Read Buku Loyera - Chichewa 1 Am. 10 Bible Online

1 Am. 10 - Buku Loyera - Chichewa bible

1 Am. 10

¹Chaka cha 160, Aleksandro, mwana wa Antioko[6] wotchedwa Epifane, adanyamuka nakalanda Ptolemaisi. Anthu akumeneko adamulandira bwino ndipo adamulonga ufumu, iye nkumalamulira.

²Mfumu Demetriyo atamva zimenezo, adasonkhanitsa gulu lankhondo lamphamvu, napita kukakumana naye kuti amenyane naye nkhondo.

³Nthaŵiyo Demetriyo adatumizira Yonatani kalata ndi mau amtendere ndi omutamanda kwambiri.

⁴Anali ndi maganizo akuti, “Tifulumire kupangana naye za mtendere, asanapangane ndi Aleksandro zakuti amthandize kumenyana nafe.”

⁵Demetriyo ankaopa kuti Yonatani adzakumbukira zoipa zonse zimene adaamchita iyeyo, abale ake ndi anthu a mtundu wake.

⁶Choncho adaloleza Yonatani kulemba asilikali ndi kupanga zida zankhondo ndi kukhala bwenzi lake, ndipo adalamula kuti amubwezere akaidi otsekeredwa m'boma lankhondo lija.

⁷Yonatani adapita ku Yerusalemu naŵerenga kalatayo pamaso pa anthu onse ndi pa ankhondo okhala m'boma lankhondo.

⁸Onse adachita mantha aakulu, atamva kuti mfumu wapatsa Yonatani chilolezo cha kulemba ankhondo.

⁹Anthu okhala m'boma lankhondowo adabwezera akaidi aja kwa Yonatani, ndipo iye adaŵapereka kwa abale ao.

¹⁰Yonatani adakhala ku Yerusalemu nayamba kumanganso ndi kukonza mzindawo.

¹¹Adalamula antchito kutenga miyala yosema ndi kumanganso makoma ndi malinga ozinga phiri la Ziyoni, kuti aŵalimbitse, ndipo ntchitoyo idachitikadi.

¹²Tsono achilendo onse okhala m'malinga omangidwa ndi Bakide aja adathaŵa.

¹³Aliyense adasiya malo ake nabwerera ku dziko lakwao.

¹⁴Ku Betizure kokha kudaatsala ena opatukana ndi Malamulo, popeza kuti pa malo amenewo padaasanduka pothaŵira anthu ochimwa.

¹⁵Tsono mfumu Aleksandro adaazimva zonse zimene Demetriyo adaalonjeza kupatsa Yonatani. Anthu enanso adamfotokozera za nkhondo za Yonatani ndi za abale ake ndi za zochita zao zachamuna, ndiponso za zovuta zimene adazipirira.

¹⁶Apo Aleksandro adafunsa kuti, “Kodi tingapeze munthu wina aliyense wofanafana naye? Tsono tifulumire kuchita naye chibwenzi ndi kukhala ogwirizana naye.”

¹⁷Choncho adamtumizira kalata, mau ake anali otere:

¹⁸“Ndine, mfumu Aleksandro ndi kupereka moni kwa mbale wanga Yonatani.

¹⁹Tamva za inu kuti ndinu munthu wamphamvu ndi woyenera kukhala bwenzi lathu.

²⁰Nchifukwa chake tikukusankhulani lero lomwe kuti mukhale mkulu wa ansembe onse pa mtundu wanu, ndipo tikukutchulani Bwenzi la Mfumu.” Tsono nthaŵi yomweyo adamtumizira mkanjo wofiirira ndi chisoti chaufumu chagolide. Ndipo adati, “Muzithandizana nafe, ndipo muchisunge chibwenzi chathuchi.”

²¹Yonatani adavala mkanjo waunsembe uja pa mwezi wachisanu ndi chiŵiri wa chaka cha 160, pa tsiku la chikondwerero cha mahema. Ndipo adalemba magulu ena a asilikali, napanganso zida zambiri.

²²Demetriyo atamva zimene zidaachitikazo, adamva chisoni.

²³Adafunsa kuti, “Ife tachitapo chiyani pamenepa? Aleksandro wayamba ndiye kupalana chibwenzi ndi Ayuda, kuti alimbitse mphamvu zake?

²⁴Inenso ndifuna kulemba mau oŵakopa ndi kuŵalonjeza ulemu ndi mphatso, kuti iwowo andipatse chithandizo chao.”

²⁵Tsono adaŵalembera kalata yonena kuti, “Ndine, mfumu Demetriyo, ndikukulonjerani inu mtundu wa Ayuda onse.

²⁶Tamva m'mene mwasungira zimene mudapangana nafe ndi kulimbitsa chibwenzi chathu, osayanjana ndi adani athu. Ndipo ife takondwa nazo kwambiri.

