Read Buku Loyera - Chichewa Deut. 14 Bible Online

Deut. 14 - Buku Loyera - Chichewa bible

Deut. 14

¹ Inu ndinu anthu a Chauta, Mulungu wanu. Mukamalira maliro, musamadzichekacheka kapena kudzimeta pamphumi.

² Ndinu ake a Chauta, Mulungu wanu, popeza kuti wakusankhulani pakati pa anthu a pa dziko lonse lapansi, kuti mukhale anthu akeake.

³Chilichonse chimene Chauta akuti nchonyansa, musadye.

⁴Nyama zoti muzidya ndi izi: ng'ombe, nkhosa, mbuzi,

⁵ngondo, nswala, mphoyo, mphalapala, ngoma, nyumbu ndi mbalale.

⁶Mungathe kudya nyama iliyonse imene ili ndi ziboda zogaŵikana ndiponso yobzikula.

⁷Koma pakati pa nyama zaziboda kapena zobzikula, musadye izi: ngamira, kalulu ndi mbira, chifukwa ngakhale zimabzikula, koma zilibe ziboda zogaŵikana.

⁸Nkhumbanso ndi yonyansa kwa inu. Ziboda ili nazo, komatu sibzikula. Nyama zimenezi musamadya, ndipo musamazikhudza zikafa.

⁹Mwa zonse zokhala m'madzi mungathe kudya izi: zonse zimene zili ndi zipsepse ndi mamba.

¹⁰Koma zonse zopanda zipsepse ndi mamba ndi zonyansa kwa inu, choncho musadye.

¹¹Mbalame zonse zoyenera kuzidya, mudye.

¹²Koma mbalame zosayenera kuzidya ndi izi: mphungu, nkhwazi, mwimba,

¹³kamtema, khungubwi ndi mtundu uliwonse wa mwimba,

¹⁴mtundu uliwonse wa akhungubwi,

¹⁵nthiŵatiŵa, chipudo, kakoŵa, mtundu uliwonse wa akabaŵi,

¹⁶nkhutukutu, mantchichi, tsakwe,

¹⁷vuwo, dembo, chiswankhono,

¹⁸indwa ndi chimeza ndi zina za mtundu umenewu, ndiponso nsadzu ndi mleme.

¹⁹Ziwala zonse zamapiko ndi zonyansa, choncho musadye zimenezo.

²⁰Koma zonse zamapiko zosaipitsidwa mungathe kudya.

²¹ Nyama iliyonse yofa yokha, musadye. Alendo okha amene mumakhala nawo, alekeni adye, kapena mungogulitsa nyamayo kwa alendo ena. Pajatu inu ndinu opatulika a Chauta, Mulungu wanu. Musaphike mwanawankhosa kapena mwanawambuzi mu mkaka wa make.

²² Chachikhumi muziika padera, ndiye kuti limodzi mwa magawo khumi a zokolola zanu za chaka ndi chaka.

²³Tsono pitani mukakhale pa malo amodzi amene Chauta, Mulungu wanu, adzasankhula kuti anthu azidzampembedzerapo. Ndipo magawo achachikhumi ameneŵa mudyere pa malo amenewo, pamaso pa Mulungu wanu. Magawo ameneŵa ndi a tirigu, vinyo ndi mafuta aolivi, ndiponso ana oyamba kubadwa a ng'ombe ndi a nkhosa. Muzichita zimenezi masiku onse, kuti motero muphunzire kuwopa Chauta, Mulungu wanu.

²⁴Koma mwina mtunda udzakutalikirani chifukwa kwatalikitsa kumalo kumene Chauta, Mulungu wanu, adasankhula kuti anthu azimpembedzerako. Motero inu mudzalephera kupita nawo kumeneko magawo anu achachikhumiwo, amene mwaŵapeza chifukwa cha madalitso a Chauta, Mulungu wanu.

²⁵Pamenepo mugulitse zinthuzo, ndipo ndalama zake mupite nazo ku malo achipembedzowo.

²⁶Ndalamazo mugulire zilizonse zimene mufuna, monga nyama yang'ombe, nyama yankhosa, vinyo ndiponso zakumwa zaukali, malinga nkukhosi kwanu. Tsono inuyo pamodzi ndi mabanja anu, mudzadye ndi kusangalala pamaso pa Chauta, Mulungu wanu.

²⁷Koma Alevi amene mumakhala nawo m'midzi mwanu musaŵaiwale, popeza kuti alibe dziko kapena choloŵa chaochao.

²⁸Chaka chachitatu chilichonse muzibwera ndi magawo onse achachikhumi ochokera ku zopereka zanu za chaka chimenecho, ndi kuŵaika poyera m'midzi mwanu.

²⁹Chakudya chimenechi ncha Alevi, poti alibe zaozao. Ndiponso ncha alendo ndi cha ana amasiye ndi akazi amasiye amene amakhala nanu pamodzi m'midzi mwanu. Anthu otere azibwera kudzatenga zimene akusoŵa. Muzichita zimenezi kuti Chauta, Mulungu wanu, adzakudalitseni pa ntchito zanu zonse.