Read Buku Loyera - Chichewa 1 Am. 2 Bible Online

1 Am. 2 - Buku Loyera - Chichewa bible

1 Am. 2

¹Pa nthaŵi imeneyo wansembe wina dzina lake Matatiasi, mwana wa Yohane, mdzukulu wa Simeoni, wansembe wa m'banja la Yowaribu, adachoka ku Yerusalemu, nakakhala ku Modini.

²Matatiasi anali ndi ana aamuna asanu. Maina ao naŵa: Yohane wotchedwa Gadisi,

³Simoni wotchedwa Tasi,

⁴Yudasi wotchedwa Makabeo,

⁵Eleazara wotchedwa Avarano, ndi Yonatani wotchedwa Afusi.

⁶Matatiasi adaona zoipa za kunyoza Mulungu zimene zinkachitika ku Yuda ndi ku Yerusalemu.

⁷Ndipo adati, “Kalanga ine! Ndidabadwiranji kuti ndiwone kutha kwa mtundu wanga ndi kwa mzinda woyera? Kodi ine ndizingokhala khale, pamene mzinda waperekedwa kwa adani, ndipo Nyumba ya Mulungu ili m'manja mwa anthu achilendo?

⁸Nyumba ya Mulungu yasanduka ngati munthu wotha ulemu.

⁹Ziŵiya zake zonyaditsa adazitenga ngati zofunkha. Makanda ake adaŵakantha m'miseu yake. Anyamata ake adaphedwa ndi adani pa nkhondo.

¹⁰Kodi ulipo mtundu wa anthu umene sudalandeko chigawo cha ufumu wake ndi kufunkha katundu wake?

¹¹Adauchotsera makaka ake onse. Udaali mfulu, koma wasanduka kapolo.

¹²Nyumba yopembedzeramo Mulungu, yokongola kwambiri ndi yaulemerero ija, yasanduka bwinja, anthu a mitundu ina adaiipitsa.

¹³Nanga ifeyo tikhalirenjinso ndi moyo?”

¹⁴Tsono Matatiasi ndi ana ake adang'amba zovala zao navala chiguduli, ndipo adalira kwambiri.

¹⁵Tsiku lina asilikali a mfumu okakamiza anthu kuti aleke chipembedzo chao, adadza ku Modini kuti aumirize anthu kupereka nsembe.

¹⁶Aisraele ambiri adakasonkhana nao, koma Matatiasi ndi ana ake adaima pa okha.

¹⁷Asilikali a mfumu Antioko adauza Matatiasi kuti, “Iwe ndiwe mtsogoleri ndiponso munthu womveka ndi wamphamvu mu mzinda uno, ndipo ana ako ndi abale ako ali pambuyo pako.

¹⁸Uyambe ndi iweyo kutsata lamulo la mfumu, monga momwe achitira anthu a mitundu inamu, monganso achitira atsogoleri a ku Yuda omwe pamodzi ndi anthu otsala ku Yerusalemu. Choncho iwe ndi ana ako mudzakhala abwenzi a mfumu. Adzakulemekezani nkukupatsani golide, siliva ndi mphatso zina zambiri.”

¹⁹Pa zimenezi Matatiasi adayankha ndi mau okweza kuti, “Ngakhale anthu a mitundu ina yonse, okhala mu ulamuliro wa mfumu, amamumvera ndi kusiya chipembedzo cha makolo ao, ndi kutsata malamulo ake,

²⁰ine ndekha, ana anga ndi abale anga, tidzasunga chipangano cha makolo athu.

²¹Atithandize Mulungu kuti tisaleke kutsata Malamulo ake.

²²Sitidzamvera kulamula kwa mfumu. Sitidzapatuka pa chipembedzo chathu, kuloŵera kumanja kapena kumanzere.”

²³Atatha kulankhulaku, Myuda wina adadzaima patsogolo, anthu onse akupenya, kuti apereke nsembe pa guwa la ku Modini, pofuna kutsata lamulo la mfumu.

