Read Buku Loyera - Chichewa 1 Am. 11 Bible Online

1 Am. 11 - Buku Loyera - Chichewa bible

1 Am. 11

¹Mfumu ya ku Ejipito idasonkhanitsa ankhondo ochuluka ngati mchenga wa m'mbali mwa nyanja. Idasonkhanitsanso zombo zambiri, nkuyesa kulanda dziko la Aleksandro mochenjera kuti aliphatikize ku dziko lake.

²Tsono adanyamuka kupita ku Siriya, akunena mau amtendere. Anthu am'mizinda adamtsekulira zipata za mizinda yao, nadzakumana naye, chifukwa mfumu Aleksandro anali atalamula kuti akakumane naye, popeza kuti anali mpongozi wake.

³Koma Ptolemeyo, poloŵa mu mzinda uliwonse, ankaikamo kaboma ka ankhondo ake.

⁴Atafika ku Azoto, anthu akumeneko adamuwonetsa nyumba ya Dagoni imene inali itapsa, ndiponso mzinda wa Azoto ndi mizinda yozungulira imene inali itaonongedwa. Adamuwonetsanso mitembo ya anthu amene anali atatenthedwa pa nkhondo, chifukwa adaaiwunjika pa njira imene ankayenera kudzera.

⁵Kenaka adafotokozera mfumu zimene Yonatani adaaŵachita, kuti amuimbe mlandu, koma mfumu sidanene kanthu.

⁶Yonatani adabwera ku Yopa kudzachingamira mfumu ndi ulemu waukulu. Atalonjerana, adagona komweko.

⁷Yonatani adaperekeza mfumu mpaka ku mtsinje wa Eleutere, nabwerera ku Yerusalemu.

⁸Tsono mfumu Ptolemeyo adalanda mizinda ya m'mbali mwa nyanja mpaka ku Seleukiya, ndipo monsemo ankalingalira za kuchita nkhondo ndi Aleksandro.

⁹Adatuma amithenga kwa mfumu Demetriyo kukamuuza kuti, “Ubwere, tidzapalane chibwenzi, ndidzakupatsa mwana wanga wamkazi yemwe ali ndi Aleksandro, ndipo udzakhala wolamulira mu ufumu wa bambo wako.

¹⁰Ndikumva chisoni kuti mwana wanga wamkazi ndidampereka kwa munthu amene adaafuna kundipha.”

¹¹Ankaika mlandu pa Aleksandro, chifukwa ankasirira ufumu wake.

¹²Motero adalandadi mwana wake wamkazi nampereka kwa Demetriyo. Chibwenzi chake ndi Aleksandro chidathera pomwepo, ndipo chidani chaocho chidadziŵika kwa onse.

¹³Pambuyo pake Ptolemeyo adaloŵanso mu Antiokeya, nalanda chisoti chaufumu cha ku Asiya, kotero kuti ankavala zisoti ziŵiri zaufumu, china cha ku Ejipito, china cha ku Asiya.

¹⁴Nthaŵiyo Aleksandro anali ku Silisiya, chifukwa anthu akumeneko adaamugalukira.

¹⁵Atamva zonsezo, Aleksandro adabwera kudzamenya nkhondo ndi mpongozi wake. Mfumu Ptolemeyo adatuluka, adadzakumana naye ndi gulu lalikulu lankhondo, namthaŵitsa.

¹⁶Aleksandro adathaŵira ku Arabiya kuti akapezeko chitetezo. Motero mfumu Ptolemeyo adasanduka wamkulu kopambana.

¹⁷Zabidiele, Mluya, adadula mutu wa Aleksandro nautumiza kwa Ptolemeyo.

¹⁸Koma pakutha masiku aŵiri Ptolemeyo nayenso adafa, ndipo ankhondo ake okhala m'timaboma tankhondo, anthu akomweko adaŵapha.

¹⁹Choncho Demetriyo adaloŵa ufumu wake chaka cha 167.

