Read Buku Loyera - Chichewa Deut. 11 Bible Online

Deut. 11 - Buku Loyera - Chichewa bible

Deut. 11

¹Muzikonda Chauta, Mulungu wanu, ndipo nthaŵi zonse muzimvera malamulo ndi malangizo ake onse.

²Popeza kuti si ana anu, koma ndinu amene mudazidziŵa ndi kuziwona zakale zonsezo, mukumbukire za Chauta, Mulungu wanu. Ukulu wake mudauwona, mudaonanso dzanja lake lamphamvu ndi mkono wake wotambalitsa.

³ Mudaona zizindikiro ndi ntchito zimene Chauta adachita polanga Farao ndi dziko lake lonse.

⁴ Mudaona zimene adachita polimbana ndi ankhondo a ku Ejipito ndiponso ndi akavalo ndi magaleta ao. Pamene iwo ankathamangitsa inu, mudaona m'mene Chauta adalamulira madzi a Nyanja Yofiira[1] kuti aŵaphimbe ndi kuŵaononga onsewo.

⁵Mudaona zonse zimene Chauta adakuchitirani m'chipululu muja, musanafike kuno.

⁶ Mudaona zimene Chauta adachita pa Datani ndi pa Abiramu, ana a Eliyabu, a fuko la Rubeni. Pamaso pa Aisraele onse nthaka idatsekuka nkuŵakwirira anthuwo, pamodzi ndi a m'banja mwao, mahema ao ndi zoŵeta zao zomwe.

⁷Zoonadi mudaona zazikulu zonse zimene Chauta adachita.

⁸Muzimvera zonse zimene ndakulamulani lerozi. Tsono mukatero, mudzakhala amphamvu, ndipo mudzaloŵa ndi kukhazikika m'dzikomo.

⁹Mudzakhaladi nthaŵi yaitali m'dziko lamwanaalirenjilo, limene Chauta adalumbira kuti adzapatsa makolo anu ndi zidzukulu zao.

¹⁰Dziko limene mukukakhalamolo likusiyana ndi dziko la Ejipito kumene mudachokera. Kumene kuja munkati mukafesa mbeu zanu, munkachita kuthirira ngati m'madimba.

¹¹Koma dziko limene mukukaloŵamolo ndi lamapiri ndi lazigwa. M'dziko limenelo mvula siitha.

¹²Chauta, Mulungu wanu, ndiye amene amasamalira dziko limenelo ndi kumaliyang'anira chaka chonse mosalekeza.

¹³ Nchifukwa chake tsono muzimvera malamulo ndakupatsani leroŵa: kukonda Chauta, Mulungu wanu, ndi kumamtumikira ndi mtima wanu wonse ndi moyo wanu wonse.

¹⁴Ndipo Iye azidzagwetsa mvula m'dziko mwanu pa nthaŵi yake, monga nthaŵi yadzinja ndiponso nthaŵi yachilimwe, kotero kuti mudzakhala ndi tirigu wambiri, vinyo wambiri ndiponso mafuta aolivi ambiri.

¹⁵Adzameretsa udzu woti ng'ombe zanu zizidzadya, ndipo inunso mudzapeza chakudya ndi kukhuta.

¹⁶Chenjerani, musasokeretsedwe ndi kutembenukira kwa milungu ina, kuti muziipembedza ndi kuitumikira,

¹⁷chifukwa Chauta adzakukwiyirani, adzakumanani mvula, ndipo nthaka sidzabalanso zipatso zake. Motero mudzaonongeka msanga m'dziko lokomali limene Chauta akukupatsani.

¹⁸ Malamulo ameneŵa akhale m'mitima mwanu ndi m'maganizo mwanu. Muŵamange pamikono panu ndi pa mphumi pakati pa maso anu, kuti akhale chikumbutso.

¹⁹Muŵaphunzitse kwa ana anu. Muziphunzitsa mutakhala pansi m'nyumba mwanu, kapena muli paulendo, kapena mukupumula, kapena mukugwira ntchito.

²⁰Alembeni pa mphuthu za zitseko za nyumba zanu ndi pa makomo anu.

²¹Pamenepo inu ndi ana anu, mudzakhala ndi moyo nthaŵi yaitali m'dziko limene Chauta, Mulungu wanu, adalumbira kuti adzapatsa makolo anu. Mudzakhala m'dziko limenelo nthaŵi zonse.

²²Muzimvera mokhulupirika zonse zimene ndakuuzanizi. Muzikonda Chauta, Mulungu wanu, muzichita zonse zimene akulamulani, ndipo mukhale okhulupirika kwa Iye.

²³Tsono pamene inu mukupita, Chauta adzapirikitsa mitundu ina yonseyo, ndipo mudzalanda maiko a mitundu ya anthu akuluakulu ndi amphamvu kupambana inu.

²⁴ Nthaka yonse imene mupondepoyo idzakhala yanu. Dziko lanulo lidzayambira ku chipululu kumwera, mpaka ku phiri la Lebanoni kumpoto, ndiponso kuyambira ku mtsinje wa Yufurate kuvuma, mpaka ku Nyanja Yaikulu kuzambwe.

²⁵Palibe munthu ndi mmodzi yemwe amene adzakuletseni. Kulikonse kumene mudzapite m'dziko limenelo, anthu azidzakuwopani, monga momwe Mulungu wakulonjezerani kuti adzaŵachititsa mantha anthu amenewo.

²⁶Lero ndikukupatsani zinthu ziŵiri kuti musankhepo, madalitso kapena matemberero.

²⁷Madalitso kwa inu, mukamamvera malamulo a Chauta, Mulungu wanu, amene ndikukupatsani leroŵa.

²⁸Koma matemberero kwa inu, mukapanda kumvera malamulo ameneŵa, nkusiya njira imene ndikukulamulani lero, kuti mutembenukire kwa milungu ina ndi kumaipembedza, milungu imene nkale lonse simudaipembedzepo.

²⁹ Chauta akadzakuloŵetsani m'dziko limene mukupita kukakhalamolo, muzikalalika madalitso ameneŵa mutakwera pa phiri la Gerizimu, koma matembereroŵa muzikaŵalalika mutakwera pa phiri la Ebala.

³⁰Mapiri aŵiri ameneŵa ali chakuzambwe kutsidya kwa mtsinje wa Yordani, m'dziko la Akanani amene amakhala m'chigwa cha Yordani, pafupi ndi mitengo ya thundu ya ku More, kuyang'anana ndi Giligala.

³¹Muli pafupi kuwoloka Yordani ndi kukakhalamo m'dziko limene Chauta, Mulungu wanu, akukupatsani. Mukakalilandira ndi kukhalamo,

³²mukasamale kumvera malamulo ndi malangizo onse amene ndikukupatsani leroŵa.