²⁴Matatiasi atampenya adapsa mtima zedi, nayamba kunjenjemera ndi ukali. Adamlumphira munthuyo ndi mkwiyo wachilungamo, namuphera paguwa pomwepo[1].

²⁵Nthaŵi yomweyo adaphanso nduna ya mfumu imene inkaumiriza anthu kupereka nsembe, kenaka nkuligamula guwalo.

²⁶Motero changu cha Matatiasi chokonda Malamulo chidamchititsa zimenezo, monga muja adaachitira Finehasi, kupha Zimuri, mwana wa Salu.

²⁷Pambuyo pake Matatiasi adalengeza mumzindamo mokweza mau kuti, “Aliyense wotsimikiza kusunga Chipangano ndi Malamulo abwere anditsate.”

²⁸Tsono iye ndi ana ake adathaŵira ku mapiri, nkusiya zonse zimene anali nazo mumzindamo.

²⁹Pa nthaŵi imeneyo Ayuda ambiri ofuna kusunga chipembedzo chao ndi chilungamo, nawonso adakakhala ku chipululu.

³⁰Adapita ndi ana ao, akazi ao, ndi ziŵeto zao, chifukwa mavuto ao anali ochuluka.

³¹Mbiri ya zimenezi idafika kwa atsogoleri ankhondo a mfumu ndi kwa gulu lankhondo lokhala ku Yerusalemu, mzinda wa Davide. Adamva kuti anthu ena amene adakana malamulo a mfumu, apita ku chipululu kukabisala.

³²Pomwepo ankhondo ambiri adanyamuka mofulumira nkuŵalondola. Ataŵapeza, adamanga zithando zankhondo mopenyana nawo, nakonzekera kumenyana nawo nkhondo pa tsiku la Sabata.

³³Adaŵafuulira kuti, “Nthaŵi ikalipo, tulukani, mumvere malamulo a mfumu, ndipo mudzakhala ndi moyo.”

³⁴Ayuda aja adayankha kuti, “Iyai, ife sitituluka, sitidzatsata malamulo a mfumu kapena kuipitsa tsiku la Sabata.”

³⁵Pompo asilikaliwo adayambapo nkhondo.

³⁶Koma Aisraele sadaŵabwezere, sadaŵaponye miyala, ndipo sadatseke pa mapanga ao.

³⁷Adangonena kuti, “Ife tonse mutipha popanda chifukwa, tilibe cholakwa chilichonse, kumwamba ndi dziko lapansi ndi mboni.”

³⁸Tsono iwo aja adaŵathira nkhondo tsiku la Sabata, naŵapha iwowo, akazi ao, ana ao ndi ziŵeto zao zomwe. Anthuwo anali okwanira chikwi chimodzi.

³⁹Matatiasi ndi abwenzi ake atamva zimenezo, adaŵalira kwambiri.

⁴⁰Adauzana kuti, “Ife tikachita zonga zimene adachita abale athuŵa, tikapanda kumenyana nawo nkhondo anthu a mitundu inaŵa kuti tisunge moyo wathu ndi malamulo athu ndi mwambo wathu, ndiye kuti adzatiwononga tonse pa dziko lapansi.”

⁴¹Tsono tsikulo adamvana kuti, “Munthu aliyense akadzayambana nafe nkhondo ngakhale pa tsiku la Sabata, tidzamenyane naye, tisafe tonse monga m'mene adafera abale athu m'mapanga muja.”

⁴²Anthu a m'banja la Asidea adaphatikana nawo. Anali Aisraele olimba mtima ndi ofuna kuteteza Malamulo.

⁴³Onse othaŵa mavuto adadzaphatikana nawo, nkuchulukitsa gulu lao.

⁴⁴Atasonkhanitsa khamu lao lankhondo, adakantha anzao ochimwawo mwachipseramtima, nakanthanso mwaukali amene adaasiya chipembedzo chao. Amene adapulumukapo adathaŵira kwa anthu a mitundu ina.

