Read Buku Loyera - Chichewa Lk. 1 Bible Online

Lk. 1 - Buku Loyera - Chichewa bible

Lk. 1

¹Ateofilo[1] olemekezeka, Anthu ambiri adayesa kulongosola[2] mbiri ya zinthu zimene zidachitika pakati pathu.

²Iwo adalemba zimene adaatisimbira anthu oziwona chamaso[3] kuyambira pachiyambi pake, nakhala akuzilalika.

³Tsono popeza kuti inenso ndalondola mosamala kwambiri m'mene zonsezo zidachitikira kuyambira pa chiyambi, ndaganiza kuti nkwabwino kuti ndikulembereni zimenezo mwatsatanetsatane.

⁴Ndatero kuti mudziŵe ndithu kuti zimene adakuphunzitsanizo nzoonadi.

⁵Pa nthaŵi imene Herode anali mfumu ya dziko la Yudeya, kunali wansembe wina, dzina lake Zakariya, wa gulu la ansembe la Abiya.[4] Mkazi wake Elizabeti anali wa fuko la Aroni.[5]

⁶Aŵiri onsewo anali olungama pamaso pa Mulungu, ndipo ankatsata mokhulupirika malamulo ndi malangizo onse a Ambuye.

⁷Adaalibe mwana, chifukwa Elizabeti anali wosabala, ndipo aŵiri onsewo anali okalamba.

⁸Tsiku lina Zakariya ankagwira ntchito yake yaunsembe pamaso pa Mulungu. Inali nthaŵi ya gulu lake la ansembe kutumikira.

⁹Potsata dongosolo lao la ansembe,[6] iye adaasankhidwa mwamaere kuti akaloŵe m'Nyumba ya Mulungu kukafukiza lubani.

¹⁰Khamu lonse la anthu linkapemphera kunja pa nthaŵi yofukiza lubaniyo.

¹¹Tsono mngelo wa Ambuye adaonekera Zakariya. Mngeloyo adaaimirira ku dzanja lamanja la guwa lofukizirapo lubani.

¹²Zakariya adadzidzimuka pomuwona, nachita mantha.

¹³Koma mngeloyo adamuuza kuti, “Usaope, Zakariya, Mulungu wamva pemphero lako. Mkazi wako Elizabeti adzakubalira mwana wamwamuna, ndipo udzamutcha dzina lake Yohane.

¹⁴“Udzakondwa ndi kusangalala, anthu ambirinso adzakondwa chifukwa cha kubadwa kwake,

¹⁵popeza kuti iye adzakhala wamkulu pamaso pa Ambuye. Sazidzamwa konse vinyo kapena choledzeretsa china chilichonse. Adzakhala wodzazidwa ndi Mzimu Woyera ngakhale asanabadwe nkomwe.

¹⁶Adzatembenuza Aisraele ambiri kuti abwerere kwa Ambuye, Mulungu wao.

¹⁷Molimba mtima ndiponso mwamphamvu monga mneneri Eliya, adzatsogolako Ambuye akubwera. Adzayanjanitsanso makolo ndi ana ao, adzatembenuza anthu osamvera kuti akhale ndi nzeru zonga za anthu olungama. Adzakonzera Ambuye anthu okonzekeratu kuŵatumikira.”

¹⁸Zakariya adafunsa mngeloyo kuti, “Kodi ndingadziŵe bwanji kuti zimenezi nzoona? Ineyo ndine nkhalamba, mkazi wanga nayenso wakalamba.”

¹⁹Mngeloyo adati, “Ine ndine Gabriele, amene ndimakhala kufupi ndi Mulungu. Iyeyo wachita kundituma kuti ndilankhule nawe ndi kukuuza uthenga wabwinowu.

²⁰Iweyo sudakhulupirire zimene ndanenazi, koma zidzachitika ndithu pa nthaŵi yake. Nchifukwa chake udzakhala duu, osatha kulankhula, kufikira tsiku lodzachitika zimenezi.”

²¹Nthaŵi yonseyo anthu aja ankadikira Zakariya, nkumadabwa kuti akuchedwa m'Nyumba ya Mulungumo.

²²Pamene iye adatuluka, sadathe kulankhula nawo. Apo iwo adazindikira kuti m'Nyumbamo waona china chake m'masomphenya. Iye adalankhula nawo ndi manja okha, osathanso kunena mau.

