Read Buku Loyera - Chichewa 2 Am. 7 Bible Online

2 Am. 7 - Buku Loyera - Chichewa bible

2 Am. 7

¹Adagwiranso abale asanu ndi aŵiri[4] pamodzi ndi amai ao. Mfumu idaafuna kuŵaumiriza, pakuŵazunza ndi zikoti ndi zingwe zokwapulira, kuti adye nyama yankhumba, imene Malamulo ankaletsa.

²Mmodzi mwa iwowo adalankhula m'malo mwa onse, adati, “Kodi mukuyembekeza kumva chiyani pakutifunsafunsa? Ifetu tili okonzeka kufa, koma zophwanya malamulo a makolo athu ai.”

³Mfumu idapsa mtima, ndipo idalamula kuti aike ziwaya ndi miphika pa moto.

⁴Antchito adachita zimenezo mwamsanga. Ndipo mfumu idalamula kuti amdule lilime amene ankalankhulayo, ndipo kuti asende khungu la pamutu pake, ndi kumdula manja ndi mapazi ake, abale akewo ndi amai ake omwe akuwona.

⁵Atampandula chotero, mfumu idalamula kuti amuike pa moto akupumabe, ndipo amkazinge pa chiwaya. Utsi wochokera pa chiwaya udadzaza ponsepo, koma amai ake ndi abale ake adalimbitsana mtima kuti afe mopanda mantha.

⁶Adati, “Ambuye Mulungu akutiyang'ana ndipo mosapeneka akutimvera chisoni, monga momwe Mose adaatsimikizira pa nyimbo yake yotsutsa anthu osamvera, imene imati, ‘Adzachitira atumiki ake chifundo.’ ”

⁷Woyambayo atafa chotero, adabwera ndi wachiŵiri kuti iyenso amuzunze. Ozunzawo adasenda khungu la kumutu kwake tsitsi lili komweko, ndipo adamfunsa kuti, “Kodi ukuvomera kudya nyama yankhumba, kapena tikudule chiwalochiwalo?”

⁸Iye adayankha m'chilankhulo cha makolo ake kuti, “Sindidya ai.” Tsono iyenso anthu adamuzunza ngati mbale wake woyamba uja.

⁹Ali pafupi kufa, iye adati, “Iwe woipawe, ukutilanda moyo uno, koma Mfumu ya zolengedwa zonse idzatiwukitsa kuti itipatse moyo wosatha, ife amene tikuphedwa chifukwa chomvera Malamulo ake.”

¹⁰Pambuyo pake adazunza wachitatu. Ozunzawo atamulamula, pompo iye adapereka lilime lake natambalitsa manja ake mopanda mantha.

¹¹Adalankhula molimba mtima kuti, “Ndidalandira ziwalozi kwa Mulungu, koma tsopano kwa ine Malamulo ake ndiye chinthu chachikulu koposa ziwalozo. Ndipo ndikukhulupirira kuti Iyeyo adzandibwezera ziwalo zangazo.”

¹²Mfumu pamodzi ndi onse amene anali naye pomwepo adadabwa ndi kulimba mtima kwa mnyamatayo, popeza kuti mazunzowo sankaŵayesa kanthu.

¹³Atafa iyeyo, adazunza wachinai ndi mazunzo a mtundu womwewo.

¹⁴Ali pafupi kufa iye adati, “Ngodala amene aphedwa ndi anthu, nakhulupirira Mulungu kuti adzaŵaukitsa. Koma iwe Antioko, kuuka kopatsa moyo sudzakuwona ai.”

¹⁵Kenaka adabwera ndi wachisanu nayamba kumuzunzanso. Koma iye adapenyetsetsa mfumu, nati,

¹⁶“Iwe ngakhale ndiwe munthu chabe, uli ndi mphamvu zolamula anthu ena, ndipo umachita zokomera iweyo. Koma usamaganize kuti Mulungu wasiya mtundu wathu.

¹⁷Tadikira, udzaona mphamvu zake zazikulu zimene adzakusautsa nazo, iweyo pamodzi ndi zidzukulu zako.”

¹⁸Pambuyo pake adabwera ndi wachisanu ndi chimodzi. Ali pafupi kufa iye adati, “Usadzinyenge. Ifeyo tikuwona zovuta zimenezi chifukwa tidachimwira Mulungu wathu, nchifukwa chake zoipa zoterezi zatigwera.

¹⁹Koma iwe, usaganize kuti sudzalangidwa nako kulimbana ndi Mulungu ukuchitaku.”

²⁰Mai wao ndiye adakhala wodabwitsa kupambana onse, ndipo ngwoyenera kumkumbukira ndithu. Ngakhale adaona ana ake alikufa tsiku limodzi, adapirira zimenezo molimba mtima chifukwa chokhulupirira Ambuye.

