Read Buku Loyera - Chichewa 2 Am. 10 Bible Online

2 Am. 10 - Buku Loyera - Chichewa bible

2 Am. 10

¹Makabeo ndi anzake adalandanso Nyumba ya Mulungu ndi mzinda wa Yerusalemu, Ambuye akuŵatsogolera.

²Adagumula maguwa amene alendo adaamanga pa bwalo la mzinda; adaononganso malo ao ena achipembedzo.

³Atayeretsa Nyumba ya Mulungu, adamanga guwa lina lansembe. Tsono adayatsa moto popekesa mwala, naperekanso nsembe, chinthu chimene sichidachitike pa zaka ziŵiri. Kenaka adafukiza lubani, nayatsa nyale nkuikanso mitanda ya buledi pamaso pa Ambuye.

⁴Atatero, adadzigwetsa chafufumimba, napempha Ambuye kuti asaŵagwetserenso mazunzo otereŵa, koma akadzachimwanso adzaŵalange mwachifundo, osaŵaperekanso kwa mitundu ina ya anthu onyoza Mulungu ndi ankhalwe.

⁵Tsiku limene adayeretsanso Nyumba ya Mulungu linali tsiku lomwe alendo aja adaaiipitsa, linali tsiku la 25 la mwezi wa Kisilevi.

⁶Onse adakondwa nachita chikondwerero pa masiku 8, monga pa chikondwerero chamahema. Nthaŵi imeneyo ankakumbukira kuti si kale kwambiri, pa masiku a chikondwerero chamahema omwewo, ankagona pa mapiri ndi m'mapanga ngati nyama zakuthengo.

⁷Koma tsopano ndodo za makaka amaluŵa, nthambi za mitengo yokongola ndiponso za kanjedza zili m'manja, ankaimba nyimbo zotamanda Mulungu amene adaŵathandiza kuyeretsa bwino Nyumba yake.

⁸Pambuyo pake adapanga lamulo lodziŵika kwa onse, la kuti Ayuda onse azidzakumbukira masiku ameneŵa chaka chilichonse.

⁹Zimenezi ndiye zomwe zidachitika pa kufa kwa Antioko, wotchedwa Epifane.

¹⁰Tsopano tisimbe za Antioko Eupatore, mwana wake wa sapemphera uja, ndipo tinene mwachidule zoipa zotsatira nkhondo zake.

¹¹Iyeyo ataloŵa ufumu adaika Lisiyasi kuti akhale woyang'anira ntchito za boma, ndiponso kuti akhale bwanamkubwa wa ku Celesiriya ndi Fenisiya.

¹²Ptolemeyo Makroni ndiye adayamba kuchitira Ayuda zolungama pokumbukira zonse zosalungama zimene adaazipirira; ndipo adayesetsa kuŵaweruza mwamtendere.

¹³Nchifukwa chake abwenzi ena a mfumu adakamneneza kwa Eupatore. Tsono Makroni ankamva anthu akunena kaŵirikaŵiri kuti iyeyo anali wopereka dziko lake kwa adani, poti adaasiya Kipro, mzinda umene Filometore adaamsungiza, kukagwirizana ndi Antioko Epifane. Poona kuti sankathanso kudzisungira ulemu woyenera udindo wake, adadzipha pakumwa zumu.

¹⁴Pamene Gorjiyasi adasanduka bwanamkubwa wa dziko la Idumeya, anali ndi gulu la asilikali aganyu, ndipo kaŵirikaŵiri ankamenyana nkhondo ndi Ayuda.

¹⁵Komanso Aidume ena amene ankakhala m'nyumba zankhondo zamphamvu, sankalekanso kumenyana ndi Ayuda. Ankalandira bwino anthu ochotsedwa kwao ku Yerusalemu, ndipo ankayesayesa ndithu kupitiriza nkhondo.

¹⁶Koma Makabeo ndi anthu ake, atapemba mwaulemu ndi kupempha kuti Mulungu aŵathandize, adathamangira ku nyumba zankhondo za Aidumezo.

¹⁷Adaŵathira nkhondo mwamphamvu, ndipo adagonjetsa amene ankamenya nkhondo pa malinga, nalanda nyumba zankhondozo. Adapha onse amene adaŵapeza, motero adapha anthu osachepera 20,000.

¹⁸Koma anthu okwanira 9,000 adathaŵira ku maboma ena aŵiri ankhondo olimba kwambiri, ndipo anali ndi zida zokwanira zoti nkulimbana ndi nkhondo yoŵazinga.

