Read Buku Loyera - Chichewa 2 Am. 4 Bible Online

2 Am. 4 - Buku Loyera - Chichewa bible

2 Am. 4

¹Simoni uja, amene adaulula za chuma chija nkuukira dziko lake lomwe, ankasinjirira Oniyasi. Ankati ndiye amene adaanyenga Heliodoro namchititsa zoipa zonse zija.

²Tsono Oniyasiyo, amene ankachitira mzinda zaufulu, namateteza anthu a m'dziko lake, ndi kusunga bwino Malamulo a Mulungu, Simoni uja sadaope kumneneza kuti ndi munthu woukira boma.

³Chidani chake chidakula kotero kuti mmodzi mwa abwenzi a Simoniyo adapha anthu ena.

⁴Pamenepo Oniyasi adaona kuti chidanicho chinali choopsadi, ndipo kuti Apoloniyo mwana wa Menesiteo, bwanamkubwa wa ku Celesiriya ndi ku Fenisiya, ankakwerezera njiru ya Simoni.

⁵Tsono adanka kwa mfumu, osati kuti akaneneze anthu a m'dziko lake, koma chifukwa chofuna ubwino wa onse pamodzi ndi wa aliyense.

⁶Iye adaamvetsa bwino kuti popanda chigamulo cha mfumu, kunali kosatheka kuti mtendere uwonekenso kapena kuti Simoni aleke makhalidwe ake openga.

⁷Seleuko uja atafa, Antioko Epifane adaloŵa ufumu wake. Tsono Yasoni, mbale wa Oniyasi, adalanda udindo wa mkulu wa ansembe popereka chiphuphu.

⁸Adanka kwa mfumu nailonjeza kuti adzaipatsa makilogramu 12,000 asiliva ndi makilogramu ena 2,700 ochokera kwina.

⁹Adalonjezanso kuti adzapereka makilogramu ena 5,000, ngati adzamloleza kumanga sukulu yophunzitsa maseŵera osiyanasiyana ndi kukhazikitsa gulu la achinyamata, kenaka kulemba anthu a ku Yerusalemu kuti asanduke nzika za ku Antiokeya.

¹⁰Mfumu idavomera, ndipo Yasoni chifukwa cha udindo wake, adayamba kuphunzitsa anthu am'dzikomo makhalidwe achigriki.

¹¹Adafafaniza zilolezo zachifundo zimene mafumu adaapatsa Ayuda chifukwa cha Yohane, bambo wa Eupoleme, amene adaamtuma kwa Aroma kuti akachite nawo chipangano cha chigwirizano ndi cha chibwenzi. Yasoniyo adathetsa miyambo yotsata Malamulo, nayambitsa miyambo ina yotsutsana ndi Malamulowo.

¹²Sadaope kumanga sukulu yophunzitsa maseŵera ija pansi pa boma lankhondo, ndipo adachita zoti anyamata a mabanja aulemu aziphunzirako miyambo Yachigriki.

¹³Tsono Chigriki chidabuka, ndipo ambiri adayamba kutsata miyambo yachilendo, chifukwa cha kuipa kwakukulu kwa Yasoni uja, amene anali munthu wosasamala za Mulungu ndi wosayenera kukhala mkulu wa ansembe mpang'ono pomwe.

¹⁴Pakati pa zoipa zonsezi ansembe nawonso adayamba kuleka changu chogwira ntchito zapaguwa. Adanyoza Nyumba ya Mulungu, nalekanso kupereka nsembe. Koma ankati akangomva chingerengere choitana anthu ku maseŵera, iwo ndiye liŵiro kuthamangira komweko kukachita nawo maseŵerawo.

¹⁵Adaaleka kusamala zaulemu za makolo ao, koma ankangokonda ulemu Wachigriki.

¹⁶Nchifukwa chake adapeza zovuta kwambiri. Anthu aja amene ankaŵatsanzira makhalidwe ao, nafuna kuti afanefane nawo, omwewo adasanduka adani ao oŵalanga.

¹⁷Zoonadi, munthu sanganyoze Malamulo a Mulungu popanda kulangidwa konse. Motero zimene zidachitika pambuyo pake zidatsimikizadi mau ameneŵa.

¹⁸Nthaŵi ina ku Tiro kunali maseŵera a pa chaka chachisanu chilichonse, ndipo mfumu inali komweko.

