Read Buku Loyera - Chichewa 1 Am. 6 Bible Online

1 Am. 6 - Buku Loyera - Chichewa bible

1 Am. 6

¹Pa nthaŵi imene mfumu Antioko ankayendera zigawo za dziko zakumpoto, adamva za mzinda wina wa ku Persiya, dzina lake Elimaisi, umene unkatchuka chifukwa cha siliva ndi golide wake.

²Adaamvanso kumeneko kuti kuli nyumba ya milungu yao m'mene munali chuma chambiri, zishango zagolide, zovala zachitsulo zankhondo, ndi zida zimene adaazisiyamo Aleksandro, mwana wa Filipo, mfumu ya ku Masedoniya, amene anali woyamba kulamulira Agriki.

³Iyeyo tsono adapita komweko kuti akayese kulanda mzindawo pamodzi ndi chuma chake. Koma adalephera chifukwa anthu amumzindamo adaadziŵiratu cholinga chake,

⁴motero adalimbana naye mwamphamvu. Tsono iye adathaŵa ndi chisoni chachikulu, nkubwerera ku Babiloni.

⁵Akadali ku Persiya, wamthenga adafika kudzamdziŵitsa kuti magulu ake ankhondo amene adaakathira nkhondo ku Yudeya aonongeka.

⁶Adamusimbira kuti Lisiyasi amene adaapita ku nkhondo ndi gulu lamphamvu, adathaŵa Ayuda. Choncho Ayudawo adakulitsa mphamvu zao ndi zida zankhondo, ndi katundu ndiponso ndi chuma chambiri chimene adachifunkha atapambana magulu ankhondowo.

⁷Adamvanso kuti Ayudawo adagwetsa fano lonyansa lija limene Antioko adaaliimika pa guwa la ku Yerusalemu, ndipo kuti adazinga Nyumba ya Mulungu wao ndi malinga aatali monga momwe adaaliri kale, nkulimbitsanso Betizure, mzinda wake waufumu.

⁸Mfumu Antioko atamva zonsezi adada nkhaŵa, navutika kwambiri. Adadziponya pabedi pake, nkudwala ndi chisoni, chifukwa zinthu sizidayende monga m'mene iye adaaganizira.

⁹Adakhala pabedipo masiku ambiri, chisoni osatha, nadziŵa kuti imfa yayandikira.

¹⁰Tsono adaitana abwenzi ake, naŵauza kuti, “Ine tulo ndiye tatha m'masomu, ndipo mumtima mwanga mwadzaza nkhaŵa.

¹¹Ndakhala ndikuganiza kuti kodi chisoni chotere chandidzera bwanji? Kodi ndidagwa bwanji m'mavuto otere? Chonsechotu ndinali munthu wachifundo ndipo anthu ankandikonda mu ulamuliro wanga.

¹²Koma tsopano ndikukumbukira zoipa zonse zimene ndidachita ku Yerusalemu, potenga ziŵiya zonse zasiliva ndi zagolide zakumeneko, ndipo ndidatumiza ankhondo kukaononga anthu a ku Yudeya popanda chifukwa.

¹³Ndikudziŵa kuti masautsoŵa andigwera chifukwa cha zimenezi, ndipo tsopano ndikufera kuchilendo kuno ndi chisoni chachikulu.”

¹⁴Tsono adaitana Filipo, mmodzi mwa abwenzi ake, namupatsa mphamvu zolamulira m'dziko lake lonse.

¹⁵Adampatsa chisoti chake chaufumu, mkanjo wake ndi mphete yake, namlamula kuti aphunzitse bwino mwana wake Antioko ndi kumlangiza nzeru zachifumu.

¹⁶Tsono pa chaka cha 149 mfumu Antioko adamwalira.

¹⁷Lisiyasi adamva kuti mfumu yamwalira, m'malo mwake adalonga ufumu mwana wake Antioko, amene anali atamlera kuyambira ubwana wake. Tsono adampatsa dzina loti Eupatore.

¹⁸Ankhondo a adani aja okhala pa boma lankhondo lija, ankatsekereza Aisraele pa malo ozungulira Nyumba ya Mulungu. Nthaŵi zonse ankayesa kuŵavutitsa, ndi kulimbitsa anthu akunja.

¹⁹Tsono Yudasi adaganiza zoŵaononga, motero adasonkhanitsa anthu ake onse kuti aŵazinge.

²⁰Atasonkhana iwowo, adakazinga boma lankhondolo pa chaka cha 150. Adamanga nthumbira zankhondo ndi makina enanso ankhondo.

