Read Buku Loyera - Chichewa 1 Am. 5 Bible Online

1 Am. 5 - Buku Loyera - Chichewa bible

1 Am. 5

¹Nthaŵi imeneyo anthu a mitundu ina oyandikana nawo atamva kuti Ayuda adamanganso guwa lansembe, nakonzanso Nyumba ya Mulungu monga m'mene inaliri kale, adapsa mtima kwambiri.

²Adatsimikiza zoti aononge kotheratu anthu onse a fuko la Yakobe amene anali pakati pao. Motero adayambadi kupha anthuwo ndi kuŵaononga.

³Tsono Yudasi adayamba kumenya nkhondo ndi zidzukulu za Esau ku Idumeya ku dziko la Akrabatene, kumene anali atazinga Aisraele. Adaŵapambana, naŵagonjetsa ndi kuŵafunkhira chuma chao.

⁴Adakumbukiranso kuchimwa kwa ana a Baene, amene ankanyenga ndi kutchera msampha Aisraele, nkumaŵalalira pa njira.

⁵Adaŵatsekera m'malinga mwao, naŵazinga ndi zithando zankhondo, kufunitsitsa kuti aŵaonongeretu. Adatentha nsanja zao pamodzi ndi onse okhalamo.

⁶Pambuyo pake adaoloka kukathira nkhondo Aamoni. Kumeneko adapeza chigulu chankhondo champhamvu chotsogoleredwa ndi Timoteo.

⁷Adamenyana nawo kwambiri, naŵakantha ndi kuŵaononga kotheratu.

⁸Kenaka adalanda Yazere pamodzi ndi midzi yake yomwe, nabwerera ku Yudeya.

⁹Anthu a mitundu ina okhala ku Giliyadi adasonkhana, kuti akamenye nkhondo ndi Aisraele a m'dziko mwao kuti aŵaononge. Aisraelewo adathaŵira ku linga la ku Datema.

¹⁰Kenaka adatumiza kalata kwa Yudasi ndi abale ake yonena kuti, “Anthu a mitundu ina otizungulira asonkhana kuti atiwononge.

¹¹Akonzeka kuti adzalande linga limene tathaŵiramo, ndipo Timoteo ndiye mtsogoleri wao wankhondo.

¹²Ndiye inu bwerani msanga kudzatipulumutsa kuti angatiwononge, chifukwa ambiri mwa ife adafa.

¹³Abale athu onse okhala ku dera la Tobe iwonso adaphedwa, akazi ndi ana adaŵatenga kunka nawo ku ukapolo, ndipo chuma chaonso adaŵalanda. Kumeneko adapha anthu okwanira chikwi chimodzi.”

¹⁴Pamene Yudasi ankaŵerenga kalatayo, amithenga ena ochokera ku Galileya adafika, zovala zao zili zong'amba. Adanena kuti,

¹⁵“Anthu a ku Ptolemaisi, a ku Tiro ndi a ku Sidoni aphatikizana ndi anthu achilendo a ku Galileya kuti atiwononge.”

¹⁶Yudasi ndi anthu ake atamva mauthenga ameneŵa, adachita msonkhano waukulu, kuti amvane zoyenera kuchita kuti athandize abale ao ozunzidwa ndi kuthiridwa nkhondo ndi adani ao.

¹⁷Yudasi adauza mbale wake Simoni kuti, “Udzisankhire anthu, mukapulumutse abale anu okhala ku Galileya, ine ndi mbale wanga Yonatani tipita ku Giliyadi.”

¹⁸Ku Yudeyako adasiya Yosefe mwana wa Zakariya ndi Azariya mtsogoleri wa anthu, pamodzi ndi ankhondo otsala, kuti azilonda dzikolo.

¹⁹Adaŵalamula kuti, “Muziŵayang'anira anthu aŵa, koma musayambane nkhondo ndi akunja mpaka titabwera.”

²⁰Simoni adampatsa anthu zikwi zitatu kuti apite nawo ku Galileya, Yudasi natenga anthu zikwi zisanu ndi zitatu kupita nawo ku Giliyadi.

²¹Tsono Simoni adapita ku Galileya. Kumeneko adamenyana nkhondo ndi akunja ambiri naŵabalalitsa.

²²Adaŵalondola mpaka ku chipata cha mzinda wa Ptolemaisi. Anthu akunja amene adaphedwa pa nkhondoyo anali okwanira 3,000, ndipo Ayuda adafunkha chuma chao.

²³Adatenga Ayuda okhala ku Galileya ndi ku Aribata pamodzi ndi akazi ao ndi ana ao, ndi chuma chao chonse. Adabwera nawo ku Yudeya ali okondwa kwambiri.