¹⁹Tsono Yasoni woipa uja adatuma nthumwi kumeneko kuchokera ku Yerusalemu, zolembedwa ngati nzika za ku Antiokeya. Zidatenga makilogramu 10,000 a siliva kukalipirira nsembe zopereka kwa Herkulesi. Koma onyamula ndalamazo adaganiza zoti asaperekere nsembe ndalamazo, chifukwa kunali kulakwa kutero, tsono adaganiza zoti achitire zinthu zina.

²⁰Motero ndalama zimene eni ake oŵatuma adaafuna kuti aperekere nsembe kwa Herkulesi, iwo adapangira zombo zankhondo.

²¹Apoloniyo, mwana wa Menesiteo, atamtuma ku Ejipito kuti akaonerere nao mwambo wokhazika mfumu Filometore pa mpando, Antioko adamva kuti mfumuyo sinkaukonda ufumu wa Menesiteo. Tsono iye adaganiza zodziteteza, motero atafika ku Yopa, adapitirira mpaka ku Yerusalemu.

²²Yasoni adamlandira mwaulemu, pamodzi ndi anthu onse amumzindamo. Pomulandira anthu adayatsa miyuni, namaimba nyimbo zomulemekeza. Pambuyo pake Antioko adapita ku Fenisiya ndi gulu lake lankhondo.

²³Patapita zaka zitatu, Yasoni adatuma Menelasi, mbale wa Simoni uja, kuti akapereke ndalama kwa mfumu, ndi kukampempha kuti apereke chigamulo pa nkhani zina zikuluzikulu.

²⁴Koma Menelasi atadzaima pamaso pa mfumu adaikoka mtima ndi maonekedwe ake aulamuliro, ndipo adalanda Yasoni udindo wake wokhala mkulu wa ansembe onse popereka kwa mfumu makilogramu 10,000 a siliva kuposa ndalama zija zimene adaapereka Yasoni.

²⁵Atalandira makalata kwa mfumu otsimikizira ukuluwo adabwerera ku Yerusalemu. Analibe kanthu kalikonse komuyenereza kukhala mkulu wa ansembe onse, koma anali ndi makhalidwe a munthu wankhalwe ndi waukali ngati chilombo.

²⁶Choncho Yasoni amene adaalanda ukulu wa mbale wake, nayenso wina adamlanda, ndipo adathaŵira ku dziko la Aamoni.

²⁷Tsono Menelasi adakhala mkulu wa ansembe, koma sankapereka ndalama zija zimene adaalonjeza kwa mfumu.

²⁸Komabe Sositrate, mkulu wolamulira ku boma lankhondo, ankamulonjerera kuti alipire, malinga nkuti inali ntchito yake kukhometsa msonkho. Choncho mfumu idaŵaitana onse aŵiriwo.

²⁹Menelasi adasiyira mbale wake Lisimake ngati mbadiri wake pa ntchito ya ukulu wa ansembe, ndipo Sositrate adasiyira Krate, mkulu wa ankhondo a ku Kipro ngati mbadiri wake.

³⁰Nthaŵi imeneyo anthu a ku Tariso ndi a ku Malusi adachita chiwembu, chifukwa choti mfumu idaapereka mizinda yao iŵiriyo kwa Antiokisi, mzikazi wake.

³¹Mfumu idapita mofulumira kuti ikaweruze milanduyo, nisiya ngati mbadiri wake Androniko, mmodzi mwa akuluakulu.

³²Menelasi adaaganiza kuti imeneyo ndiyo inali nthaŵi yabwino. Choncho adaba ziŵiya zina zagolide ku Nyumba ya Mulungu, nazipereka kwa Androniko ngati mphatso. Zina anali atazigulitsa kale ku Tiro ndi ku mizinda ina pafupi pake.

³³Oniyasi atamva zimenezo, adakabindikira m'malo opulumukiramo ku Dafine, pafupi ndi ku Antiokeya, ndipo adadzudzula Menelasi poyera.

³⁴Nchifukwa chake Menelasi adatenga Androniko paseri, namuuza kuti aphe Oniyasi. Tsono Androniko adapita kwa Oniyasi namunyengerera kuti akungofuna kugwirako dzanja lake lamanja, nalumbira za mtendere. Ngakhale Oniyasi ankapenekabe mu mtima, adavomera kutulukako kumene ankabindikira kuja, ndipo Androniko adamupha pomwepo, osasamala za chilungamo.

