Read Buku Loyera - Chichewa Zek. 8 Bible Online

Zek. 8 - Buku Loyera - Chichewa bible

Zek. 8

¹Chauta Wamphamvuzonse adandipatsanso uthenga uwu wakuti,

²“Zimene ndikunena Ine Chauta Wamphamvuzonse ndi izi: Mtima wanga wonse uli pa Ziyoni, anthu ake ndimaŵakonda mwansanje kwambiri.

³Ine Chauta Wamphamvuzonse mau anga ndi aŵa: Tsopano ndidzabweranso ku phiri la Ziyoni, ndidzakhalanso ku Yerusalemu. Yerusalemuyo adzatchedwa Mzinda Wokhulupirika. Phiri la Ine Chauta Wamphamvuzonse lidzatchedwa Phiri Loyera.

⁴“Ine Chauta Wamphamvuzonse ndikunena kuti, amuna ndi akazi okalamba, oyenda ndi ndodo chifukwa cha ukalamba, adzayendanso m'miseu ya Yerusalemu.

⁵Ndipo m'miseu ya mumzindamo mudzadzaza ndi ana, anyamata ndi atsikana, amene azidzaseŵeramo.

⁶“Ine Chauta Wamphamvuzonse mau anga ndi aŵa: Ngakhale ziwoneke ngati zosatheka kwa anthu a m'fuko limeneli amene adzatsale nthaŵi imeneyo, kodi zimenezi zidzakhalanso zosatheka ndi kwa Ine ndemwe?

⁷“Ine Chauta Wamphamvuzonse ndikunena kuti, Ndidzapulumutsa anthu anga amene ali ku maiko akuvuma ndi akuzambwe.

⁸Ndidzaŵabweza kuti akhalenso ku Yerusalemu. Pamenepo adzakhala anthu anga, ndipo Ine ndidzakhala Mulungu wao, wokhulupirika ndi wolungama.

⁹“Zimene ndikunena Ine Chauta Wamphamvuzonse ndi izi: Inu masiku ano mukumva mau a aneneri amene ankalankhula pa nthaŵi yoyala maziko a Nyumba ya Chauta Wamphamvuzonse. Choncho limbani mtima, kuti Nyumbayi imangidwenso.

¹⁰Mpaka nthaŵi imeneyo panalibe wina wolandirapo malipiro pa ntchito kapena wopindulapo pa zoŵeta. Panalibe munthu amene ankadziyendera mwamtendere, chifukwa cha adani, popeza kuti anthu onse ndidaaŵayambanitsa.

¹¹Koma tsopano anthu atsalaŵa sindidzaŵachitanso zomwe ndidaaŵachita anthu kale. Ndikutero Ine Chauta Wamphamvuzonse.

¹²“Adzabzala mwamtendere, mpesa udzabala zipatso zake, ndipo nthaka idzabereka kwambiri. Mvula idzagwa kuchokera kumwamba. Madalitso onseŵa ndidzaŵapatsa otsala mwa anthuŵa.

¹³Inu mabanja a Yuda ndi Israele, kale munali chizindikiro cha matemberero pakati pa mitundu ina ya anthu. Koma tsopano ndidzakupulumutsani ndipo mudzakhala chizindikiro cha madalitso. Musaope, limbani mtima.

¹⁴“Ine Chauta Wamphamvuzonse mau anga ndi aŵa: Paja ndidaatsimikiza mtima kuti ndikuwonongeni, chifukwa chakuti makolo anu adaandikwiyitsa, ndipo sindidafune kukhululuka. Ndikutero Ine Chauta Wamphamvuzonse.

¹⁵Koma masiku ano ndatsimikiza kuti ndimchitira zabwino Yerusalemu ndi banja la Yuda. Choncho musaope.

¹⁶ Muzichita izi: muzikambirana zoona, muziweruza moona ndi mwamtendere m'mabwalo a milandu.

¹⁷Musamachitirane chiwembu, musamakonde kulumbira zonama, pakuti zonsezi ndimadana nazo.” Ndikutero Ine Chauta.

¹⁸Chauta Wamphamvuzonse adandipatsa uthenga uwu wakuti, “Ine Chauta Wamphamvuzonse mau anga ndi aŵa:

¹⁹Kusala zakudya pa mwezi wachinai, wachisanu, wachisanu ndi chiŵiri ndi wakhumi, kudzakhala nthaŵi yachimwemwe ndi yachisangalalo ku banja la Yuda. Muzikonda zoona ndiponso mtendere.”

²⁰“Zimene ndikunena Ine Chauta Wamphamvuzonse ndi izi: Anthu a mitundu yambiri ndi anthu okhala m'mizinda yambiri adzabweradi.

²¹Anthu a mzinda wina adzapita ku mzinda wina, kukanena kuti, ‘Tiyeni mwamsanga tikapemphe chifundo kwa Chauta, tikapembedze Chauta Wamphamvuzonse. Ifeyo tikupita komweko.’

²²Anthu ambiri ndiponso a ku maiko amphamvu adzandipembedzadi Ine Chauta Wamphamvuzonse ku Yerusalemu ndi kupempha chifundo changa.

²³“Ine Chauta Wamphamvuzonse ndikunena kuti, pa masiku amenewo anthu khumi ochokera ku mitundu ya anthu a zilankhulo zosiyana adzagwira mkanjo wa Myuda ndi kunena kuti, ‘Tipite nao, chifukwa tamva kuti Mulungu ali nanu.’ ”