Read Buku Loyera - Chichewa Deut. 18 Bible Online

Deut. 18 - Buku Loyera - Chichewa bible

Deut. 18

¹Ansembe Achilevi, ndiye kuti fuko lonse la Alevi, asalandireko gawo m'dziko la Israele ngati choloŵa chao. Iwoŵa azidya zoperekedwa nsembe kwa Chauta ndi zina zoyenera Iyeyo.

² Asakhale ndi choloŵa ngati mafuko ena. Choloŵa chao ndi Chauta amene, potsata malonjezo a Mulungu yemweyo.

³Mwa zopereka za anthu, zoyenera kuzilandira ansembeŵa, ndi izi: ng'ombe kapena nkhosa zodzaperekera nsembe, mwendo wamwamba, nyama yam'chibwano ndi chifu.

⁴Ansembe azilandiranso gawo lanu loyambayamba la tirigu, la vinyo, la mafuta aolivi ndiponso la ubweya.

⁵Pa mafuko anu onseŵa Chauta adasankhulapo anthu a fuko la Levi ndi ana ao, kuti azigwira ntchito zaunsembe nthaŵi zonse.

⁶Mlevi aliyense atafuna, angathe kubwera ku malo osankhidwa ndi Chauta kuchokera m'mudzi wina uliwonse ku Israele kumene akukhala.

⁷Ndipo kumeneko atumikire Chauta, Mulungu wake, pa unsembe, monga momwe achitira Alevi ena onse amene akutumikira kumeneko.

⁸Ayenera kulandira chakudya molingana ndi ansembe ena, ngakhale ali ndi ndalama chifukwa chogulitsa za m'banja mwake.

⁹Mukadzaloŵa m'dziko limene Chauta, Mulungu wanu, akukupatsanilo, musakatsate machitidwe onyansa a mitundu ya anthu akumeneko.

¹⁰ Pakati panu pasadzapezeke wopereka mwana wake wamwamuna kapena wamkazi pa moto ngati nsembe. Pasaoneke munthu woombeza kapena woyeseza kulosa zam'tsogolo, kapena wogwiritsa ntchito nyanga kapena zithumwa.

¹¹ Pasapezekenso munthu wopempha nzeru kwa mizimu ya anthu akufa.

¹²Chauta, Mulungu wanu, amadana nawo anthu ochita zoipa zimenezi. Chimene Mulungu akupirikitsira anthuŵa pamene inu mukufika ndi chifukwa chakuti anthuwo ankachita zoipa zoterezi.

¹³ Inu mukhale okhulupirika kwathunthu kwa Chauta, Mulungu wanu.

¹⁴Anthu amene mukukaŵalanda dziko limene mukakhalemolo, amatsata ndi kumvera amatsenga ndi oombeza. Koma inuyo Chauta, Mulungu wanu, sakulolani kuchita zimenezi.

¹⁵ Iye adzakutumizirani mneneri wonga ine wochokera mwa inu amene, ndipo mudzayenera kumumvera iyeyo.

¹⁶Pa tsiku lija mudaasonkhana pa phiri la Horebuli, mudaapempha kuti, “Tisamvenso Chauta, Mulungu wathu, akulankhula, ngakhale kuwonanso moto waukulu choterewu, kuti tingafe.”

¹⁷Apo Chauta adaandiwuza kuti, “Zonse zimene apemphazi anena mwanzeru.

¹⁸Ndidzaŵatumizira mneneri wonga iwe, wochokera mwa iwo amene. Ndidzamuuza zoti anene, ndipo iyeyo azidzauza anthu zonse zimene ndikumlamula.

¹⁹ Mneneriyo akalankhula m'dzina langa, Ine ndidzalanga aliyense wosamvera mau angawo.

²⁰Koma mneneri wina aliyense woyerekeza kulankhula m'dzina langa, Ine osamulamula kuti atero, aphedwe. Ndipo ayeneranso kuphedwa mneneri wina aliyense wolankhula m'dzina la milungu ina.”

²¹Mwina mwake munganene kuti, “Kodi munthu angadziŵe bwanji kuti mau a mneneri wakutiwakuti sakuchokera kwa Chauta?”

²²Munthu akati akulankhula m'dzina la Chauta, ndipo ngati zolankhula zakezo sizichitika, pomwepo dziŵani kuti si mau a Chauta amenewo. Mneneri ameneyo wongolankhula zakezake modzikhulupirira, musamuwope ai.