²¹Koma ena mwa anthu ozingidwawo adathaŵa, ndipo Aisraele ena okana chipembedzo adaphatikizana nawo.

²²Adapita kwa mfumu nakaiwuza kuti, “Kodi ndi mpaka liti mudzakhale mukuŵalekerera Ayudawo osaŵalipsira chifukwa cha abale athu amene adaphedwa, osatichitira zolungama?

²³Paja ife tidavomera ndi mtima wonse kutumikira bambo wanu, kutsata malamulo ake ndi kumvera mau ake.

²⁴Nchifukwa chake anthu a mtundu wathu atizinga ndipo asanduka adani athu. Anzathu onse amene adatha kuŵagwira adaŵapha, ndipo adafunkha chuma chathu.

²⁵Ndiponsotu si ife tokha amene atithira nkhondo, komanso m'madera anu onse.

²⁶Taonani, lero lomwe lino amanga zithando zankhondo pafupi ndi boma lathu lankhondo la ku Yerusalemu, kuti aliwononge, ndipo alimbitsa malinga a Nyumba ya Mulungu ndi a Betizure.

²⁷Mukapanda kufulumira kuŵaletsa, adzachita zamphamvu zina, ndipo simudzathanso kuŵaimitsa.”

²⁸Mfumu itamva zimenezi idapsa mtima, ndipo idaitana abwenzi ake onse, akuluakulu a magulu ake ankhondo ndi atsogoleri a okwera pa akavalo.

²⁹Idalembanso asilikali aganyu ochokera ku maiko ena ndi ku zisumbu zapanyanja.

³⁰Magulu ake ankhondo anali motere: asilikali oyenda pansi analipo 100,000, okwera pa akavalo analipo 20,000, ndipo njovu zozoloŵera nkhondo zinalipo 32.

³¹Adadzera ku Idumeya, namanga zithando zao zankhondo pafupi ndi Betizure. Adachita nkhondo masiku ambiri, napanga makina ankhondo, koma Ayuda adatuluka mumzindamo natentha makinawo, nkulimbana nawo mwamphamvu adaniwo.

³²Tsono Yudasi adaleka kuzinga boma lankhondo lija, ndipo adakamanga zithando zankhondo ku Bete-Zakariya, poyang'anana ndi zithando za mfumu.

³³Mfumu idadzuka mbandakucha, nilamula ankhondo ake kuti adzere njira yopita ku Bete-Zakariya. Ankhondowo adakonzeka kuchita nkhondo, naliza malipenga.

³⁴Njovu zija adaziwonetsa madzi a mphesa ndi a mapulesi kuti zitengeke mtima, ziyambepo kumenya nkhondo.

³⁵Njovuzo adaaziika pakati pa magulu a asilikali ankhondo. Njovu iliyonse inkakhala pakati pa anthu 1,000 oiperekeza, iwowo atavala zovala zachitsulo ndi zisoti zamkuŵa pa mutu. Okwera pa akavalo mazana asanu odziŵa nkhondo adaakhala mozungulira njovu iliyonse.

³⁶Onsewo adaakhaliratu komwe kunali njovuyo, namapita kulikonse kumene inkapitako, osasiyana nayo konse.

³⁷Pamsana pa njovu iliyonse panali kansanja kolimba kokhala ndi denga lake. Kanali kamtengo koma komangidwa bwino ndi malamba, ndipo m'kansanja kalikonse munali ankhondo atatu, pamodzi ndi woyendetsa wake.

³⁸Ankhondo ena okwera pa akavalo adaŵaika pa mbali ziŵiri za gulu lankhondo, kuti azivutitsa adani ao, pamene iwo akutetezedwa ndi magulu a ankhondo oyenda pansi.

³⁹Poti zishango zonse zamkuŵa ndi zagolide zinkanyezimira ndi dzuŵa, mapiri ankaŵala ndi kunyezimira kwake, nkumang'anima ngati nsakali zoyaka.

⁴⁰Gulu limodzi lankhondo la mfumu adalibalalitsira pamwamba pa mapiri, koma gulu lina adalibalalitsira ku chigwa. Choncho onse adanka m'tsogolo molongosoka ndi mwanzeru.

⁴¹Anthu onse adachita mantha, atamva kufuula kwa chigulucho ndiponso mdidi wa mapazi ao ndi phokoso la zida zao, chifukwa gulu linalidi lalikulu ndi lamphamvu.

⁴²Yudasi ndi gulu lake lankhondo nayenso adasendera kuti amenyane nawo, ndipo asilikali 600 a mfumu adaphedwa.

