Read Buku Loyera - Chichewa 1 Am. 9 Bible Online

1 Am. 9 - Buku Loyera - Chichewa bible

1 Am. 9

¹Demetriyo atamva kuti Nikanore ndi ankhondo ake adaphedwa ku nkhondo, adatumanso Bakide ndi Alikimo ku Yudeya pamodzi ndi chigawo champhamvu cha gulu lake lankhondo.

²Adadzera mseu wopita ku Galileya, namanga zithando zao zankhondo ku Masaloti ku dziko la Aribela. Adalanda mzindawo, napha anthu ake ambiri.

³Mwezi woyamba wa chaka cha 152, adamanga zithando zao zankhondo pafupi ndi Yerusalemu.

⁴Kenaka adanyamuka napita ku Beerizeti ndi asilikali oyenda pansi 20,000 ndi okwera pa akavalo 2,000.

⁵Yudasi adamanga zithando zake zankhondo ku Elasa, ali ndi anthu osankhidwa 3,000.

⁶Ataona unyinji wa adaniwo, anthu a Yudasi adachita mantha, ambiri nkuthaŵa mozemba, mwakuti adangotsala anthu 800 okha.

⁷Yudasi adataya mtima poona kuti gulu lake lankhondo labalalika. Nkhondo inali pafupi kuyamba, ndipo panalibenso nthaŵi yosonkhanitsa ankhondo ake.

⁸Anali wolefuka, komabe adauza otsalawo kuti, “Tiyeni tinyamuke, tikakumane nawo adani athuwo ndi kuwona ngati tingathe kumenyana nawo.”

⁹Ankhondowo adayesa kumuletsa, adati, “Sitingathe. Chilipo tsopano nchakuti tingopulumutsa moyo wathu. Tidzachite kubweranso pamodzi ndi abale athu aja kuti tidzamenyane nawo, ifeyo ndiye tachepa.”

¹⁰Yudasi adaŵauza kuti, “Pasadzakhale wina munthu wonena kuti ine ndathaŵa nkhondo. Ngati nthaŵi yathu yafika, tifere abale athu ndi mtima wopanda mantha, koma tisalole kuti mbiri yathu iipe.”

¹¹Gulu lankhondo la adani lidatuluka ku zithando zao zankhondo, nkusendera kuti lidzakumane ndi Ayuda. Okwera pa akavalo anali magulu aŵiri; oponya miyala ndiponso amauta ankayenda patsogolo, pamodzi ndi ankhondo onse olimba mtima.

¹²Bakide anali ndi gulu la ku dzanja lamanja. Ankhondo onse ankayenda mwa magulu ao aŵiri namaliza malipenga.

¹³Anthu a Yudasi nawonso adaliza malipenga, pansi nkumachita kugwedezeka ndi phokoso la magulu ankhondowo. Nkhondo idalimba kuyambira m'maŵa mpaka madzulo.

¹⁴Yudasi ataona kuti Bakide ndi gulu lomthandiza ali mbali ya ku dzanja lamanja, adasonkhanitsa anthu olimba mtima kuti akhale pafupi naye.

¹⁵Adapambana gulu lankhondo la adani lakumanja. Adalipirikitsa mpaka ku phiri la Azoto.

¹⁶Koma adani a gulu lakumanzere ataona kuti gulu lakumanja lathaŵa, adatembenuka nayamba kulondola Yudasi ndi anthu ake nkumaŵasaka.

¹⁷Nkhondo idakula koopsa! Ndipo m'magulu aŵiriwo, ambiri adalasidwa naafa.

¹⁸Yudasi nayenso adafa, anthu ake otsala nkuthaŵa.

¹⁹Yonatani ndi Simoni adanyamula mtembo wa mbale wao, nauika m'manda a makolo ao ku Modini.

²⁰Aisraele onse adalira maliro ake kwambiri. Adalira malirowo masiku ambiri.

²¹Polira ankati, “Ha, kani yagwa motere ngwazi yamphamvu ija, mpulumutsi wa Israele!”

²²Ntchito zina za Yudasi, nkhondo zake ndi zina zonse zimene adaachita, kudzanso za ukulu wake, sizidalembedwe zonse ai, chifukwa zinali zochuluka kwambiri.

²³Yudasi atafa, mudayambanso kuwoneka anthu osiya chipembedzo chao m'dziko lonse la Israele, ndipo onse ochita zoipa adaonekera poyera.

²⁴Masiku amenewo kunali njala yaikulu, ndipo anthu a m'dzikomo adathaŵira kwa adani.

²⁵Tsono Bakide adasankha anthu oletsa chipembedzo, naŵaika kuti akhale olamulira dziko.