²⁰Masiku amenewo Yonatani adasonkhanitsa anthu a ku Yudeya kuti akalande boma lankhondo la ku Yerusalemu. Adakonza makina ambiri ankhondo odzathyolera bomalo.

²¹Koma anthu ena okana chipembedzo chao ndi odana ndi mtundu wao, adanka kwa mfumu Demetriyo ndi kukamdziŵitsa kuti Yonatani wazinga boma lija.

²²Mfumu itamva, idapsa mtima. Idapita mofulumira ku Ptolemaisi, nkumulembera Yonatani kalata yomuuza kuti aleke kuzinga boma lija. Idamuuzanso kuti abwere ku Ptolemaisi msanga kudzakambirana naye.

²³Yonatani atalandira kalatayo, adalamula anthu ake kuti abazingabe boma lija. Adasankhula akuluakulu ena a Aisraele ndi ansembe, napita nawo ngakhale kunali koopsa kutero.

²⁴Adatenga golide, siliva, zovala ndi mphatso zina zambiri, napita kukaonana ndi mfumu ku Ptolemaisi. Adapeza kuyanja pamaso pa mfumuyo.

²⁵Anthu ena odana ndi chipembedzo chao adayesanso kumnenera zoipa.

²⁶Koma mfumu Demetriyo adamchitira zomwe mafumu akale adaamuchitira. Adamlemekeza pakhamu pa abwenzi ake onse.

²⁷Adavomereza ukulu wake wa unsembe ndi ulemu umene anali nawo kale, nafuna kuti akhale mmodzi mwa abwenzi ake apamtima.

²⁸Yonatani adapempha mfumu kuti ileke kuŵakhometsa msonkho anthu a ku Yudeya ndi a ku madera atatu a ku Samariya aja, ndipo adalonjeza kuti adzapereka kwa mfumu makilogramu 10,000 a siliva.

²⁹Mfumu idavomera, nilembera Yonatani kalata yolongosola zonsezo ndi mau akuti,

³⁰“Ndine mfumu Demetriyo, ndikulonjera Yonatani mbale wake, pamodzi ndi Ayuda onse.

³¹Naŵa mau a m'kalata imene tidalembera mbale wathu Lasitene yonena za inu:

³²Ndine mfumu Demetriyo, ndikupereka moni kwa bambo wanga Lasitene.

³³Tikufuna kuŵachitira zabwino Ayuda amene ali abwenzi athu okhulupirika, chifukwa cha chifundo chimene adaonetsa.

³⁴Taŵatsimikizira kuti dziko la Yudeya ndi lao pamodzi ndi madera atatu aŵa a Samariya: Aferema, Lida ndi Ramataimu, pamodzi ndi midzi yake. Madera ameneŵa tikuŵachotsa ku Samariya kuti akhale a ku Yudeya. Zimenezi zidzakhala zaphindu kwa anthu onse opita ku Yerusalemu kukapembedza. Zidzaloŵa m'malo mwa msonkho umene mfumu inkalandira kale chaka chilichonse pa dzinthu dzam'munda ndi pa zipatso zam'mitengo.

³⁵Ndiponso zina zonse zimene ankayenera kupereka kwa ine mpaka tsopano, monga chachikhumi ndi msonkho weniweni, kapenanso msonkho wa mchere ndi misonkho ina yapadera, tikufuna kuŵachotsera zonsezi.

³⁶Zaufulu zonsezi zisadzafafanizike konse m'tsogolo muno.

³⁷Ndiye inu musalephere kulemba kalata yonga yomwe ino ndi kuipereka kwa Yonatani. Mumuuze kuti akaipachike ku phiri loyera, pa malo abwino pamene izikaonekera bwino lomwe.”