²⁷Tsopano musaleke kutikhulupirira. Tidzalipira ntchito zimene mukutigwirira pokupatsani zaufulu.

²⁸Zoonadi, tikuchotserani misonkho yambiri, ndipo tidzakupatsani mphatso.

²⁹Kuyambira lero, ndapatsa ufulu kwa Ayuda onse kuti asakhome msonkho wa mchere ndi misonkho inanso. Chigawo chachitatu cha dzinthu dza m'munda,

³⁰ndi hafu la zipatso zimene zikadayenera kukhala zanga, ndikusiyirani lero, sindidzazisonkhanitsanso ku dziko la Ayuda ndi ku madera atatu oyandikana nalo ochoka ku Samariya ndi ku Galileya.

³¹Ndifuna kuti Yerusalemu ukhale mzinda woyera ndi waufulu pamodzi ndi dziko lake lonse. Ndikufuna kuti kumeneko kusakhale msonkho kapena zachikhumi ai.

³²Ifeyo tituluka m'chinyumba chankhondo cha ku Yerusalemu, ndipo ndikuchipereka kwa mkulu wa ansembe, kuti aziikamo ankhondo amene iye yemwe azidzaŵasankhula kuti achilonde.

³³Ayuda onse amene ndidaŵachotsa ku dziko la Yudeya kuti akhale akapolo m'dziko langa lonse, ndikuŵamasula onse mwaulere. Ndikufunanso kuti msonkho wa ziŵeto uthere pomwepa.

³⁴“Zamasiku a chikondwerero chilichonse, cha masabata, cha pokhala mwezi, ndi cha pa masiku oyera[7], ndiponso za masiku atatu okonzekera ndi masiku atatu otsata chikondwerero chilichonse, kwa Ayuda onse okhala m'dziko langa masiku amenewo akhale masiku osakhoma msonkho ndi opezera ufulu.

³⁵Pa masiku amenewo palibe ndi mmodzi yemwe adzathe kuŵakakamiza kubwezera ngongole, kapena kuŵavuta ndi mlandu wina uliwonse.

³⁶Tidzaloŵetsa Ayuda m'gulu lankhondo la mfumu okwanira chiŵerengero cha 30,000, ndipo adzalandira malipiro omwe amalandira asilikali a mfumu.

³⁷Ena mwa iwo adzaŵakhazikitsa m'malinga ankhondo aakulu a mfumu. Ena adzalandira ntchito zapamwamba zimene timapatsa anthu okhulupirika a m'dziko mwathu. Enanso adzakhala atsogoleri olamulira pa magulu ao ankhondo. Onse azidzatsata malamulo ao monga mfumu idalamulira m'dziko la Yudeya.

³⁸“Zamadera atatu a ku Samariya oyandikana ndi Yudeya aja, maderawo adzakhala ophatikana ndi Yudeyayo, nkusanduka ngati dziko limodzi. Motero adzatsata mfumu imodzi, sadzamveranso wina, koma mkulu wa ansembe yekha.

³⁹Ndapereka ngati mphatso ku Nyumba ya Mulungu ya ku Yerusalemu mzinda wa Ptolemaisi ndi midzi yake yozungulira, kuti papezekeko ndalama zofunikira pa chipembedzo.

⁴⁰Ndipo ineyo chaka chilichonse ndidzapereka ndalama zasiliva 15,000. Adzazitapa pa msonkho wa mfumu ku malo oyenera.

⁴¹Ndalama zina zimene zidaayenera kuperekedwa kale, koma sadazipereke, zonsezo adzazipereka tsopano ku ntchito za ku Nyumba ya Mulungu.

⁴²Ndipo ndalama zasiliva 5,000 zimene okhometsa msonkho anga ankasonkha chaka chilichonse pa zopereka zonse zimene anthu ankabwera nazo ku Nyumba ya Mulungu, sadzazitenganso ai, chifukwa ndi za ansembe ogwira ntchito komweko.

⁴³Aliyense wothaŵira m'Nyumba ya Mulungu ya ku Yerusalemu kapena m'zipinda zake, chifukwa chosakhoma msonkho, kapena chifukwa cha ngongole ina iliyonse, adzakhala paufulu ndipo zabwino zonse zimene ali nazo m'dziko mwathu palibe munthu adzazikhudza.

⁴⁴“Ndalama zofunika kuti amangire Nyumba ya Mulungu kapena kuikonza, adzazitapa pa msonkho wa mfumu.

⁴⁵Ndalama zofunika kuti amangenso makoma a Yerusalemu ndi kulimbitsa malinga ake, ndiponso zofunika kuti amangenso malinga a mizinda ya ku Yudeya, zonsezo adzazitapanso pa msonkho wa mfumu.”