²¹Adalangiza aliyense m'chilankhulo cha makolo ake. Chifukwa cha nzeru zake zotamandika, adalimbitsa maganizo ake achikazi ndi mtima wachimuna.

²²Adauza ana ake kuti, “Ine sindikudziŵa kaya inuyo mudapangidwa bwanji m'mimba mwanga. Mpweya ndi moyo sindidakupatseni ndine. Ziwalo za matupi anu, sindidakonze ndine.

²³Adachita zimenezo ndi Mlengi wa zonse, amene amakonza za kubadwa kwa anthu ndi kulongosola chiyambi cha zinthu zonse. Mwa chifundo chake adzakubwezeraninso mpweya ndi moyo, poti mwadziiŵala chifukwa cha kukonda Malamulo ake.”

²⁴Antioko ankaganiza kuti maiyo akumpeputsa, choncho adaipidwa nawo mau akewo. Popeza kuti mwana wamng'ono anali moyobe, mfumu idayesa kumkopa osati ndi mau chabe, koma adamlonjeza molumbira kuti adzampatsa chuma ndi zina zambiri zosiririka, akasiya miyambo ya makolo ake. Adatinso adzakhala bwenzi la mfumu nadzalandira udindo wapamwamba.

²⁵Koma mnyamatayo sadasamale mau akewo. Apo mfumu idauza mai wake kuti amlangize mwana wakeyo nzeru zoti apulumutse moyo wake.

²⁶Mfumuyo itakamba naye kwambiri, maiyo adavomera kutero.

²⁷Koma atamuŵeramira mwana wake uja, adapusitsa mfumu yankhalweyo ponena m'chilankhulo cha makolo ake kuti, “Mwana wanga, undimvere chifundo. Ine ndidakusunga miyezi isanu ndi inai m'mimba mwanga, ndipo ndidakuyamwitsa zaka zitatu. Ndidakulera, ndidakudyetsa ndi kukusamala mpaka chaka chimene chino.

²⁸Ndapota nawe mwana wanga, uyang'ane kumwamba ndi dziko lino lapansi. Uwone zonse zimene zimakhalamo, ndipo uzindikire kuti ndi Mulungu amene adazilenga zonsezo, pomwe panalibe kanthu kalikonse. Momwemonso adalenga mtundu wonse wa anthu.

²⁹Usamuwope wopha anthuyu, koma ulimbe mtima ngati abale ako ndi kulola kufa, kuti mwa chifundo cha Mulungu iwenso ndidzakupeze pamodzi ndi abale akowo.”

³⁰Mai wake akulankhulabe, mnyamatayo adati, “Kodi anthunu, mukudikira chiyani? Malamulo a mfumu sindiŵamvera, ine ndimamvera Malamulo amene Mose adasiyira makolo athu.

³¹Ndipo iwe amene udaganiza zoipa zamitundumitundu zosautsira Ahebri, dzanja la Mulungu sudzalilewa ai.

³²Ifetu tikusauka chifukwa cha zolakwa zathu.

³³Ambuye amoyo atikwiyira nthaŵi pang'ono, kuti atilange ndi kutiwongola, koma adzayanjananso ndi atumiki ake.

³⁴Koma iwe wosamverawe, wonyansitsa kwambiri mwa anthu onse, usanyade mopusa ndi kukhulupirira zachabe pamene mukuzunza ana a Mulungu.

³⁵Ndithu sunapulumukebe ku mlandu wa Mulungu Wamphamvuzonse amene amaona zonse.

³⁶Abale athu atapirira zosautsa nthaŵi pang'ono, afika ku moyo wosatha umene Mulungu adatilonjeza. Koma iwe, Mulungu adzakuweruza ndipo udzalandira chilango cholingana ndi kunyada kwako.

³⁷Ine monga momwe adachitira abale anga, ndikupereka pano thupi langa ndi moyo wanga, chifukwa cha malamulo a makolo athu. Ndikupempha Mulungu kuti amvere chifundo fuko lathu mwamsanga, koma akusautse iweyo ndi kukuzunza, mpaka utavomera kuti Iye yekha ndiye Mulungu.

³⁸Ndikupemphanso kuti pa imfa yanga ndi ya abale anga, Wamphamvuzonse aleke pomwepo mkwiyo wake umene udaayeneradi kugwera fuko lathu lonse.”

³⁹Pamenepo mfumu idapsa mtima kwambiri niipidwa nazo zonyozazo. Idazunza mnyamatayo kupambana ena aja.

⁴⁰Tsono mwanayo adafa ali wangwiro, ataika chikhulupiriro chake mwa Ambuye.

⁴¹Potsiriza pake adapha mai wao, ana ake onse aja ataphedwa.

⁴²Zithere pomwepa nkhani zosimba za m'mene Ayuda ankaŵakakamizira kuti adye zansembe zoletsedwa, ndiponso za kuzunzidwa kwao.