²³Atatha masiku ake otumikira m'Nyumba ya Mulungu, adapita kwao.

²⁴Pambuyo pake mkazi wake Elizabeti adatenga pathupi, nabindikira miyezi isanu.

²⁵Adati, “Ambuye andichitira zotere: nthaŵi inoyi andiwonetsa chifundo chao, andichotsa manyazi pakati pa anthu.”

²⁶Elizabeti ali ndi pathupi pa miyezi isanu ndi umodzi, Mulungu adatuma mngelo Gabriele ku mudzi wina wa ku Galileya, dzina lake Nazarete.

²⁷Adamtuma kwa namwali wina wosadziŵa mwamuna amene anali atafunsidwa mbeta ndi mwamuna, dzina lake Yosefe, wa fuko la mfumu Davide. Namwaliyo dzina lake anali Maria.

²⁸Mngelo uja adadza kwa iye nati, “Moni, inu amene Mulungu wakukomerani mtima kotheratu. Ambuye ali nanu.”

²⁹Maria adadzidzimuka nawo kwambiri mau ameneŵa, nayamba kusinkhasinkha kuti kodi moni umenewu ndi wa mtundu wanji?

³⁰Mngeloyo adamuuza kuti, “Musaope, Maria, Mulungu wakukomerani mtima.

³¹Mudzatenga pathupi, ndipo mudzabala mwana wamwamuna. Mudzamutcha dzina lake Yesu.

³²“Adzakhala wamkulu, ndipo adzatchedwa Mwana wa Mulungu Wopambanazonse. Ambuye Mulungu adzamlonga ufumu wa kholo lake Davide,

³³ndipo adzakhala Mfumu ya Aisraele mpaka muyaya. Ufumu wake sudzatha konse.”

³⁴Koma Maria adafunsa mngeloyo kuti, “Zimenezi zidzachitika bwanji, popeza kuti sindidziŵa mwamuna?”

³⁵Mngeloyo adayankha kuti, “Mzimu Woyera adzakutsikirani, ndipo mphamvu za Mulungu Wopambanazonse zidzakuphimbani. Nchifukwa chake Mwana wodzabadwayo adzakhala Woyera, ndipo adzatchedwa Mwana wa Mulungu.

³⁶“Onani, mbale wanu uja Elizabeti, nayenso akuyembekezera mwana wamwamuna mu ukalamba wake. Anthu amati ngwosabala, komabe uno ndi mwezi wake wachisanu ndi chimodzi.

³⁷Pajatu palibe kanthu kosatheka ndi Mulungu.”

³⁸Apo Maria adati, “Ndine mtumiki wa Ambuye; zindichitikire monga mwaneneramo.” Ndipo mngeloyo adamsiya.

³⁹Patapita masiku oŵerengeka, Maria adanyamuka napita mofulumira ku dera lamapiri, ku mudzi wina wa ku Yudeya.

⁴⁰Adakaloŵa m'nyumba ya Zakariya, malonjera Elizabeti.

⁴¹Pamene Elizabeti adamva malonje a Maria, mwana adayamba kutakataka m'mimba mwake. Elizabeti adadzazidwa ndi Mzimu Woyera,

⁴²ndipo adalankhula mokweza mau kuti, “Ndinu odala kupambana akazi ena onse, ngwodalanso Mwana wanu.

⁴³Ine ndine yani kuti inu, mai wa Ambuye anga, mudzandiyendere?

⁴⁴Chifukwatu pamene ndinamva malonje anu, mwana anayamba kutakataka ndi chimwemwe m'mimba mwanga.

⁴⁵Ndinu odala chifukwa mudakhulupirira kuti zimene Ambuye adakuuzani, zidzachitadi.”

⁴⁶Pamenepo Maria adati, “Mtima wanga ukutamanda Ambuye,

⁴⁷ndipo mzimu wanga ukukondwera mwa Mulungu, Mpulumutsi wanga,

⁴⁸popeza kuti wayang'ana kutsika kwa mtumiki wake. Ndithu kuyambira tsopano anthu a mibadwo yonse adzanditcha wodala,

⁴⁹pakuti Iye amene ali wamphamvu wandichitira zazikulu, ndipo dzina lake nloyera.

⁵⁰Amaŵachitira chifundo anthu a mibadwo ndi mibadwo amene amamlemekeza.

⁵¹Wachita zamphamvu ndi dzanja lake, wabalalitsa anthu a mtima wonyada.