²⁶Iwoŵa adayamba kufunafuna abwenzi a Yudasi. Akaŵapeza ankaŵapereka kwa Bakide, ndipo iyeyo ankaŵalipsira ndi kuŵanyazitsa.

²⁷Motero Aisraele anali ndi nkhaŵa yoopsa. Sadaonekepo mavuto otere kuyambira nthaŵi imene aneneri adaleka kuwoneka ku Israele[4].

²⁸Pamenepo abwenzi ake onse a Yudasi adasonkhana kwa Yonatani, ndipo adamuuza kuti,

²⁹“Momwe adamwalirira mbale wanu Yudasi, palibe munthu wina wofanafana naye pa nkhondo zomenyana ndi Bakide ndi ena onse odana ndi mtundu wathu.

³⁰Tsono takusankhulani inuyo lero kuti mukhale mfumu yathu m'malo mwa iye uja, ndiponso kuti muzititsogolera pa nkhondo zathu.”

³¹Tsiku limenelo Yonatani adavomera ntchito ya utsogoleri, natenga malo a Yudasi mbale wake.

³²Bakide atamva zimenezo, adaganiza zoti aphe Yonatani.

³³Yonatani ndi mbale wake Simoni ndi anthu ake onse othandizana naye, atamva zimenezo, adathaŵira ku chipululu cha Tekowa, nkukamanga zithando zao pafupi ndi madzi a chitsime cha ku Asifare.

³⁴(Bakide atamva, adapita ndi ankhondo ake onse pa tsiku la Sabata kutsidya kwa Yordani).

³⁵Yonatani adatuma mbale wake Yohane, amene anali mkulu wa asilikali, kuti akapemphe abwenzi ake Anabate kuti aŵasungire katundu wao amene anali wochuluka.

³⁶Koma ana a Yambiri adatuluka ku Medeba naŵathira nkhondo mwadzidzidzi. Adagwira Yohane nkulanda zonse zimene anali nazo, nabwerera kwao ndi chumacho.

³⁷Pambuyo pake, ena adadziŵitsa Yonatani ndi mbale wake Simoni kuti ana a Yambiri akuchita chikondwerero chachikulu cha ukwati, ndipo kuti atachoka ku Nadabati, ankabwera ndi mkwati wamkazi ndi gulu lalikulu la anthu. Mkwati wamkaziyo anali mwana wa mmodzi mwa akuluakulu otchuka a ku Kanani.

³⁸Pamenepo Ayuda adakumbukira imfa ya mbale wao Yohane, ndipo adakwera ku phiri nakabisala m'mapanga.

³⁹Poti ayang'ane, adaona anthu ambirimbiri ali ndi katundu wambiri. Adaonanso mkwati wamwamuna, abale ake ndi abwenzi ake akudzaŵachingamira ali ndi zida zankhondo ndipo akuimba ting'oma ndi azeze.

⁴⁰Tsono Ayuda adasokoloka kumene adaabisala, naŵalumphira, nkuyamba kuŵakantha. Ambiri adaphedwa, ndipo otsala adathaŵira ku mapiri. Pamenepo Ayuda adatenga katundu wao yense.

⁴¹Choncho chikondwerero cha ukwati chija chidasanduka maliro, ndipo nyimbo zao zidasanduka madandaulo.

⁴²Pakutero Yonatani ndi Simoni adalipsira chifukwa cha imfa ya mbale wao Yohane, kenaka adabwerera ku zigwa za ku Yordani.

⁴³Bakide atamva zimenezi, adadza pa tsiku la Sabata[5] ku gombe la Yordani pamodzi ndi gulu lankhondo.

⁴⁴Yonatani adauza anthu ake kuti, “Tiyeni tinyamuke tsopano kukamenya nkhondo kuti tipulumutse moyo wathu, lero zinthu sizili monga kale.

⁴⁵Kutsogoloku kuli adani athu, kumbuyoku kuli Yordani. Kumanja ndi kumanzere kuli mataŵale ndi malunje. Kulibe koti tingathaŵireko.

⁴⁶Tsopano pempherani kwa Mulungu kuti mupulumuke kwa adaniŵa.” Nkhondo idayambika pomwepo.

⁴⁷Yonatani adayesetsa kuti akanthe Bakide, koma iye adamlewa pobwerera kumbuyo.

⁴⁸Tsono Yonatani ndi anthu ake adalumphira mu Yordani. Adasambira naoloka mtsinjewo, koma adani sadaoloke kuti aŵatsate.

⁴⁹Tsikulo anthu a Bakide adaphedwa pafupi 1,000.