³⁵Nchifukwa chake si Ayuda okha, komanso anthu ambiri a maiko ena adamva chisoni nakhumudwa chifukwa cha kupha munthu wotere popanda chilungamo.

³⁶Motero mfumu itabwerera kuchokera ku Silisiya, Ayuda a ku Antiokeya ndi Agriki ena odana ndi makhalidwe ankhalwe, adafika kwa mfumu naidandaulira za imfa ya Oniyasi, amene adaphedwa popanda chifukwa.

³⁷Antioko adamva chisoni mumtima mwake navutika kwambiri, ndipo adalira misozi pokumbukira makhalidwe ofatsa ndi nzeru za munthu wakufayo.

³⁸Ali wopsa mtima kwambiri, adamlanda Androniko mwinjiro wake wofiirira, namung'ambira zovala zake. Adayenda naye mu mzinda monsemo mpaka kukafika pamalo pomwe adaaphera Oniyasi. Ndipo pomwepo, adamupha munthu wokhetsa magaziyo. Choncho Ambuye adamlanga monga momwe kudamuyenera.

³⁹Masiku amenewo Lisimake uja adaba zinthu zambiri za m'Nyumba ya Mulungu mumzindamo, mbale wake Menelasi nkumamuthandiza. Mbiri imeneyo itamveka, anthu adasonkhana nkumuukira Lisimakeyo chifukwa ziŵiya zambiri zagolide zinkasoŵa.

⁴⁰Ataona ukali ndi unyinji wa omuukirawo, Lisimake adapatsa anthu 3,000 zida zankhondo, naŵalamula kuti akaŵathire nkhondo Ayudawo. Mtsogoleri wa asilikaliwo anali munthu wina dzina lake Aurano, wa zaka zambiri ndi wopusanso kwambiri.

⁴¹Koma Ayuda adaadziŵa kuti nkhondoyo yachokera kwa Lisimake, ena adatola miyala, ena adatenga mitengo, enanso ngakhale phulusa lomwe linali pomwepo, zonsezo nkumamuponya Lisimake ndi ankhondo ake; motero padachitika chisokonezo chachikulu.

⁴²Adalasa adani ambiri, ena nkuŵapha, ndipo ena onse adathaŵa. Ngakhale Lisimakeyo, amene adaaba zinthu zoyera, adamupha pafupi ndi chipinda cha bokosi la chuma.

⁴³Tsono mlanduwo adausenzetsa Menelasi.

⁴⁴Pamene mfumu idadza ku Tiro, anthu atatu amene akuluakulu adaŵatuma, adabwera kudzamuimba mlandu.

⁴⁵Atadziŵiratu kuti mlandu umuipira, Menelasi adalonjeza kwa Ptolemeyo, mwana wa Dorimene, kuti adzampatsa ndalama zambiri ngati amnenerako zabwino kwa mfumu.

⁴⁶Tsono Ptolemeyo adatengera mfumu pambali m'khonde, ngati kuti akufuna kukapumula mozizira, ndipo adachita zoti mfumu isinthe maganizo.

⁴⁷Tsono mfumu idagamula kuti Menelasi ngwosapalamula konse, chonsecho amene adaayambitsa zoipa ndi iyeyo. Kenaka idagamula kuti aphedwe anthu aja amene adaatulutsa mlandu. Koma tsono anthu opanda mwaiwo akadadandaula kwa Asiti ankhalwe aja, bwenzi iwo atagamula kuti ngosapalamula.

⁴⁸Motero anthuwo, amene adaafuna kuteteza mzinda ndi anthu ake ndiponso zinthu zoyera, adaphedwa choncho mofulumira popanda cholakwa konse.

⁴⁹Tsono anthu a ku Tiro adanyansidwa nacho choipacho, ndipo adapereka chuma chao kuti anthu akufawo aikidwe mwaulemu kwambiri.

⁵⁰Koma Menelasi uja sadamchotse pa udindo wake, poti akukuakulu olamulira m'dzikomo ankakonda chuma kwambiri. Kuipa kwake kudanka kukulirakulira, mpaka adasanduka mdani wamkulu wa anthu a mtundu wake.