⁵²Mafumu amphamvu waŵatsitsa pa mipando yao yachifumu, anthu wamba nkuŵakweza.

⁵³Anthu anjala waŵakhutitsa ndi zabwino, anthu olemera nkuŵabweza osaŵapatsa kanthu.

⁵⁴Wadzathandiza anthu ake Aisraele, pokumbukira chifundo chake.

⁵⁵ Izi ndi zomwe adaalonjeza kuti adzaŵachitira makolo athu akale aja, Abrahamu ndi zidzukulu zake mpaka muyaya.”

⁵⁶Maria atakhala ndi Elizabeti ngati miyezi itatu, adabwerera kwao.

⁵⁷Nthaŵi yakuti Elizabeti achire idakwana, ndipo adabala mwana wamwamuna.

⁵⁸Anzake ndi abale ake atamva kuti Ambuye amchitira chifundo chachikulu chotere, adakondwera naye pamodzi.

⁵⁹Pa tsiku lachisanu ndi chitatu mwanayo atabadwa, adadza naye kuti amuumbale, nafuna kumutcha dzina la bambo wake Zakariya.

⁶⁰Koma mai wake adakana, adati, “Iyai, koma atchedwe Yohane.”

⁶¹Pamenepo anthuwo adamuuza kuti, “Koma pakati pa abale anu palibe amene ali ndi dzina limeneli.”

⁶²Tsono adalankhula ndi bambo wake ndi manja, namufunsa kuti, “Mukufuna kuti timutche dzina lanji?”

⁶³Zakariya adapempha cholemberapo, nalembapo kuti, “Dzina lake ndi Yohane.” Anthu onsewo adazizwa.

⁶⁴Pomwepo Zakariya adathanso kulankhula, nayamba kutamanda Mulungu.

⁶⁵Anzao onse aja adagwidwa ndi mantha, ndipo mbiri ya zimenezi idawanda ku dera lonse la mapiri a ku Yudeya.

⁶⁶Anthu onse amene ankazimva, ankazilingalira m'mitima mwao, ndi kumadzifunsa kuti, “Kodi mwana ameneyu adzakhala munthu wotani?” Pakuti zinkachita kuwonekeratu kuti Ambuye anali naye.

⁶⁷Tsono Zakariya, bambo wa Yohaneyo, adadzazidwa ndi Mzimu Woyera, nayamba kulankhula mau ochokera kwa Mulungu. Adati,

⁶⁸“Atamandike Ambuye, Mulungu wa Aisraele, chifukwa adadzayendera anthu ao, ndi kudzaŵaombola.

⁶⁹Adautsa wina, wa fuko la mtumiki wake Davide, kuti akhale Mpulumutsi wathu wamphamvu.

⁷⁰Izi ndi zomwe Iye adaaneneratu kalekale kudzera mwa aneneri ake oyera mtima.

⁷¹Adaalonjeza kuti adzatipulumutsa kwa adani athu, ndi kwa onse odana nafe.

⁷²Choncho Iye waŵachitiradi chifundo makolo athu akale, ndipo wakumbukira chipangano chake choyera.

⁷³Adalonjezanso Abrahamu, kholo lathu, molumbira,

⁷⁴kuti adzatipulumutsa kwa adani athu, kuti tizimtumikira mopanda mantha,

⁷⁵kuti tikhale oyera mtima ndi olungama pamaso pake, masiku onse a moyo wathu.

⁷⁶Tsono mwana iwe, udzatchedwa mneneri wa Mulungu Wopambanazonse, chifukwa udzatsogola pamaso pa Ambuye, kuti ukonzeretu njira zao.

⁷⁷Udzadziŵitsa anthu ao kuti Mulungu adzaŵapulumutsa pakuŵakhululukira machimo ao.

⁷⁸Mulungu wathu ndi wa chifundo chachikulu, adzatitumizira kuŵala kwa dzuŵa lam'maŵa kuchokera Kumwamba.

⁷⁹Kuŵala kwake kudzaunikira onse okhala mu mdima wabii ngati wa imfa, kudzatitsogolera pa njira ya mtendere.”

⁸⁰Mwana uja Yohane ankakula nasanduka wa mkhalidwe wamphamvu. Pambuyo pake adakhala ku chipululu mpaka tsiku limene adadziwonetsa poyera pakati pa Aisraele.