Read Buku Loyera - Chichewa 2 Am. 11 Bible Online

2 Am. 11 - Buku Loyera - Chichewa bible

2 Am. 11

¹Patapita nthaŵi pang'ono, Lisiyasi, nkhoswe ya mfumu ndiponso wachibale wake, amene anali nduna yaikulu ya boma, adavutika nazo zimene zidachitikazo.

²Adasonkhanitsa anthu 80,000 pamodzi ndi okwera pa akavalo ake onse, napita kukachita nkhondo ndi Ayuda. Ankaganiza zosandutsa mzinda wa Yerusalemu kuti ukhale mzinda Wachigriki.

³Ankati adzakhometse msonkho Nyumba ya Mulungu ya ku Yerusalemu, monga m'mene ankachitira ndi malo achipembedzo a anthu akunja. Ankafunanso kuti chaka chilichonse azidzagulitsa ukulu wa mkulu wa ansembe.

⁴Sankalabadako za mphamvu za Mulungu, koma ankangonyadira zikwi ndi zikwi za ankhondo ake, ndipo zikwi za ankhondo ake okwera pa akavalo, ndi njovu zake makumi asanu ndi atatu.

⁵Tsono adaloŵa ku Yudeya, nakafika ku Betizure, mzinda wankhondo wotalikana ndi Yerusalemu ngati makilomita makumi atatu, nauzinga.

⁶Yudasi Makabeo ndi anthu ake atamva kuti Lisiyasi akuzinga mizinda yao yankhondo, adapemphera kwa Ambuye, akudandaula ndi kulira, kuti atume mngelo wabwino wodzapulumutsa Israele.

⁷Makabeo ndiye amene adayamba kutenga zida zake, nalangiza anzake kuti asaope ngakhale kutaya moyo wao pamodzi naye, kuti potero athandize abale ao. Pamenepo onse adathamangirako pamodzi.

⁸Asanapite kutali ndi Yerusalemu, wina wokwera pa kavalo adaŵaonekera atavala nsalu zoyera, akuŵatsogolera, zida zagolide zili m'manja.

⁹Tsono onsewo pamodzi adayamika Mulungu wachifundo; adalimba mtima, nakonzekera kumenya nkhondo, osati ndi anthu okha, koma ndi zilombo zaukali zomwe, ngakhalenso malinga achitsulo.

¹⁰Adasendera ali m'mizere yankhondo ali ndi woŵathandiza wakumwamba, chifukwa Ambuye adaaŵachitira chifundo.

¹¹Adalumphira adani ao ngati mikango, napha anthu 11,000, okwera pa akavalo 1,600, ena onse nkuthaŵa,

¹²Ambiri mwa iwo adathaŵa ali olasidwa atataya zida zao. Lisiyasi nayenso adapulumutsa moyo wake pakuthaŵa monyozeka.

¹³Koma poti Lisiyasiyo sanali wopusa, adayamba kulingalira za tsoka limene lidamgwera, nkumvetsa kuti Ayuda analidi anthu osagonjetseka, chifukwa Mulungu Wamphamvu ndiye ankaŵathandiza. Tsono adaŵatumira amithenga,

¹⁴kukaŵachonderera kuti avomerezane za kugwirizananso mwachilungamo. Ndipo adalonjeza kuti iye adzachonderera mfumu kuti ikhale bwenzi lao.

¹⁵Makabeo atalingalira za zimene zingaŵakhalire bwino anthu ake, adavomera mau onse a Lisiyasi. Nayonso mfumu idavomera zonse zimene Makabeo adalembera Lisiyasi.

¹⁶Kalata imene Lisiyasi adalembera Ayuda inali yotere: “Lisiyasi akupereka moni kwa gulu lonse la Ayuda!

¹⁷Yohane ndi Abisalomu amene mudaŵatuma kuno adandipatsa kalata yanu, nandipempha kuti ndikuyankheni.

¹⁸Zonse zoyenera kudziŵitsa mfumu ndidaidziŵitsa, ndipo idavomera zonse zimene zingatheke.

¹⁹Mukalimbika kukhala okhulupirika ku boma, ineyo ndidzachita zotheka kukuthandizani kuti zanu zikuyendereni bwino.

²⁰Tsono ndalamula amithenga anga ndi anu omwe kuti akambe nanu pa zonse zimene tagwirizana.

²¹Tsalani bwino. Chaka cha 148 tsiku la 24 la mwezi wa Dioskore.”

²²Kalata ya mfumu inali yotere: “Mfumu Antioko akupereka moni kwa mbale wake Lisiyasi!

²³Popeza kuti tsopano atate athu adapita kwa milungu yao, ife timafuna kuti anthu a m'dziko mwathu azigwira ntchito zao mosavutika.

²⁴Tidamva zoti Ayuda safuna kutsata Chigriki, monga m'mene atate athu ankafunira, koma akufunitsitsa kusunga miyambo yao ndi mazoloŵero ao.

²⁵Ndiye popeza kuti inenso ndikufuna kuti fuko lao lisavutikenso, ndikulamula kuti uŵabwezere Nyumba yao ya Mulungu, ndipo kuti uŵalole kumatsata miyambo ya makolo ao.

²⁶Nchifukwa chake ndi bwino kuti uŵadziŵitse zimenezi ndi kuŵatsimikizira zoti ndikuchita nawo ubwenzi, kuti choncho adziŵe zofuna zathu ndi kutikhulupirira, ndipo kuti azikhala akuyendetsa zinthu zao mokondwa.”

²⁷Kalata ya mfumu kwa Ayuda inali yotere: “Ine, Mfumu Antioko, ndikupereka moni kwa akulu a Ayuda ndi kwa Ayuda ena onse.

²⁸Ngati muli bwino, ndimo m'mene tikufunira ife. Ifenso tili bwino.

²⁹Menelasi adatidziŵitsa zakuti mukufuna kubwerera kwanu ndi kumakasamalanso ntchito zanu.

³⁰Tsono onse amene akufuna kubwerera kwao lisanafike tsiku la 30 mwezi wa Ksantiko, atha kupita mwamtendere popanda chovuta.

³¹Tikuloladi kuti Ayudanu muzidya chakudya chanu, ndipo kuti muzitsata malamulo anu, monga momwe munkachitira kale. Sipadzakhalanso Myuda ndi mmodzi yemwe amene ena adzamvute chifukwa cha cholakwa chimene adachichita mosadziŵa.

³²Ndikutuma Menelasi kuti adzakulimbitseni mtima.

³³Tsalani bwino. Chaka cha 148, tsiku la 15 la mwezi wa Ksantiko.”

³⁴Aromanso adalembera Ayuda kalata yotere: “Kwinto Memiusi ndi Tito Maniusi, akazembe a ku Roma, akupereka moni kwa Ayuda.

³⁵Zimene Lisiyasi, mbale wa mfumu, adakuuzani, ifenso tazilola zimenezo.

³⁶Koma zina zimene adaganiza kuti nzoyenera kuzifotokozera kwa mfumu, mutaziganizira bwino eniakenu, mutitumizire uthenga mwamsanga, kuti tithe kukunenerani kwa mfumu, poti tikupita ku Antiokeya.

³⁷Tsono mufulumire, tumizani anthu msanga, tidziŵe zimene mukufuna.

³⁸Tsalani bwino. Chaka cha 150, tsiku la 15 la mwezi wa Ksantiko.”