³⁸Mfumu Demetriyo poona kuti dziko lili pa mtendere, popanda zomuvuta, adachotsa ankhondo ake onse kuti aliyense apite kunyumba kwake. Adangosunga magulu a asilikali achilendo amene adaaŵalemba ku zisumbu za mitundu ina ya anthu. Choncho ankhondo amene ankatumikira makolo ake adayamba kudana naye.

³⁹Trifo, amene kale anali mmodzi mwa abwenzi a Aleksandro, ataona kuti ankhondo aja akumuŵiringulira Demetriyo, adapita kwa Yamuleku Mluya, amene ankalera Antioko mwana wamng'ono wa Aleksandro.

⁴⁰Adamuumiriza kuti ampatse mwanayo kuti amlonge ufumu m'malo mwa atate ake. Adamsimbira zimene Demetriyo adaachita, nanena kuti ankhondo ake akudana naye. Adakhala kumeneko masiku ambiri.

⁴¹Nthaŵi yomweyo Yonatani adatuma anthu kukapempha Demetriyo kuti achotse ankhondo ake okhala m'boma lankhondo la ku Yerusalemu ndi m'malinga ena a ku Yudeya, chifukwa ankalimbana ndi Aisraele.

⁴²Demetriyo adatuma anthu kukauza Yonatani mau aŵa akuti, “Sindidzangokuchitira iwe ndi a mtundu wako zimenezo, koma ndikufuna kuti ndikapeza mpata ndipereke ulemu woŵirikiza kwa iwe ndi mtundu wako nthaŵi zonse.

⁴³Tsopano ndi bwino kuti utume anthu adzandithandize, chifukwa ankhondo anga onse adandisiya.”

⁴⁴Yonatani adatumiza ku Antiokeya ankhondo 3,000 amphamvu ndi olimba mtima. Atafika kwa mfumu, iyo idakondwera nako kufika kwao.

⁴⁵Pamenepo anthu amumzindamo okwanira 120,000, adasonkhana pakati pa mzinda, kuti aphe mfumu.

⁴⁶Koma mfumuyo idathaŵira m'nyumba yake yaufumu. Apo anthu amumzindamo adalanda miseu yaikulu, nayamba zachipolowe.

⁴⁷Tsono mfumu idaitana Ayuda aja kuti adzamthandize. Onsewo adasonkhana pafupi naye, kenaka nkubalalikira mu mzinda. Pa tsiku limenelo Ayudawo adapha anthu ngati 100,000.

⁴⁸Adatentha mzindawo, adafunkha chuma chake chochuluka, napulumutsa mfumu.

⁴⁹Anthu aja ataona kuti Ayuda alanda mzindawo, adataya mtima nayamba kulira kwa mfumu ndi mau aŵa opemba akuti,

⁵⁰“Pepani ndithu, tikupempha mtendere, tikupemphanso kuti Ayudaŵa aleke kuchita nkhondo ndi ife ndi mzinda wathu.”

⁵¹Atatero adaponya pansi zida zao, napangana za mtendere. Ayuda adakhala ndi ulemu waukulu pamaso pa mfumu ndi pa anthu ena a m'dziko lake. Ndipo adabwerera ku Yerusalemu, ali ndi chuma chofunkha chambiri.

⁵²Tsono mfumu Demetriyo adakhazikika bwino mu ufumu wake, ndipo dziko lake lidakhala pa mtendere.

⁵³Koma sadachite zonse zimene adaalonjeza, ndipo adaleka kuyanjana ndi Yonatani. M'malo momubwezera zabwino zimene adaamchitira, ankamuvuta kwambiri.

⁵⁴Patapita nthaŵi, Trifo adabwerera pamodzi ndi mnyamata uja Antioko, namlonga ufumu, ndi kumuveka chisoti chaufumu.

⁵⁵Ankhondo aja, amene Demetriyo adaaŵachotsa, adasonkhana nakaphatikana ndi Antioko. Onsewo adayamba nkhondo ndi mfumu, iyoyo nkuthaŵa, ataigonjetsa.

