Read Buku Loyera - Chichewa Zek. 10 Bible Online

Zek. 10 - Buku Loyera - Chichewa bible

Zek. 10

¹Pemphani Chauta kuti akupatseni mvula pa nyengo yobzala. Ndiye amene amapanga mitambo yamvula. Ndiye amene amagwetsera anthu mvula yamvumbi, ndiye amene amameretsera aliyense mbeu m'munda.

² Paja mafano am'nyumba amalankhula zonama, ndipo oombeza maula amaona zabodza. Olota maloto amalota zabodza, ndipo mau ao othuzitsa mtima ndi nkhambakamwa chabe. Motero anthu amangoyenda uku ndi uku ngati nkhosa, amazunzika chifukwa chosoŵa mbusa.

³Chauta akuti, “Ndaŵakwiyira kwambiri abusa, ndipo atsogoleri a m'dzikomo ndidzaŵalanga. Koma Ine Chauta Wamphamvuzonse ndidzasamala nkhosa zanga, ndiye kuti banja la Yuda, ndipo ndidzazisandutsa ngati akavalo ankhondo amphamvu.

⁴Mwa iwo mudzatuluka mtsogoleri amene adzakhala ngati mwala wapangodya, ngati uta wankhondo. Ndipo atsogoleri onse olamulira adzachokeranso mwa iyeyo.

⁵Ayuda onse pamodzi adzakhala ngati ngwazi zankhondo, zopondereza adani m'matope am'miseu nthaŵi yankhondo. Adzamenya nkhondo chifukwa choti Chauta ali nawo, ndipo adzagonjetsa adani okwera pa akavalo.

⁶“Banja la Yuda ndidzalilimbitsa, banja la Yosefe ndidzalipambanitsa. Anthuwo ndidzaŵabwezanso kwao chifukwa choti ndaŵamvera chifundo. Tsono adzakhala ngati kuti sindidaŵataye, pakuti Ine ndine Chauta, Mulungu wao, ndipo ndidzayankha zopempha zao.

⁷Pamenepo Aefuremu adzakhala ngati ankhondo amphamvu, adzasangalala ngati anthu okhuta vinyo. Ana ao adzaziwona zimenezi, nawonso nkusangalala, mumtima mwao mudzadzaza chimwemwe, chifukwa cha zimene Chauta wachita.

⁸“Ndidzaliza mluzu kuti anthu anga asonkhane pamodzi. Ndidaŵapulumutsa, ndipo adzachuluka monga momwe adaaliri masiku amakedzana.

⁹Ngakhale ndidaŵabalalitsira pakati pa mitundu ya anthu, komabe ku maiko akutaliwo adzandikumbukira. Iwowo pamodzi ndi ana ao adzakhala moyo nadzabwerera.

¹⁰Ndidzaŵatulutsa ku Ejipito ndi kupita nawo kwao, ndipo ndidzaŵasonkhanitsa kuchokera ku Asiriya. Ndidzaŵafikitsa ku dziko la Giliyadi ndi la Lebanoni mpaka kudzaza dziko lonse.

¹¹Pamene azidzaoloka nyanja ya ku Ejipito, ndidzathetsa mafunde a pa nyanjayo, madzi onse a mtsinje wa Nailo adzaphweratu. Kudzikuza kwa Asiriya kudzatha, ndipo ndodo yaufumu ya Ejipito idzathyoka.

¹²Ineyo ndidzalimbitsa anthu anga, ndipo adzakhala onyadira dzina la Chauta.” Ndikutero Ine Chauta.