⁴³Eleazara, amene ankatchedwa Avarano, adaona kuti pali njovu ina yokhala ndi zovala zachitsulo zachifumu. Adaona kuti inali yaitali koposa zinzake zonse. Tsono iye adaganiza kuti mfumu yakwera pa imeneyo.

⁴⁴Ndiye adapereka moyo wake wonse kuti apulumutse gulu lake, ndipo kuti dzina lake likhale lotchuka mpaka muyaya.

⁴⁵Choncho molimba mtima adaithamangira njovuyo pakati pa gulu la adani. Ankapita napha adani kumanja ndi kumanzere. Akamafika, anthu ankamupatukira, ena uku ena uku.

⁴⁶Tsono mofulumira adaloŵa kunsi kwa njovu ija, nkuigwaza kumimba ndi lupanga lake, naipha. Njovuyo pakugwa pansi idamupsinja iye uja, nayenso nkufera pomwepo.

⁴⁷Ayuda ataona mphamvu za magulu ankhondo a mfumu ndi changu chao, adabwerera nkuthaŵa.

⁴⁸Ankhondo a gulu la mfumu adaŵatsatira, mpaka ku Yerusalemu. Mfumu ija idazinga dziko lonse la Yudeya ndi phiri la Ziyoni.

⁴⁹Adapangana za mtendere ndi anthu okhala ku Betizure. Iwowo adatuluka mu mzinda, chifukwa analibe zakudya mumzindamo zoŵathandiza kulimbikira pa nkhondo, popeza kuti chaka chimenecho chinali chaka chachisanu ndi chiŵiri chija[2] chosati nkubzala mbeu m'minda.

⁵⁰Mfumu italanda Betizure, idaikako kaboma kankhondo kolonda mzindawo.

⁵¹Pambuyo pake adaniwo adamanga mahema ankhondo kuyang'anana ndi Nyumba ya Mulungu, nakhalako masiku ambiri. Adapangako makina amitundumitundu ankhondo ndi makina oponyera moto, mivi ndi miyala.

⁵²Nawonso Ayuda okhala m'katimo adaimika makina ao, namenyana ndi adani masiku ambiri.

⁵³Koma chakudya chaocho chidaaŵathera, chifukwa chaka chimenecho chinali chachisanu ndi chiŵiri chija, ndipo Ayuda okhala m'maiko a akunja, amene adaathaŵira ku Yudeya, anali atadya chakudya chotsala.

⁵⁴Ayuda oŵerengeka okha adaatsala m'malo oyera, chifukwa njala idaachepetsa gulu lao, ndipo ambiri anali atabalalika, aliyense kunka kwao.

⁵⁵Paja panali Filipo, amene mfumu Antioko akali moyo adaamusankha kuti amlere mwana wake Antioko ndi kumlonga ufumu.

⁵⁶Iyeyo atabwerako ku Persiya ndi ku Mediya, pamodzi ndi ankhondo omwe adaaperekeza mfumu, adaganiza zolanda ulamuliro wa dziko.

⁵⁷Atamva zimenezo, Lisiyasi adaganiza zochoka mofulumira. Motero adauza mfumu, atsogoleri a ankhondo ndiponso ankhondo omwe kuti, “Ife kufooka kwathu kukunka kukukulirakulira tsiku ndi tsiku, chakudya tili nachochi nchochepa, ndipo malo amene taŵazinga ngolimba ndithu, ndiponso sitingaleke kusamala dziko lathu.

⁵⁸Ndiye tiyeni tingoyanjana nawo anthuŵa ndi kupangana za mtendere ndi iwoŵa ndiponso ndi mtundu wao wonse.

⁵⁹Tiyeni tiŵalole kuti azitsata miyambo yao monga kale. Adaatikwiyira ndi kuchita nkhondo zonse zija chifukwa cha miyamboyo, imene ife tidaithetsa.”

⁶⁰Mau ameneŵa adakomera mfumu, motero idatumiza anthu kwa Ayuda kuti apangane za mtendere, iwowo nkuvomera.

⁶¹Tsono mfumu ndi atsogoleri ake ankhondo, onse adachita malumbiro, ndipo atatero, Ayuda adatuluka m'malinga ao ankhondo.

⁶²Koma mfumu italoŵa m'chinyumba chankhondo cha ku phiri la Ziyoni, niwona malinga ake amphamvu, idaphwanya lumbiro lake. Idalamula kuti agumule malinga pozungulira ponse.

⁶³Kenaka idachoka mofulumira kubwerera ku Antiokeya kumene idakapeza Filipo akulamulira mzindawo. Pamenepo idamenyana naye nkhondo, nkulanda mzindawo.