Read Buku Loyera - Chichewa 1 Am. 1 Bible Online

1 Am. 1 - Buku Loyera - Chichewa bible

1 Am. 1

¹Aleksandro, mwana wa Filipo wa ku Masedoniya, wofumira ku dziko la Kitimu, adapambana Dariusi, mfumu ya ku Persiya ndi Mediya pa nkhondo, nakhala mfumu m'malo mwake. Nthaŵiyo nkuti atayamba kale kulamulira dziko la Grisi.

²Adamenya nkhondo zambiri, nalanda mizinda yambiri yamalinga, ndipo adapha mafumu ambiri m'maikomo.

³Adakafika mpaka ku malire a dziko la pansi pano nalanda chuma chambiri cha mitundu ya anthu. Tsono dziko lapansi litakhala phee kugonjera ulamuliro wake, iyeyo adayamba kunyada ndi kutukumuka mtima.

⁴Adasonkhanitsa gulu lankhondo lamphamvu kwambiri, ndipo adagonjetsa maiko, mafuko ndi mafumu ochuluka namaŵakakamiza kukhoma msonkho kwa iye.

⁵Pambuyo pake adadwala, nkuzindikira kuti ali pafupi kufa.

⁶Adaitana nduna zake zolemekezeka, ndiye kuti abwenzi ake amene adaakulira nawo pamodzi, ndipo adaŵagaŵira ufumu wake iye akali moyo.

⁷Adakhala mfumu zaka khumi ndi ziŵiri, naafa.

⁸Tsono iye atafa, nduna zake zidaloŵa ufumu, iliyonse m'dera lake.

⁹Nduna zonsezo zidavala zisoti zaufumu, ndipo pa zaka zambiri ana ao adaloŵa ufumu m'malo mwao. Iwoŵa adabweretsa zoipa zambiri pa dziko lapansi.

¹⁰Mwa mafumuwo mudafumira wina woipa zedi, dzina lake Antioko Epifane, mwana wa mfumu Antioko. Poyamba adaali m'kaidi ku Roma ngati chigwiriro, pambuyo pake nkukhala mfumu, chaka cha 137 cha ufumu wa Agriki.

¹¹Pa masiku amenewo, pakati pa Aisraele padapezeka ena onyoza Malamulo, ndipo adayamba kukopa anzao ambiri. Ankati, “Tiyeni tikachite nawo chipangano anthu a mitundu ina amene tayandikana nawoŵa, chifukwa kuyambira nthaŵi imene tidapatukana nawo, takhala tikupeza mavuto ambiri.”

¹²Zimene ankanenazo anthuwo zidaŵakomera.

¹³Ena mwa iwo, amene ankafunitsitsa zimenezo, adapita kwa mfumu kukafotokoza. Mfumuyo idaŵalola kutsata miyambo ya anthu a mitundu inayo.

¹⁴Tsono ku Yerusalemu adamanga bwalo lamaseŵera, potsata mwambo wa mitundu inayo.

¹⁵Anthu aja adabisa chizindikiro cha kuumbalidwa kwao, nasiya chipangano choyera chija. Motero adagwirizana ndi akunja aja nkudzipereka ku zoipa.

¹⁶Ataona kuti ufumu wake walimba, Antioko adaganiza zokhala mfumu ya ku Ejipito, kuti azilamulira kumeneko monga ankachitira ku Siriya.

¹⁷Choncho adasonkhanitsa gulu lankhondo lamphamvu, lokhala ndi magaleta, njovu, okwera pa akavalo ndiponso mabwato ambiri, nkukathira nkhondo dziko la Ejipito.

¹⁸Atayamba kumenyana nkhondo ndi Ptolemeyo, mfumu ya ku Ejipito, Ptolemeyoyo adabwerera m'mbuyo nathaŵa, ndipo anthu ambirimbiri adaphedwa.