²⁴Pa nthaŵi imeneyo nayenso Yudasi Makabeo ndi mbale wake Yonatani adaoloka Yordani, nayenda masiku atatu m'chipululu.

²⁵Adakumana ndi Anabate. Iwowo adaŵalandira mwaubwenzi, naŵafotokozera zonse zimene zidaachitikira abale ao okhala ku Giliyadi.

²⁶Adati, “Ambiri mwa iwo adazingidwa ku Bozira, Bosora, Alema, Kasifo, Makedi ndi ku Karinaimu, mizinda yaikulu ndi yamalinga.

²⁷Enanso adazingidwa ku mizinda ina ya ku Giliyadi. Ndipo adani ao adakonzeka kuti athire nkhondo mizindayo m'maŵa mwake, kuti ailande ndi kupha anthu onse am'menemo pa tsiku limodzi.”

²⁸Yudasi ndi gulu lake lankhondo adadzera njira ya ku chipululu mpaka ku Bozira. Adamenya nkhondo nalanda mzindawo, ndipo adapha amuna onse. Atafunkha chuma chao, adautentha mzindawo.

²⁹Adachoka kumeneko usiku, nayenda mpaka kukafika ku mzinda wamalinga wa Datema.

³⁰M'maŵa kutacha, poyang'ana, adaona anthu ambirimbiri atanyamula makwerero ndi makina ankhondo, kuti alande mzindawo ndi kumenya nkhondo ndi Ayuda okhala m'katimo.

³¹Yudasi adaona kuti nkhondo yayambika kale, ndipo mumzindamo mukumveka phokoso, kulira kwa malipenga ndi kufuula kwa anthu.

³²Choncho adauza anthu a gulu lake kuti, “Lero mumenye nkhondo chifukwa cha abale anu.”

³³Tsono adagaŵa anthuwo m'magulu atatu, nasendera kwa adani cha kumbuyo kwao, akuliza malipenga ndi kupemphera mokweza mau.

³⁴Ankhondo a Timoteo, atazindikira kuti ndi Yudasi Makabeo, adathaŵa, iyeyo nkuŵakantha ndithu. Motero anthu okwanira 8,000 adaphedwa pa nkhondoyo tsiku limenelo.

³⁵Pochoka apo Yudasi adapita ku Alema, nakathiranso nkhondo kumeneko, nkulanda mzindawo. Adapha amuna onse, adafunkha chuma chao natentha mzinda wao.

³⁶Kutha pamenepo adapitirira, nakalanda Kasifo, Makedi, Bosora ndi mizinda ina ya ku Giliyadi.

³⁷Pambuyo pake Timoteo adasonkhanitsa gulu linanso lankhondo, namanga zithando zankhondo poyang'anana ndi Rafoni, patsidya pa mfuleni.

³⁸Yudasi adatuma anthu kuti akazonde gululo, ndipo okazondawo adadzamuuza kuti, “Anthu a mitundu ina onse otizungulira aphatikizana ndi ankhondo a Timoteo, apanga chigulu chachikulu zedi.

³⁹Adalembanso Arabu kuti aŵathandize pa nkhondoyo. Adamanga zithando zao zankhondo patsidya pa mfuleni, atakonzeka kuti amenyane nawe.” Pamenepo Yudasi adasendera kuti akumane nawo.

⁴⁰Timoteo adauza atsogoleri ake ankhondo kuti, “Akayamba ndi Yudasi ndi anthu ake kuwoloka mfuleni, sititha kuŵaletsa, ndipo tipambana.

⁴¹Koma akaopa kuwoloka, ndipo akamanga zithando zao zankhondo patsidya pa mfuleni, tidzaoloka ndife kukakumana nawo, ndipo tidzampambana.”

⁴²Yudasi atafika kumfuleniko, adaika akulu ankhondo m'mbali mwa mfuleni, naŵalamula kuti, “Musalole munthu ndi mmodzi yemwe kuti amange hema lake kuno, koma onse apite ku nkhondo.”

⁴³Tsono adayamba ndiye kuwolokera kwa adani, anthu ake onse nkumutsata. Adaŵagonjetsa akunja aja, ndipo iwowo adataya zida zao nathaŵira ku malo opembedzerako mafano a ku Karinaimu.

⁴⁴Koma Yudasi adalanda mzindawo, natentha nyumba ya mulungu wao ndi onse okhalamo. Choncho anthu a ku Karinaimu adagonja, osatha kumenyana naye Yudasi.

