasula. Miseu yao ndaifafaniza palibenso anthu oyendamo. Mizinda yao yachitika bwinja, mulibe munthu ndi mmodzi yemwe wotsalamo.

⁷Ndidaaganiza kuti ndithudi anthu anga andiwopa, kuti avomera malango anga, ndipo kuti saiŵala malamulo anga. Koma ndi pamene iwo adanyanyira kumachita zoipa pa zochita zao zonse.”

⁸Chauta akunena kuti, “Nchifukwa chake mundidikire, mudikire tsiku limene ndidzakuimbeni mlandu. Pakuti ndatsimikiza zosonkhanitsa mitundu ya anthu pamodzi ndi maufumu onse, kuti ndiŵaonetse kusakondwa kwanga amve ululu wa ukali wanga. Dziko lonse lapansi lidzapserera ndi moto waukali wa mkwiyo wanga.”

⁹“Pamenepo ndidzasintha malankhulidwe a mitundu yonse, nkuŵapatsa malankhulidwe abwino, kuti onse azitama dzina la Chauta mopemba ndi kumamtumikira mogwirizana.

¹⁰Ngakhale kutali kutsidya kwa mitsinje ya ku Etiopiya, anthu ondipembedza, anthu anga obalalika, adzapereka nsembe kwa Ine.”

¹¹“Tsiku limenelo inu a ku Yerusalemu simudzachitanso manyazi, chifukwa cha zoipa zonse zimene mudandichita, zimene mudandipandukira nazo. Pakuti nthaŵi imeneyo ndidzakuchotserani onse odzikuza ndi onyada. Simudzachitanso zonyada zanuzo pa phiri langa loyera.

¹²Pakati panu ndidzasiya anthu odzichepetsa ndi otsika. Iwowo adzafunafuna populumukira m'dzina la Chauta.

¹³Otsala a mu Israeleŵa sadzalakwanso, sadzalankhulanso zabodza, sadzachitanso zonyenga, Adzakhala pabwino mwamtendere, popanda wina woŵaopsa.”

¹⁴Imbani mokweza, inu anthu a ku Ziyoni! Fuulani inu Aisraele! Sangalalani, kondwani ndi mtima wonse, inu okhala mu Yerusalemu.

¹⁵Chauta wachotsa chilango chanu. Wapirikitsa adani anu. Chauta, Mfumu ya Israele, ali nanu pamodzi. Simudzaopanso choipa chilichonse.

¹⁶Tsiku limenelo adzauza Yerusalemu kuti, “Usaope, iwe Ziyoni, usataye mtima.

¹⁷Chauta, Mulungu wako, ali nawe pamodzi, ngati wankhondo wokuthandiza kugonjetsa adani. Adzasangalala ndi chimwemwe chifukwa cha iwe. Adzakubwezera m'chikondi chake. Adzakondwera nawe poimba nyimbo zachimwemwe.

¹⁸Monga pa masiku achikondwerero, ndidzakuchotsera tsoka, limene lingokuvutitsa ndi kukunyozetsa.

¹⁹Nthaŵi imeneyo ndidzaŵakhaulitsa onse amene amakuzunzani. Ndidzapulumutsa otayika ndi kusonkhanitsa onse obalalika. Ndidzaŵatamanda ndi kuŵapatsa ulemu, kulikonse kumene adani ao ankaŵachititsa manyazi.

²⁰Nthaŵi imeneyo ndidzakusonkhanitsani, Ndidzakubwezerani kwanu. Ndidzakusandutsani otchuka ndi olemekezeka, pakati pa anthu a mitundu yonse ya pa dziko lapansi. Ndidzakubwezerani ufulu wanu inu mukupenya. Ndatero Ine Chauta.”