Read Buku Loyera - Chichewa Deut. 20 Bible Online

Deut. 20 - Buku Loyera - Chichewa bible

Deut. 20

¹Mukadzapita kukamenyana ndi adani anu, ngati muwona kuti magaleta ao ngochuluka kuposa anu, ngamira zao ndi zochulukanso, ndipo ngakhale ankhondo ao omwe ngokuposani, musakaŵaope. Chauta, Mulungu wanu, amene adakupulumutsani ku Ejipito, adzakhala nanu.

²Musanayambe kumenya nkhondo, wansembe abwere, ndipo auze ankhondowo kuti,

³“Imvani, inu Aisraele! Lero mukuyamba kumenya nkhondo ndi adani anu. Musataye mtima ai! Musaŵaope adaniwo, musanjenjemere, musachite mantha.

⁴Chauta, Mulungu wanu, apita nanu Iye yemwe kuti akuthandizeni pa nkhondoyo ndipo kuti akupambanitseni.”

⁵Pamenepo akuluakulu a ankhondo adzauza anthu kuti, “Kodi alipo pano munthu amene wangomanga nyumba yatsopano, koma sanaipereke kwa Mulungu? Ngati alipo abwerere kwao, mwinamwina akaphedwa pa nkhondo, ndiye kuti ndi wina amene adzaipereka nyumbayo.

⁶Kodi alipo pano wina amene wangooka mipesa m'munda, koma osakhala ndi mwai woti nkuthyola mphesa zake? Ngati alipo abwerere kwao, mwinamwina akaphedwa pa nkhondo, ndiye kuti ndi wina amene adzamwe vinyoyo.

⁷Kodi alipo wina pano amene adafunsira mbeta koma mkaziyo sanaloŵane naye? Ngati alipo, abwerere kwao, mwinamwina akaphedwa pa nkhondo, ndiye kuti ndi wina amene adzakwatire mbetayo.”

⁸Pamenepo akuluakuluwo adzafunsanso anthu kuti, “Kodi alipo pano wina aliyense amene akuwopa ndipo mtima wake wafumuka ndi mantha? Ngati alipo, abwerere kwao, kuti angamakadederetse anzake.”

⁹Akuluakulu atamaliza kulankhula ndi gulu lankhondolo, asankhe mtsogoleri pa gulu lililonse.

¹⁰Mukamapita kukathira nkhondo mzinda, poyamba apatseni anthu amumzindawo mwai woti agonje okha.

¹¹Akakutsekulirani zipata nakugonjerani, akhale akapolo anu onsewo, ndipo akugwirireni ntchito yaukapolo.

¹²Koma ngati anthu a mu mzinda umenewo akana kugonja, nasankhula nkhondo, uzingeni mzindawo ndi gulu lanu lankhondo.

¹³Chauta, Mulungu wanu, akakulolani kugonjetsa mzindawo, muphe mwamuna aliyense m'menemo.

¹⁴Koma akazi ndi ana mungoŵagwira, ndipo mutengenso zoŵeta ndi zonse zimene zili mumzindamo ngati zofunkha zanu. Zinthu zonse za adani anu muzigwiritse ntchito, Chauta wakupatsani zimenezo.

¹⁵Umu ndi m'mene muzikachitira ndi mizinda ya kutali ndi inu, imene siili mizinda ya anthu akuno.

¹⁶Koma mukadzalanda mizinda imene ili m'dziko limene Chauta, Mulungu wanu, akukupatsaniyo, muphe aliyense.

¹⁷Muŵaononge kotheratu onse anthu aŵa: Ahiti, Aamori, Akanani, Aperizi, Ahivi ndi Ayebusi, monga momwe Chauta Mulungu wanu adakulamulirani.

¹⁸Iphani onse, kuti angadzakuchimwitseni kuchimwira Chauta, Mulungu wanu, pokuphunzitsani zoipa zimene iwowo amachita akamapembedza milungu yao.

¹⁹Pamene muzinga mzinda nthaŵi yaitali ndi cholinga choti muulande, musagwetse mitengo yake yazipatso, mungathe kudya zipatso zake, koma mitengo yake musagwetse, chifukwa adani anu si mitengoyo.

²⁰Koma mitengo ina yosabereka zipatso mungathe kuidula ndi kumagwira nayo ntchito popanga makina ankhondo okhalirira mzinda umene mukulimbana nawo mpaka mutaugonjetsa.