⁴⁶Yonatani ndi anthu atamva mauwo, sadafune kuŵalandira ndi kuŵavomera, chifukwa adaakumbukira zoipa zazikulu zimene mfumu Demetriyo adaaŵachita Aisraele ndi misonkho yolemetsa imene adaaŵalamula.

⁴⁷Iwo adasankhula kutsata Aleksandro amene anali woyamba kuŵauza anthu mau amtendere. Motero adakhala nthaŵi zonse ogwirizana nawo.

⁴⁸Mfumu Aleksandro adasonkhanitsa magulu aakulu ankhondo, nakamanga zithando zake zankhondo kuyang'anana ndi za Demetriyo.

⁴⁹Tsono mafumu aŵiriwo atayamba kumenyana nkhondo, ankhondo a Demetriyo adathaŵa, ndipo Aleksandro adaŵalondola naŵagonjetsa.

⁵⁰Adamenya nkhondo ndi mphamvu mpaka dzuŵa kuloŵa, ndipo Demetriyo adaphedwa pa tsikulo.

⁵¹Aleksandro adatuma amithenga kwa Ptolemeyo, mfumu ya ku Ejipito, kukamuuza kuti,

⁵²“Ndaloŵanso m'dziko langa ndipo ndakhalanso pa mpando waufumu wa makolo anga. Boma lili m'manja mwanga, dziko lonse ndikulamulira ndine.

⁵³Demetriyo ndidamthira nkhondo, ndidamgonjetsa iyeyo ndi ankhondo ake, motero dziko lake ndidalanda.

⁵⁴Ndiye inu tsopano tipalane chibwenzi. Mundipatse mwana wanu wamkazi kuti ndimkwatire. Ndidzakhala mkamwini wanu, ndipo ndidzakupatsani inu pamodzi ndi iyeyo mphatso zoyenerera ukulu wanu.”

⁵⁵Mfumu Ptolemeyo adayankha kuti, “Nlodala tsiku limene mudabwereranso ku dziko la makolo anu ndi kukhala pa mpando wao waufumu.

⁵⁶Tsopano ndidzakuchitirani zomwe mwalemba m'kalata mwanu. Koma bwerani tikumane ku Ptolemaisi, ndipo mudzakhaladi mkamwini wanga monga mwanenera.”

⁵⁷Pa chaka cha 162 Ptolemeyo adanyamuka ku Ejipito, pamodzi ndi mwana wake wamkazi Kleopatra, kupita ku Ptolemaisi.

⁵⁸Mfumu Aleksandro adabwera kudzakumana naye Ptolemeyo, ndipo Ptolemeyoyo adampatsa mwana wake wamkazi Kleopatra. Adachita madyerero aukwati ku Ptolemaisi pa chaka cha 162 ndi ulemu waukulu, monga chinaliri chizoloŵezi cha mafumu.

⁵⁹Mfumu Aleksandro adalembanso ina kalata kwa Yonatani yomuitana.

⁶⁰Yonatani adanka ndi ulemu ku Ptolemaisi, kumeneko adaonana nawo mafumu aŵiriwo. Adapereka kwa iwo ndi kwa abwenzi ao siliva ndi golide ndi mphatso zina zambiri, motero adapeza kuyanja pamaso pao.

⁶¹Nthaŵi yomweyo anthu ena oipa a ku Israele adadza kwa mfumu kuti amneneze. Koma mfumu sidalabadeko za iwowo.

⁶²Mfumu idalamula kuti amuvule Yonatani zovala zake ndi kumuveka zovala zofiirira. Adaterodi.

⁶³Tsono mfumu idamkhazika pa mpando pafupi naye, nkuuza nduna zake kuti, “Pita nayeni pakatikati pa mzinda, muzikalengeza kuti pasapezeke munthu ndi mmodzi yemwe wodzamneneza pa nkhani iliyonse, pasapezekenso wina womuvuta.”

⁶⁴Omneneza aja atangoona ulemu umene Yonatani adaaulandira, potsata zolengeza zija, nkuwonanso zovala zofiirira zija zili m'thupi, adathaŵa.

⁶⁵Mfumu idaonjeza pa ulemuwo pakumuika m'gulu la abwenzi ake apamtima, ndipo adamsankha kuti akhale mtsogoleri wamkulu wa ankhondo ndiponso bwanamkubwa m'chigawo chake.

⁶⁶Yonatani adabwerera ku Yerusalemu ali ndi mtendere ndi chimwemwe.

⁶⁷Chaka cha 165, Demetriyo wachiŵiri, mwana wa Demetriyo woyamba, adanyamuka ku Krete, nabwera ku dziko la makolo ake.