¹⁹Asiriya adagonjetsa mizinda yamalinga ya ku Ejipitoko nalanda chuma chonse cha m'dzikolo.

²⁰Atagonjetsa dziko la Ejipito chaka cha 143, Antioko pobwerera kwao, adapita ndi gulu lalikulu la asilikali kukathira nkhondo Aisraele ku Yerusalemu.

²¹Adaloŵa m'Nyumba ya Mulungu modzikuza, natenga guwa lansembe lagolide, choikaponyale ndi ziŵiya zake zonse.

²²Adalandanso tebulo la Buledi woperekedwa pamaso pa Mulungu, zikho zopatulika ndi mbale zina zagolide, zofukizira zagolide, nsalu zochingira ndiponso zisoti zaulemu. Adachotsanso makaka onse agolide amene anali kumaso kwa Nyumba ya Mulungu.

²³Adalanda siliva, golide ndi ziŵiya zamtengowapatali, ndiponso chuma chonse chobisika chimene adachipeza.

²⁴Zonsezo adapita nazo ku dziko lakwao. Adapha anthu ambiri, nkumanena mau achipongwe kwambiri ndi onyada.

²⁵Kunali maliro aakulu ku Israele konse,

²⁶Mafumu ndi akuluakulu adabuula ndi chisoni. Anyamata ndi atsikana adafooka ndipo akazi kukongola kwao kudatha.

²⁷Mkwati wamwamuna aliyense adavala zachisoni. Mkwati wamkazi adabindikira ndi chisoni m'chipinda mwake.

²⁸Dziko lonse lidanjenjemera modera nkhaŵa anthu ake, ndipo banja lonse la Yakobe lidachita manyazi aakulu.

²⁹Patapita zaka ziŵiri, mfumu idatumiza kapitao wa msonkho ku mizinda ya Yuda, ndipo adakafika ku Yerusalemu ndi gulu lankhondo.

³⁰Kumeneko adaanena mau ake amtendere, koma achinyengo. Ataŵapusitsa choncho anthuwo, adauthira nkhondo mzindawo. Adaukantha moopsa, napha anthu ambiri.

³¹Tsono adafunkha mzindawo nautentha. Adagwetsa nyumba ndi malinga mbali zonse.

³²Akazi ndi ana adaŵatenga kunka nawo ku ukapolo, ndipo adalanda ziŵeto zonse.

³³Pambuyo pake adamanganso mzinda wa Davide nauzinga ndi chikhoma chachikulu ndi nsanja zolimba, nukhala boma lankhondo.

³⁴Adakhazikamo anthu ochita zoipa, Ayuda osiya chipembedzo chao.

³⁵Adadzitchinjiriza m'bomamo nasonkhanitsamo zida zankhondo, ndi chakudya. Zonse zimene adaazifunkha ku Yerusalemu adaziika kumeneko. Potero adachita ngati kutcha msampha woopsa.

³⁶Adasanduka olalira Nyumba ya Mulungu adani oipa mtima olimbana ndi Aisraele nthaŵi zonse.

³⁷Adapha anthu osalakwa ponse pozungulira Nyumba ya Mulungu. Adaipitsa ndi malo oyera omwe.

³⁸Anthu a ku Yerusalemu adathaŵa, kuwopa iwowo, motero mzindawo udasanduka malo a anthu achilendo. Udasanduka wachilendo kwa zidzukulu zake, ndi ana ake omwe adauthaŵa.

³⁹Nyumba yake ya Mulungu idasanduka ngati chipululu. Masiku ake achikondwerero adasanduka amaliro. Masiku ake a Sabata adasanduka onyozeka, ndipo ulemerero wake udasanduka manyazi.

⁴⁰Manyazi ake anali aakulu monga momwe udaaliri ulemerero wake, chimwemwe chake nkusanduka chisoni.

⁴¹Pambuyo pake mfumu idakhazikitsa lamulo m'dziko lake lonse, lakuti anthu ake onse akhale amodzi,

⁴²onse asiye miyambo imene inali yaoyao.

