Read Buku Loyera - Chichewa 1 Am. 7 Bible Online

1 Am. 7 - Buku Loyera - Chichewa bible

1 Am. 7

¹Chaka cha 151 Demetriyo, mwana wa Seleuko, adanyamuka ku Roma, nkuwoloka nyanja pamodzi ndi anthu oŵerengeka nakafika pa mzinda wina wapanyanjapo. Pamenepo adayamba kulamulira.

²Pamene ankaloŵa m'nyumba yachifumu ya makolo ake, gulu lankhondo lidagwira Antioko ndi Lisiyasi kubwera nawo kwa iye.

³Atamva zimenezo iyeyo adati, “Ndisaŵaone m'maso anthu amenewo.”

⁴Choncho ankhondo aja adaŵapha, Demetriyo nkukhala pa mpando waufumu.

⁵Tsono kudafika anthu oipa ndi okana chipembedzo a ku Israele. Mtsogoleri wao anali Alikimo, amene ankafuna kukhala mkulu wa ansembe.

⁶Anthuwo adayamba kusinjirira mtundu wao pamaso pa mfumu, nkumanena kuti, “Yudasi ndi abale ake adapha abwenzi anu onse, ndipo ifeyo adatipirikitsa m'dziko lathu.

⁷Ndiye inu mutumize munthu amene mumamkhulupirira, kuti akaone zoipa zimene Yudasi adatichita, ndi zimene adalichita dziko la mfumu. Tsono akaŵalange iwowo ndi ena onse oŵathandiza.”

⁸Mwa abwenzi ake mfumu idasankhula Bakide, bwanamkubwa wa dziko la patsidya pa mtsinje, munthu wotchuka m'dziko ndi wokhulupirika.

⁹Adamtuma pamodzi ndi Alikimo waupandu uja, amene adaamsandutsa mkulu wa ansembe onse, namlamula kuti aŵathire msimsi Aisraele.

¹⁰Iwowo adanyamuka ndi gulu lalikulu lankhondo nakaloŵa m'dziko la Yudeya. Adatuma amithenga kwa Yudasi ndi abale ake kukaŵauza mau onama onena za mtendere.

¹¹Koma iwowo, ataona kuti afika ndi gulu lalikulu lankhondo, sadaŵakhulupirire mau aowo.

¹²Komabe alembi ena adadza kwa Alikimo ndi kwa Bakide kudzapempha chipangano chachilungamo.

¹³Pakati pa Aisraele, Asidea ndiwo adaayamba kupempha za mtendere.

¹⁴Ankati, “Pabwera wansembe wina wa fuko la Aroni, wadza ndi gulu lankhondo. Koma iyeyo sadzatichita zoipa.”

¹⁵Wansembeyo adakamba nawodi mau amtendere, naŵalonjeza molumbira kuti, “Sitifuna kukuchitani zoipa, inu ndi abwenzi anu.”

¹⁶Iwowo adamumvera, koma iye adagwira anthu makumi asanu ndi limodzi mwa iwo, nalamula kuti aphedwe pa tsiku limodzi. Choncho mau a Mulungu adapherezera, onena kuti,

¹⁷“Adataya mitembo ya atumiki anu ponseponse, adakhetsa magazi ao ponse pozungulira Yerusalemu, ndipo panalibe wotsala woti nkuŵaika m'manda.”

¹⁸Tsono anthu onse adayamba kuŵaopa, nkumada nkhaŵa. Adati, “Anthu ameneŵa sanena zoona ndipo sachita zolungama, onani aphwanya chipangano ndiponso zimene adaalonjeza molumbira.”

¹⁹Bakide adachoka ku Yerusalemu, nakamanga mahema ake ku Betizete. Adatuma asilikali kuti akagwire ambiri mwa anthu amene anali atamthaŵa, ndi anthu enanso. Adaŵapha, naponya mitembo yao m'chinkhuti chachikulu.

²⁰Bakide adasiyira Alikimo ntchito yolamulira dziko, nampatsa ankhondo omthandiza. Kenaka Bakideyo adabwerera kwa mfumu.

²¹Alikimo adayesetsa kudzikhazikitsa mkulu wa ansembe.

²²Onse aja amene ankabweretsa chisokonezo pakati pa anthu, adasonkhana kwa iye. Adalanda lonse dziko la Yudeya, nachita zosakaza zambiri m'dziko la Israele.

²³Yudasi adamva zoipa zimene Alikimo ndi abwenzi ake ankachita Aisraele mpaka kupambana akunja kuipa kwake.

²⁴Choncho adayendera dziko lonse la Yudeya, naŵalipsira osokoneza onse aja, ndipo adaŵaletsa kuti asayendenso uku ndi uku m'dzikomo.

²⁵Alikimo ataona kuti Yudasi ndi anzake mphamvu zao zalimba, adazindikira kuti adzalephera kuŵapambana, motero adabwerera kwa mfumu nkukaŵanenera mau oipa.

²⁶Pambuyo pake mfumu idaitana Nikanore, mmodzi mwa nduna zake zotchuka, nimlamula kuti akaononge Ayuda. Ameneyo anali mdani wa Aisraele ndipo ankadana nawo kwabasi.