⁶⁸Atamva zimenezo, mfumu Aleksandro adavutika mu mtima, nabwerera ku Antiokeya.

⁶⁹Demetriyo adakhazika Apoloniyo kuti akhale bwanamkubwa wa Celesiriya. Apoloniyoyo adasonkhanitsa gulu lalikulu lankhondo, nadzamanga zithando zake zankhondo pafupi ndi Yaminiya. Adatumizira Yonatani mau akuti,

⁷⁰“Ndiwe wekhatu amene ukutichita ife chiwembu, ndipo ine ndasanduka wosekedwa ndi wonyozedwa chifukwa cha iwe. Chifukwa chiyani ukutiwukirabe, pamene uli wekhawekha kumapiri kuno?

⁷¹Tsopano ngati ukukhulupirira mphamvu zakozo, tsika kumeneko, udzakumane nane kuchigwa kuno, tidzayesane, chifukwa ine ndili ndi ankhondo a ku mizinda.

⁷²Ufunse kuti udziŵe za ine ndi za enawo amene amatithandiza. Anthuwo adzakuuza kuti sungathe kulimbana nafe, popeza kuti makolo ako tidaŵagonjetsa kaŵiri kudziko kwao komwe.

⁷³Ndiye kuti sudzatha kulimbana ndi asilikali anga okwera pa akavalo ndi asilikali ena ambirimbiri oyenda pansi, ku chigwa kuno kumene kulibe matanthwe kapena miyala kapena malo ena aliwonse othaŵirako.”

⁷⁴Yonatani atamva mau a Apoloniyoyo, adapsa mtima kwabasi. Adasankhula anthu 10,000 nanyamuka ku Yerusalemu. Mbale wake Simoni adabwera kudzamthandiza.

⁷⁵Adamanga zithando zankhondo pafupi ndi Yopa. Koma anthu akumeneko adaŵatsekera zipata za mzinda, chifukwa kumeneko kunali kaboma kankhondo ka Apoloniyo. Tsono Yonatani adayamba kumenyana nawo nkhondo.

⁷⁶Anthu amumzindamo adachita mantha natsekula zipata, ndipo Yonatani adalanda Yopa.

⁷⁷Pakumva zimenezo, Apoloniyo adatenga ankhondo okwera pa akavalo 3,000 ndi gulu lalikulu la ankhondo ena, napita ku Azoto, kuchita ngati kungoyenda chabe. Nthaŵi yomweyo adasendera ku chigwa, chifukwa ankakhulupirira kuchuluka kwa asilikali ake okwera pa akavalo.

⁷⁸Tsono Yonatani adamtsata mpaka ku Azoto, kumeneko magulu aŵiri a asilikali adamenyana nkhondo.

⁷⁹Apoloniyo adasiya kumbuyo kwao asilikali okwera pa akavalo 1,000 atabisala.

⁸⁰Koma Yonatani adaazindikira kuti kuli obisalira kumbuyo kwake, chifukwa ankhondowo adaazinga gulu lake lankhondo nkumalasa anthu ake ndi mivi yao kuyambira m'maŵa mpaka madzulo.

⁸¹Koma anthu ake adalimbika, monga m'mene Yonatani adaaŵalamulira, ndipo akavalo a adani adayamba kutopa.

⁸²Tsono Simoni adabwera ndi gulu lake, namenyana nkhondo ndi gulu lalikulu lija la adani, chifukwa akavalo anali atatopa kwambiri. Adaniwo poona kuti zathina, adathaŵa.

⁸³Ankhondo aja a pa akavalo adangoti balala m'chigwa, ndipo othaŵawo adakafika ku Azoto, kumene adakaloŵa m'Bete-Dagoni, nyumba ya fano lao, kuti apulumukiremo.

⁸⁴Yonatani adatentha mzinda wa Azoto ndi mizinda yozungulira, nafunkha chuma chake. Adatenthanso nyumba yopembedzeramo Dagoni ndi onse amene adaathaŵiramo.

⁸⁵Anthu onse amene adaŵapha pa nkhondo ndi ena ochita kuŵatentha, adakwanira 8,000.

⁸⁶Yonatani adachokako, nadzamanga zithando zake zankhondo pafupi ndi Askaloni. Anthu akumeneko adatuluka kudzakumana naye, ndipo adamchitira ulemu waukulu.

⁸⁷Tsono Yonatani adabwerera ku Yerusalemu ndi anthu ake ndi chuma chambiri chimene adaachifunkha.

⁸⁸Mfumu Aleksandro atamva zimene zidachitikazo, adapatsa Yonatani ulemu wina.

⁸⁹Adamtumizira bakolo yagolide yomangira nsalu, potsata mwambo wokhalira abale a mfumu okha, nampatsa mzinda wa Ekeroni ndi midzi yake yonse kuti ikhale yake.