⁴⁵Pambuyo pake Yudasi adasonkhanitsa Aisraele onse a ku Giliyadi, kuti aŵabwezere onse ku Yudeya. Chinali chinamtindi cha anthu, otsika ndi otchuka omwe, pamodzi ndi akazi ao ndi ana ao. Onsewo anali atatenga katundu wao yense.

⁴⁶Anthu ameneŵa Yudasi adafika nawo ku Efuroni. Umenewu unali mzinda waukulu wa linga lolimba, wa m'mbali mwa mseu. Sadathe kuulambalala chakumanja kapena chakumanzere, ankayenera kudzera pakati pake basi.

⁴⁷Koma anthu amumzindamo adaŵatsekera njira nakundika miyala pa chipata. Yudasi adaŵatumizira mau amtendere.

⁴⁸Adati, “Ife tikungofuna kudzeramo chabe m'dziko mwanumu, tikubwerera kwathu. Palibe amene akuvuteni, tingodutsa chabe.” Koma iwowo adakana ndithu kumtsekulira.

⁴⁹Pamenepo Yudasi adalamula anthu akewo kuti amange mahema ao pomwe adaaimapo.

⁵⁰Ankhondo ake adakonza mizere yao, ndipo Yudasi adalamula kuti authire nkhondo mzindawo. Adamenyana nkhondo usana ndi usiku, ndipo Mulungu adaupereka mzindawo m'manja mwao.

⁵¹Adapha amuna onse pankhondopo, nagumula mzindawo ndi kufunkha chuma chake chonse. Kenaka adadzera pakati pake akuponda pa mitembo ya adaniwo.

⁵²Tsono adaoloka Yordani nakafika ku chigwa chachikulu choyang'anana ndi Betisane.

⁵³Yudasi ankaŵafulumiza anthu okhala m'mbuyo ndi kuthandiza anthu ake njira yonse, mpaka adakafika ku dziko la Yudeya.

⁵⁴Adakwera phiri la Ziyoni mosangalala ndi mokondwa, napereka nsembe zopsereza, chifukwa onsewo anali atabwerera bwino, osataya ndi mmodzi yemwe mwa abale ao.

⁵⁵Nthaŵi imene Yudasi ndi Yonatani anali ku dziko la Giliyadi, ndipo Simoni mbale wao anali ku Galileya mbali ya ku Ptolemaisi,

⁵⁶Yosefe, mwana wa Zakariya, ndipo Azariya mtsogoleri wa ankhondo, adaamva za zazikulu zimene anzao aja adaazichita pomenya nkhondo zao.

⁵⁷Tsono iwo adati, “Ifenso tiyeni tibukitse mbiri yathu, tiyeni tikamenye nkhondo ndi anthu a mitundu ina otizungulira.”

⁵⁸Motero adatenga magulu ao ankhondo, napita kukamenya nkhondo ku Yaminiya.

⁵⁹Tsono Gorjiyasi adatuluka mumzindamo ndi anthu ake napita kuti akakumane nawo.

⁶⁰Yosefe ndi Azariya adagonjetsedwa, ndipo adani adaŵathamangitsa mpaka ku malire a Yudeya. Tsiku limenelo adaphedwa Aisraele okwanira zikwi ziŵiri.

⁶¹Choncho Aisraele adathyoledwa kwambiri chifukwa iwo sadamvere Yudasi ndi abale ake, naganiza kuti iwonso adzakhoza kuchita zazikulu zotchukitsa mbiri yao.

⁶²Koma sanali a mtundu wa anthu amene Mulungu adaaŵapatsa mphamvu ya kupulumutsa Aisraele.

⁶³Yudasi ndi abale ake anali ndi ulemerero waukulu pakati pa Aisraele onse ndiponso pakati pa anthu a mitundu ina amene adaamva maina ao.

⁶⁴Anthu ankadzasonkhana kwa iwo kuti aŵatamande.

⁶⁵Pambuyo pake Yudasi ndi abale ake adapita kukamenya nkhondo ndi zidzukulu za Esau, m'dziko lakumwera. Adagonjetsa Hebroni ndi midzi yake, nagumula malinga ake, nkutentha nsanja zankhondo zokhala kumeneko.

⁶⁶Pambuyo pake adanyamuka kumeneko kupita ku dziko la Afilisti, nakabzola ku Marisa.

⁶⁷Pa tsiku limenelo ansembe ena adaphedwa ku nkhondo, chifukwa adaafuna kuwonetsa chamuna chao, nadziponya mopanda nzeru pakati pa nkhondo.

⁶⁸Tsono Yudasi adapita ku Azoto ku dziko la Afilisti. Adagwetsa maguwa ao natentha mafano a milungu yao. Kenaka atafunkha chuma cha m'mizinda yao, adabwerera ku dziko la Yudeya.