Read Buku Loyera - Chichewa Deut. 23 Bible Online

Deut. 23 - Buku Loyera - Chichewa bible

Deut. 23

¹Mwamuna aliyense wofulidwa, kapena woduka chiwalo chaumuna, asaloŵe mu msonkhano wa anthu a Chauta.

²Mwana wam'chigololo asaloŵe mu msonkhano wa anthu a Chauta, ngakhale zidzukulu zake mpaka mbadwo wachikhumi.

³ Mwamoni kapena Mmowabu asaloŵe msonkhano wa anthu a Chauta. Ngakhale mdzukulu wao aliyense mpaka mbadwo wachikhumi, asaloledwe kuloŵa mu msonkhano wa anthu a Chauta.

⁴ Iwoŵa sadakupatseniko chakudya kapena madzi pa ulendo wanu uja wochoka ku Ejipito. Ndipo adalemba ntchito Balamu, mwana wa Beori, wa m'mudzi mwa Petori ku Mesopotamiya, kuti akutemberereni.

⁵ Koma Chauta, Mulungu wanu, sadamumvere Balamuyo. Matembererowo adaŵasandutsa madalitso pa inu, popeza kuti adakukondani inu.

⁶Pa masiku onse a moyo wanu musachite kanthu kalikonse kothandiza anthu a mitundu imeneyi, kuti apeze mtendere kapena ubwino.

⁷Musaŵanyoze Aedomu. Amene aja ndi abale anu. Musaŵanyoze Aejipito, popeza kuti kale mudaakhala m'dziko mwao.

⁸Kuyambira pa mbadwo wachitatu mpaka muyaya, zidzukulu zao zingathe kuloŵa nao mu msonkhano wa anthu a Chauta.

⁹Mukakhala m'zithando pa nthaŵi yankhondo, muzilewa zonse zimene zingathe kukulakwitsani.

¹⁰Ngati mwamana aliyense pakati panu waipitsidwa chifukwa chakuti wadzilotera usiku, atuluke m'zithando ndipo akhale kunja kwa zithandozo.

¹¹Madzulo asambe ndithu, ndipo pomaloŵa dzuŵa, abwerere ku zithando.

¹²Kunja kwa zithando, mukonze malo kumene mungathe kumapitako kukadzithandiza.

¹³Mwa zida zanu muzitenga chokumbira, kuti muthe kukumba kadzenje komadzithandizirapo, tsono mutatha, mufotsere.

¹⁴Zithando zanuzo zizikhala zaukhondo, chifukwa Chauta, Mulungu wanu, amayenda pakati pa zithando zanu, kuti akutchinjirizeni ndi kukupambanitsani kwa adani anu. Choncho m'zithando zanu mukhale mwabwino, kuti Chauta asaone kanthu kalikonse konyansa ndi kukufulatirani.

¹⁵Kapolo akathaŵa kwa mbuye wake, nkubwera kwa inu kuti mumsunge, musambweze kwa mbuyakeyo.

¹⁶Angathe kukhala pakati pa inu mu mzinda wanu uliwonse umene angasankhe ndiponso kumene kungamkomere, musamvute ai.

¹⁷ Pakati pa ana a Aisraele pasakhale akazi kapena amuna okhala mahule a ku Nyumba ya Mulungu.

¹⁸Ndalama zozipeza mwa njira yadama yotereyi, yochitika ndi mkazi kapena mwamuna, musabwere nazo ku Nyumba ya Chauta, Mulungu wanu, kuti mukwaniritsire malonjezo anu, poti zimenezi Chauta, Mulungu wanu, amadana nazo.

¹⁹ Mukakongoza mbale wanu ndalama, kapena chakudya kapena kanthu kena kalikonse, musamulipitse chiwongoladzanja pobweza.

²⁰Mlendo yekha mungathe kumlipitsa chiwongoladzanja, koma osati mbale wanu. Lamulo limeneli mulimvere ndithu, ndipo Chauta, Mulungu wanu, adzadalitsa ntchito zanu zonse m'dziko limene mukukakhalamolo.

²¹ Ukachita lonjezo kwa Chauta, Mulungu wako, usazengereze kuchita chimene walonjezacho. Chauta adzakuumiriza kuti uchichite, ndipo kuzengereza nkuchimwa.

²²Koma ngati simulonjeza, apo palibe kulakwa ai.

²³Choncho muzisunga mau amene adatuluka m'kamwa mwanu, chifukwa mudalonjeza mwaufulu kwa Chauta kuti mudzachitadi zimene mudalonjeza.

²⁴Mukamayenda m'njira yodzera m'munda wamphesa wa mnzanu wokhala naye pafupi, mungathe kudyako mphesa zimene mungafune, koma musatengereko m'dengu pochoka.

²⁵Mukayenda m'njira yodzera m'munda watirigu, mungathe kudyako ngala za tirigu mobudula ndi manja, koma musadule tirigu ndi chikwakwa m'munda mwa mnzanuyo.