⁴⁵Matatiasi pamodzi ndi abwenzi ake adayendera dziko, kuti agumule maguwa onse achikunja.

⁴⁶Adaumbala ana onse amene adaŵapeza ali osaumbalidwa m'dziko la Israele.

⁴⁷Adapirikitsa adani ao achipongwe, nakhozadi pa ntchito zaozo.

⁴⁸Adateteza Malamulo aja kuti asanyozedwe ndi anthu a mitundu ina ndi mafumu aja, ndipo sadalole kuti anthu onyoza Malamulowo apambane.

⁴⁹Matatiasi ali pafupi kufa, adauza ana ake kuti, “Mwano ndi chipongwe zikukulirakulira, nthaŵi ino ndi yamavuto ndi ya mkwiyo waukali.

⁵⁰Tsono inu ana anga, onetsani changu chanu chotsata Malamulo, mupereke moyo wanu chifukwa cha chipangano cha makolo athu.

⁵¹Kumbukirani ntchito zimene makolo anu adazichita pa mibadwo yao, ndipo mudzaona ulemu waukulu ndi mbiri yosatha.

⁵²Kodi suja Abrahamu adapezeka kuti ngwokhulupirika pamene ankayesedwa? Kodi suja adapezeka wolungama chifukwa cha kumvera kwake?

⁵³Yosefe, nthaŵi ya mavuto ake, adatsata Malamulo, nasanduka mkulu woyang'anira Ejipito.

⁵⁴Finehasi kholo lathu, adalandira lonjezo la unsembe wosatha, chifukwa cha chikondi chake choyaka chokonda za Mulungu.

⁵⁵Yoswa, popeza kuti adaasenza ntchito yake mpaka kuitsiriza, adasanduka woweruza Aisraele.

⁵⁶Kalebe adalandira chigawo chakechake cha dziko, chifukwa adaachita umboni woona pa msonkhano.

⁵⁷Davide, chifukwa cha kukhulupirika kosagwedezeka, adalandira mpando wa ufumu wamuyaya.

⁵⁸Eliya, chifukwa chokhala ndi changu chachikulu chotsata Malamulo, adakwezedwa kumwamba.

⁵⁹Hananiya, Azariya ndi Misaele adapulumuka m'ng'anjo yamoto, chifukwa cha kukhulupirira Mulungu.

⁶⁰Daniele anali wa mtima wangwiro, nchifukwa chake adapulumuka kukamwa kwa mikango.

⁶¹“Tsono muzindikire kuti mu mbadwo uliwonse, anthu onse okhulupirira Mulungu sadzafooka konse.

⁶²Musaope mau a munthu woipa uja, chifukwa ulemu wake upita ku ndoŵe ndi ku mphutsi.

⁶³Lero adzikuza, maŵa lino osaonekanso, chifukwa wabwerera ku fumbi, ndipo zolinga zake zatheratu.

⁶⁴Tsono inu ana anga, mukhale amphamvu ndi olimba mtima potsata Malamulo, motero mudzapeza ulemerero.

⁶⁵“Onani Simoni mbale wanu. Ndikudziŵa kuti iye uja ndi munthu wanzeru polangiza ena. Muzimumvera nthaŵi zonse, ndipo adzakhala ngati bambo wanu.

⁶⁶Yudasi Makabeo ndi munthu wolimba mtima kuyambira pa unyamata wake. Iyeyo akhale mtsogoleri wa gulu lanu lankhondo, azidzamenyana nkhondo ndi anthu a mitundu ina.

⁶⁷Muphatikane nawo onse otsata Malamulo, ndipo muŵalipsire onse ovutitsa mtundu wanu.

⁶⁸Muŵabwezere akunja zomwe adakuchitani, ndipo muchite khama kusunga Malamulo.”

⁶⁹Atatero, Matatiasi adadalitsa ana ake, kenaka nkufa.

⁷⁰Adamwalira chaka cha 146. Tsono ana ake adamuika m'manda a makolo ake ku Modini. Aisraele adalira maliro ake ndi chisoni chachikulu.