⁴³Tsono anthu a mitundu ina adalivomera lamulo la mfumulo. Ndipo ngakhale anthu ambiri a ku Israele nawonso adayamba kutsata chipembedzo chachilendo, namapereka nsembe ku mafano, nkuipitsa tsiku la Sabata lomwe.

⁴⁴Kenaka mfumu idatuma amithenga ku Yerusalemu ndi ku midzi ya ku Yudeya kukapereka makalata. Idaŵalamula kuti azitsata miyambo ina, yokhala yachilendo kwa anthu am'dzikomo.

⁴⁵Idaŵaletsa kuti asamaperekenso nsembe zopsereza, nsembe zaufa ndi nsembe zazakumwa ku Nyumba ya Mulungu.

⁴⁶Idaŵaletsanso kulemekeza masiku a Sabata ndi masiku achikondwerero, nkuŵalamula kuti aipitse Nyumba ya Mulungu ndi atumiki ake.

⁴⁷Idaŵalamula kumanga maguwa, akachisi ndi nyumba zopembedzeramo mafano, kupereka nsembe za nkhumba ndi nyama zina zonyansa pa chipembedzo.

⁴⁸Idaŵalamulanso kuti ana ao asamaumbalidwe, ndipo kuti iwo iwowo azidziipitsa mwa njira iliyonse,

⁴⁹kuti choncho aiŵale Malamulo ndi kusintha miyambo yao yonse.

⁵⁰Ndipo idanena kuti aliyense wosamvera lamulo la mfumulo adzaphedwa.

⁵¹Mfumu idalemba malamulo onsewo kulembera anthu onse a m'dziko lake. Idatuma akapitao kuti azikatsatsitsa anthu onsewo malamulowo. Idalamulanso anthu a m'mizinda ya ku Yuda kuti azipereka nsembe ku mafano mu mzinda uliwonse.

⁵²Choncho Ayuda ambiri adasiya Malamulo aja nayamba kugwirizana ndi anthu otsata zachilendowo, nkumachita zoipa m'dziko.

⁵³Makhalidwe oipawo adaumiriza Aisraele oona kuti athaŵe ndi kukabisala ku malo osiyanasiyana.

⁵⁴Tsiku la 15 la mwezi wa Kisilevi, chaka cha 145, mfumu idamanga chosakaza chonyansa pa guwa la nsembe zopsereza. Anthu aja adamanganso maguwa a mafano m'mizinda ya ku Yuda ndi m'midzi yake.

⁵⁵Ankafukiza lubani m'makomo a nyumba ndi m'miseu.

⁵⁶Mabuku onse a Malamulo amene adaaŵapeza, adaŵang'amba nkuŵatentha.

⁵⁷Potsata chilamulo cha mfumu, aliyense amene wapezeka ali ndi Buku la Chipangano, kapena akutsata Malamulo, ankamupha.

⁵⁸Mwezi ndi mwezi ankazunza Aisraele amene ankaŵagwira m'mizinda.

⁵⁹Tsiku la 25 la mwezi, ankapereka nsembe pa guwa la nsembe zopsereza lija.

⁶⁰Potsata chilamulo cha mfumu, akazi onse amene ankaumbalitsa ana ao ankaŵapha,

⁶¹ataŵakoleka ana aowo m'khosi, kenaka nkupha anthu a m'banja mwao ndi amene adaŵaumbala.

⁶²Komabe Aisraele ambiri ankalimba mtima, nkumakana kudya chakudya chonyansa pa chipembedzo.

⁶³Ankavomera kufa, osafuna kudziipitsa ndi chakudya chonyansa kapena kuphwanya chipangano choyera. Motero ankaphedwadi.

⁶⁴Unalidi waukulu mkwiyo wa Mulungu umene udaaŵagwera Aisraele.