⁵⁰Bakide atabwerera ku Yerusalemu, adatuma anthu kuti amange malinga olimba ndi nsanja zankhondo ku mizinda ya ku Yudeya, monga ku Yeriko, Emausi, Betoroni, Betele, Timnati, Faratoni ndi ku Tefoni. Konseko adamangitsa malinga aatali ndi zitseko ndi mipiringidzo yake.

⁵¹Adaikako maboma ankhondo kuti azilimbana ndi Aisraele.

⁵²Adamangiranso linga mzinda wa Betizure ndi wa Gazara ndi chinyumba chankhondo cha ku Ziyoni, naikako ankhondo ndi chakudya.

⁵³Adagwira ana a anthu otchuka am'dzikomo ngati zikole, naŵatsekera m'chinyumba chankhondo chija ku Yerusalemu.

⁵⁴Chaka cha 153, pa mwezi wachiŵiri, Alikimo mkulu wa ansembe onse, adalamula kuti agumule khoma la bwalo lam'kati la Nyumba ya Mulungu. Potero ankafuna kuwononga ntchito zonse za aneneri.

⁵⁵Koma atangoiyamba ntchitoyo, nthaŵi yomweyo Mulungu adamlanga Alikimo, ndipo ntchito yake idalekeka. Mano ake adalumana, ziwalo zidafa, osatha kunena ndi mau amodzi omwe, kapena kulamula kanthu kwa a m'nyumba mwake.

⁵⁶Pasanapite nthaŵi yaitali Alikimo adamwalira atazunzika kwambiri.

⁵⁷Bakide ataona kuti Alikimo wamwalira, adabwerera kwa mfumu, ndipo m'dziko la Yudeya mudakhala mtendere zaka ziŵiri.

⁵⁸Tsono Ayuda okana chipembedzo chao adapangana navomerezana, adati, “Onani, Yonatani ndi anzake ali pa mtendere opanda zovuta. Ndiye tiyeni tiitane Bakide, adzaŵagwire onse usiku umodzi.”

⁵⁹Motero adapitadi kukamvana naye.

⁶⁰Bakide adanyamuka ndi gulu lalikulu lankhondo. Anaŵatumizira m'seri makalata abwenzi ake okhala ku Yudeya kuti agwire Yonatani ndi anzake. Koma adalephera kuŵagwira, chifukwa iwowo anali atamva za chiwembu chaocho.

⁶¹Pamenepo Yonatani ndi anthu ake adagwira anthu makumi asanu pakati pa anthu am'dzikomo, omwe adaatsogolera anzao pochita chiwembucho, naŵapha.

⁶²Kenaka Yonatani ndi Simoni ndi anthu okhala nawo adapita ku Betibasi ku chipululu, namanganso nyumba zimene zinali zitagumulidwa, ndipo adazilimbitsa ndi malinga.

⁶³Bakide atamva zimenezi, adasonkhanitsa ankhondo ake onse, naitana anthu ena a ku Yudeya.

⁶⁴Adabwera nkudzamanga zithando zao zankhondo pafupi ndi Betibasi, nazinga mzindawo masiku ambiri ndi makina ankhondo.

⁶⁵Koma Yonatani adamsiya mbale wake Simoni mumzindamo, napita ku miraga ali ndi gulu laling'ono la ankhondo.

⁶⁶Kumeneko adagonjetsa Odomera ndi abale ake ndi ana a Fasironi m'mahema mwao. Kenaka adaputa ozinga aja ndi kumenyana nawo.

⁶⁷Simoninso adatuluka ndi anzake natentha makina ankhondo a adani.

⁶⁸Aŵiriwo adamenyana ndi Bakide, namgonjetseratu. Tsono iye ataona kuti zolinga zake ndi nkhondo yake zapita pachabe,

⁶⁹adapsa mtima chifukwa cha anthu okana chipembedzo chao aja, amene adaamlangiza kuti abwere m'dzikomo. Adapha anthu ambiri mwa iwo, nayamba kukonzekera zoti abwerere ku dziko lakwao.

⁷⁰Yonatani atamva zimenezi adamtumira amithenga kuti apangane naye za mtendere ndi kupempha kuti aŵabwezere anthu amene adaaŵagwira ku nkhondo.

⁷¹Bakide adaŵalandira bwino amithengawo, navomera mau a Yonatani. Adamlonjeza molumbira kuti sadzamchitanso zoipa masiku onse a moyo wake.

⁷²Adambwezera anthu amene adaaŵagwira aja, ndipo iye adabwerera kwao, osapondanso dziko la Yuda.

⁷³Motero nkhondo idaleka kuvutanso Aisraele, ndipo Yonatani adakakhala ku Mikimasi. Adayamba kulamulira anthu ake, nachotsa anthu okana chipembedzo pakati pa Aisraele.