⁵⁶Trifo adalanda njovu zake, nalandanso mzinda wa Antiokeya.

⁵⁷Tsono Antioko adalemba kalata kwa Yonatani yonena kuti, “Ndikutsimikiza kuti ukhalebe mkulu wa ansembe, ukhalenso wolamulira madera anai aja ndiponso ukhale mmodzi mwa abwenzi a mfumu.”

⁵⁸Adamtumizira ziŵiya zagolide ndi mbale zodyera, namlola kumamwera m'zikho zagolide, ndi kuvala nsalu zofiirira ndi bakolo lomangira lagolide.

⁵⁹Kenaka adasankhula Simoni, mbale wa Yonatani, kuti akhale bwanamkubwa wolamulira, kuyambira ku malire a Tiro mpaka ku malire a Ejipito.

⁶⁰Tsono Yonatani adanyamuka, nayendera dziko la kutsidya kwa mtsinje ndi mizinda yake. Magulu onse ankhondo a ku Siriya adadzaphatikana naye, kuti amthandize kumenya nkhondo. Atafika ku Askaloni, anthu akumeneko adamlandira ndi ulemu.

⁶¹Pochoka kumeneko adakafika ku Gaza. Koma anthu amumzindamo adamtsekera zipata zao. Apo Yonatani adazinga mzindawo, nautentha pamodzi ndi midzi yake, nkufunkha chuma chao.

⁶²Tsono anthu a ku Gaza adapepesa Yonatani, ndipo iye adapangana nawo za mtendere. Koma adatenga ana a atsogoleri ao ngati chigwiriro, naŵatumiza ku Yerusalemu. Kenaka adayendera dziko lonse mpaka ku Damasiko.

⁶³Tsiku lina Yonatani adamva kuti atsogoleri ankhondo a Demetriyo ali ku Kadesi ku Galileya ndi gulu lalikulu lankhondo, akufuna kuchotsa pa mpando wake.

⁶⁴Adapita kukakumana nawo, nasiya mbale wake Simoni m'dzikomo.

⁶⁵Simoni adapita kukamanga zithando zake pafupi ndi Betizure. Adamenya nawo nkhondo masiku ambiri, naŵatsekera adaniwo m'kati mwa mzindawo.

⁶⁶Ankhondo amumzindamo adampempha kuti pakhale mtendere, iyeyo nkuvomera. Adaŵatulutsa mumzindamo, naulanda, kenaka nkuikamo kaboma ka asilikali ake.

⁶⁷Yonatani ndi gulu lake adaamanga zithando zao pafupi ndi nyanja ya Genezarete, ndipo m'mamaŵa adaloŵa m'chigwa cha Azore.

⁶⁸Gulu lankhondo la anthu achilendo lija lidadzakumana naye ku chigwa. Adaamuikira obisalira m'mapiri, pamene iwowo ankadzakumana naye maso ndi maso.

⁶⁹Tsono anthu obisalira aja adatuluka mobisala muja nkudzailoŵa nkhondo ija.

⁷⁰Anthu a Yonatani adathaŵa onse. Panalibe otsala kupatula Matatiasi mwana wa Abisalomu, ndi Yudasi mwana wa Khalifi, atsogoleri a ankhondo.

⁷¹Tsono Yonatani adang'amba zovala zake, nadzithira fumbi kumutu, nkuyamba kupemphera.

⁷²Pambuyo pake adabwerera kunkhondo kuja. Adaŵagonjetsa adaniwo, iwowo nkuthaŵa.

⁷³Poona zimenezo anthu a Yonatani amene adaathaŵa aja adabwerera nadzaphatikana naye. Onse pamodzi adalondola adani ao mpaka ku Kadesi kumene anali atamanga zithando zao. Iwo omwe adamanga mahema ao komweko.

⁷⁴Pa tsikulo ankhondo achilendo adaphedwa ngati 3,000. Tsono Yonatani adabwerera ku Yerusalemu.