¹⁹Makabeo adasiya Simoni, Yosefe ndi Zakeyo kumeneko, pamodzi ndi anthu ao, okwanira kuzinga mabomawo. Iyeyo adapita kwina kumene anali wofunika koposa.

²⁰Koma anthu ena a Simoni anali okonda ndalama, choncho adalandira chiphuphu kwa anthu okhala m'maboma aja. Ndiye atalandira makilogramu 64 a siliva, adaŵalola ena kuti athaŵe.

²¹Pamene Yudasi adamva zimenezo, adasonkhanitsa akuluakulu a anthu, natulutsa mlandu wakuti anthu aja adagulitsa abale ao ndi ndalama, polola kuti adaniwo athaŵe ndi kudzamenyana nawonso.

²²Tsono adaŵapha anthu osakhulupirikawo, kenaka posachedwa nkulanda maboma aŵiri ankhondo aja.

²³Nthaŵi zonse Yudasi akamamenya nkhondo, ankapambanadi; choncho adapha anthu opitirira 20,000 m'maboma aŵiriwo.

²⁴Koma Timoteo, uja Ayuda adaamgonjetsa kaleyu, adasonkhanitsa gulu lalikulu la ankhondo achilendo napita ku Asiya kukatenga anthu ambirimbiri okwera pa akavalo. Adafika kuti adzakanthe Ayuda ndi kuŵagonjetsa.

²⁵Iyeyo akuyandikira, anthu a Makabeo adayamba kupemphera kwa Mulungu, adadzithira phulusa kumutu, nkuvala ziguduli m'chiwuno.

²⁶Adadzigwetsa chafufumimba pa makwerero apaguwa, napemphera kwa Ambuye kuti aŵachitire chifundo, kuti akhale mdani wa adani ao, ndipo kuti athyole adani olimbana nawo, monga momwe adaalonjezera m'Malamulo.

²⁷Atatha kupemphera, adatenga zida zao nayenda mpaka kutali ndi mzinda. Atafika pafupi ndi adani ao, adaima.

²⁸Mbandakucha adayamba kumenyana nkhondo ndi adani aowo. Ena ankakhulupirira kuti adzapambana osati chifukwa cha kulimba mtima kwao kokha, koma makamaka chifukwa cha chithandizo cha Ambuye, pamene enawo ankayesa kuti ukali waowo ndiwo udzaŵapambanitse.

²⁹Nkhondoyo italimba kwambiri, adani a Ayudawo adaona kumwamba anthu asanu oŵala kwambiri, atakwera pa akavalo okhala ndi zitsulo zagolide m'kamwa, akutsogolera Ayuda.

³⁰Anthuwo adaaika Makabeo pakati pao, ndipo ankamtchinjiriza ndi malaya ao achitsulo ndi zida zao kuti angapwetekedwe. Ankaponya mivi ndi ziphaliŵali pa adaniwo. Pamenepo iwo adaniwo adathobwa m'maso nkusokonezeka. Adamwazikana mwachipwirikiti nkukanthidwa kotheratu.

³¹Oyenda pansi 20,500 adaphedwa pamodzi ndi 600 okwera pa akavalo.

³²Timoteo mwiniwake adathaŵira ku mzinda wankhondo wolimba kwambiri wa Gazara, umene Kereasi ankaulamulira.

³³Anthu a Makabeo adakondwera poona zimenezi, nazinga mzindawo masiku anai.

³⁴Anthu amumzindamo ankakhulupirira mphamvu za mzinda wao, namangotukwana koopsa ndi kulankhula mau onyoza.

³⁵Koma mbandakucha tsiku lachisanu lake, anyamata makumi aŵiri a gulu la Makabeo, popsa mtima ndi mau oipawo, adalimba mtima nkukwera pamwamba pa malinga. Ndiye mwa ukali wao ankangobaya aliyense wokumana naye.

³⁶Anzao ena adaŵatsatira nkumamenyana ndi adani ku mbali ina. Adatentha nsanja zankhondo, nayatsa miyulu ya nkhuni nkuŵatentha otukwanawo ali amoyo. Ena adathyola zitseko za mzinda, natsekulira njira ankhondo anzao otsala, ndipo adalanda mzindawo.

³⁷Adampeza Timoteo atabisala m'chitsime chouma. Adamupha pamodzi ndi Kereasi mbale wake, ndiponso Apolofane.

³⁸Atatsiriza zonsezi, adaimba nyimbo zothokoza ndi kuyamika Ambuye amene adaŵachitira zabwino Aisraele, naŵapambanitsa motero.