²⁷Atafika ku Yerusalemu ndi gulu lamphamvu la ankhondo, Nikanore adatuma amithenga kwa Yudasi ndi abale ake kuti akayese kuŵanyenga ndi mau onena za mtendere.

²⁸Adati, “Pasakhale nkhondo pakati pa inu ndi ine. Ine ndidzabwera kwa inu ndi anthu oŵerengeka okha kuti tiwonane maso ndi maso mwamtendere.”

²⁹Tsono adadzadi kwa Yudasi, ndipo adaonana naye mwamtendere, koma kwenikweni anthuwo ankafuna kugwira Yudasiyo.

³⁰Atazindikira chiwembu chimene Nikanore adaakonza pobwera kwa iye, Yudasi adachita mantha, ndipo adakana kukumana naye.

³¹Tsono Nikanore adazindikira pomwepo kuti maganizo ake aonekera poyera, motero adanyamuka kuti akamenyane nkhondo ndi Yudasi. Adayamba kumenyana nkhondo pafupi ndi Kafari-salama.

³²Pa nkhondo imeneyo anthu 500 a Nikanore adaphedwa, ndipo ena adathaŵira ku mzinda wa Davide.

³³Pambuyo pa izi Nikanore adakwera ku phiri la Ziyoni. Ansembe ena adatuluka ku Nyumba ya Mulungu, pamodzi ndi akuluakulu ena, kuti akamchingamire mwamtendere ndi kumuwonetsa nsembe yopsereza imene ankapereka kupempherera mfumu.

³⁴Koma iyeyo adaŵanyoza, adaŵaipitsa pa zachipembedzo, naŵalankhula mwachipongwe.

³⁵Mwachipseramtima adalumbira kuti, “Mukapanda kumpereka Yudasi ndi gulu lake lankhondo m'manja mwanga, ndithu nditabwerera, nkhondo itatha, ndidzatentha Nyumbayi.” Motero adachoka ali wopsa mtima kwambiri.

³⁶Tsono ansembe adaloŵanso m'Nyumba ya Mulungu naima pafupi ndi guwa, nkuyamba kulira misozi, adati,

³⁷“Ambuye, ndinu mudasankhula Nyumbayi kuti izimveketsa dzina lanu, kuti ikhale yopemphereramo ndi yopembedzeramo anthu anu.

³⁸Ndiye mumlipsire munthuyo ndi gulu lake lankhondo, aphedwe ndi lupanga. Mukumbukire mau ao okunyozani, tsono musalole kuti akhale moyo.”

³⁹Nikanore adachoka ku Yerusalemu nakamanga mahema ake pafupi ndi Betoroni, ndipo kumeneko gulu lankhondo la ku Siriya lidadzaphatikizana naye.

⁴⁰Yudasi nayenso adamanga zithando zankhondo pafupi ndi Adasa, ali ndi anthu 3,000. Tsono adapemphera kuti,

⁴¹“Pamene mfumu ya ku Asiriya idatuma anthu kudzakunyozani Inu Ambuye, mngelo wanu adadza nkupha asilikali ake onse 185,000.

⁴²Momwemonso lero muwononge gulu la nkhondoli pamaso pathu, kuti ena onse azindikire kuti Nikanoreyo adalankhula motukwana za Nyumba yanu yoyera, motero mumulange iyeyo molingana ndi tchimo lakelo.”

⁴³Pa tsiku la 13 la mwezi wa Adara, magulu ankhondo aja adayamba kumenyana, ndipo gulu lankhondo la Nikanore Ayuda adalitswanya. Nikanore ndiye adayamba kuphedwa pa nkhondoyo.

⁴⁴Ankhondo ake ataona kuti Nikanore waphedwa, adataya zida zao, nathaŵa.

⁴⁵Ayuda adaŵalondola ulendo wa tsiku limodzi, kuchokera ku Adasa mpaka kufupi ndi Gazara, akuliza malipenga mwamphamvu.

⁴⁶Anthu onse a midzi ya ku Yudeya yoyandikana nalo deralo adatulukamo nazinga othaŵa aja. Adaniwo adayesa kubwerera m'mbuyo, koma ankhondo oŵalondola anaŵapha onse ndi lupanga, popanda ndi mmodzi yemwe wopulumuka.

⁴⁷Adafunkha chuma chao ndi chakudya chao. Adadula mutu wa Nikanore ndi dzanja lake lamanja, lomwe adaalitambalitsa mwachipongwe. Adabwera nazo nazipachika pafupi ndi Yerusalemu kunja kwake.

⁴⁸Anthu onse anali okondwa kwabasi, ndipo tsiku limenelo linakhala tsiku lalikulu lachikondwerero ndi chimwemwe.

⁴⁹Tsono adapangana kuti tsikulo azidzalikumbukira chaka chilichonse pa tsiku la 13 la mwezi wa Adara.

⁵⁰Kenaka dziko la Yudeya lidakhala pa mtendere masiku oŵerengeka[3].