Read Buku Loyera - Chichewa Deut. 15 Bible Online

Deut. 15 - Buku Loyera - Chichewa bible

Deut. 15

¹Chikatha chaka chachisanu ndi chiŵiri chilichonse, muzikhululukira onse amene adakongola zinthu zanu.

²Zimenezi zizichitika motere: aliyense amene adakongoza Mwisraele mnzake ndalama, afafanize ngongole imeneyo. Asamuumirize kapena mbale wake kuti abweze ndalamazo, popeza kuti Chauta walamula kuti ngongoleyo ifafanizidwe.

³Mungathe kulonjerera ngongole kwa mlendo yekha, koma ngongole ya munthu wa mtundu wanu muifafanize.

⁴Palibe ndi mmodzi yemwe mwa anthu a mtundu wanu amene adzasauke, (poti Chauta, Mulungu wanu, adzakudalitsani m'dziko limene Iye adzakupatsani ngati choloŵa chanu,)

⁵malinga mukamamvera mau ake ndi kusamala zotsata malamulo amene ndikukulamulani leroŵa.

⁶Chauta adzakudalitsani inu monga momwe adalonjezera. Mudzakongoza mitundu yambiri, koma inuyo simudzakongola kwa wina aliyense. Mudzalamulira mitundu yambiri, koma palibe mtundu wina uliwonse umene udzakulamulireni inu.

⁷Pakati pa abale anu pakakhala wina wosauka m'midzi yanu, m'dziko limene Chauta, Mulungu wanu, akukupatsanilo, musadzaume mtima, ndipo musadzaume manja.

⁸Makamaka muzidzamchitira chifundo ndi kumkongoza monga momwe angafunire.

⁹Musadzakhale ndi maganizo achabe akuti, “Chaka chofafaniza ngongole chili pafupi.” Mukapanda kumuwonetsa mtima wachifundo mbale wanu wosaukayo, osampatsa kanthu, iyeyo adzakunenezani kwa Chauta molira, ndipo mudzapezeka olakwa.

¹⁰Dzampatseni mwaufulu mosaŵinya, ndipo Chauta adzakudalitsani pa ntchito zanu zonse.

¹¹ Nthaŵi zonse padzakhala Aisraele ena osauka, osoŵa zinthu. Motero ndikukulamulani kuti otereŵa muzidzaŵachitira chifundo.

¹² Muhebri mnzanu, mwamuna kapena mkazi, akadzigulitsa kwa inu kuti akhale kapolo wanu, mummasule atangokutumikirani zaka zisanu ndi chimodzi zokha. Pa chaka chachisanu ndi chiŵiri, mumlole kuti apite mwaufulu.

¹³Mukammasula, musangomchotsa ali chimanjamanja.

¹⁴Mpatseniko momkomera mtima zonse zimene Chauta adakudalitsa nazoni monga: nkhosa, tirigu ndi vinyo.

¹⁵Kumbukirani kuti mudaali akapolo ku Ejipito, ndipo Chauta, Mulungu wanu, adakuwombolani. Nchifukwa chake ndikukupatsani lamulo limeneli tsopano lino.

¹⁶Koma kapoloyo akakhala kuti akukukondani inu ndi banja lanu, chifukwa mukukhala naye bwino, mwina sangafune nkuchoka komwe. Ngati zili choncho,

¹⁷mutenge zingano ndipo muboole khutu la kapoloyo, mpaka zinganoyo iloŵe m'chitseko. Mukatero, adzakhala kapolo wanu moyo wake wonse. Ngati ndi kapolo wamkazi, mudzamchite chimodzimodzi.

¹⁸Kumasula kapolo, kuti akhale mfulu, kusakuipireni. Adakutumikirani kale zaka zisanu ndi chimodzi pa theka la mtengo wa wantchito wolembedwa. Chitani zimenezi, ndipo Chauta, Mulungu wanu, adzakudalitsani pa ntchito zanu zonse.

¹⁹ Ana onse amphongo oyamba kubadwa a ng'ombe ndi a zoŵeta zina, muŵapatule kuti akhale a Chauta, Mulungu wanu. Ng'ombe zimenezi musazigwiritse ntchito, ndipo nkhosazo musazimete bweya.

²⁰Chaka ndi chaka inu, pamodzi ndi banja lanu, muzidya zimenezi pamaso pa Chauta, Mulungu wanu, ndiponso ku malo amene Chauta adzasankhe.

²¹Koma ngati pali kanthu kolakwika pa nyamayo, monga kutsimphina kapena khungu, kapena chilema chilichonse, musaphere nsembe Chauta nyama yoteroyo.

²²Nyama zotero, mudyere kwanu. Nonsenu, kaya ndinu oyeretsedwa pa za chipembedzo kapena ai, mungathe kudya zimenezo, monga momwe mumadyera mphoyo kapena ngondo.

²³ Magazi okha musadye, koma mungoŵataya pansi ngati madzi.