Read Buku Loyera - Chichewa Deut. 24 Bible Online

Deut. 24 - Buku Loyera - Chichewa bible

Deut. 24

¹ Tiyese kuti munthu wakwatira mkazi, pambuyo pake nkunena kuti mkaziyo sakumfuna, chifukwa choti wampeza cholakwa. Alembe kalata yachisudzulo, ndi kumpatsa mkaziyo pamanja, namchotsa pakhomo pake.

²Mkaziyo akakwatiwa ndi mwamuna wina,

³ndipo pambuyo pake winayonso nkunena kuti sakumfuna, angathe kumlemberanso kalata yachisudzulo nkumpatsa. Mkaziyo atachokapo pakhomopo, kapena mwamuna wachiŵiri uja atafa,

⁴mwamuna wake woyamba uja sayenera kumkwatiranso, ayenera kumuwona ngati woipitsidwa. Kumkwatiranso nkuchimwa pamaso pa Chauta. Tsono musaloŵemo ndi cholakwa m'dziko limene Chauta, Mulungu wanu, akukupatsanilo.

⁵Munthu akangokwatira kumene, musamlembe m'gulu la ankhondo, kapena kumpatsa ntchito ina iliyonse. Papite chaka chathunthu asanachite zimenezi, kuti choncho athe kukhala kwao ndi kumakondweretsa mkazi wake amene adamkwatirayo.

⁶Mukakongoza munthu kanthu, musamtengere mphero yake yoperera tirigu kuti ikhale pinyolo. Kumlanda chimenechi, ndiye kumchotsera chinthu chomuthandiza pa moyo wake.

⁷ Aliyense woba Mwisraele mnzake ndi kumsandutsa kapolo kapena kumgulitsa ngati kapolo, aphedwe ndithu. Motero mudzachotsa choipa chimenechi pakati pa inu.

⁸ Kunena za nthenda ya khate, muwone ndithu kuti mukutsatadi malangizo onse amene ndapatsa ansembe Achilevi, ana a Levi, kuti akuuzeni.

⁹ Kumbukirani zimene Chauta, Mulungu wanu, adamchita Miriyamu, muja munkachokera ku Ejipitomu.

¹⁰ Mukakongoza munthu kanthu, musaloŵe m'nyumba mwake kukatenga chovala chimene afuna kukupatsani ngati pinyolo.

¹¹Inu mukhale panja, mwini wakeyo achite kukupatsani yekha.

¹²Ngati munthuyo ndi wosauka, chovala chapinyolocho chisakagone kwanu.

¹³Chibwezeni dzuŵa lisanaloŵe, kuti iye afunde usiku. Apo adzakuthokozani, ndipo Chauta, Mulungu wanu, adzakondwera nanu.

¹⁴ Wantchito wolembedwa amene ali mmphaŵi ndi wosoŵa, musamamdyerera, ngakhale akhale mnansi wanu kapena mlendo wokhala mumzinda mwanu m'dziko lanulo.

¹⁵Tsiku lililonse dzuŵa lisanaloŵe, muzimlipira malipiro a tsikulo. Ndalamazo akuzisoŵa iyeyo ndipo akuŵerengera zomwezo. Mukapanda kumlipira, adzakulirirani kwa Mulungu ndipo mudzatsutsidwa kuti ndinu ochimwa.

¹⁶ Makolo asafere zolakwa za ana ao. Momwemonso ana asafere zolakwa za makolo ao. Munthu aphedwe chifukwa cha zoipa za iye mwini.

¹⁷ Alendo kapena ana amasiye musaŵalande zao zoŵayenera, poŵapotozera mlandu wao. Ndipo mkazi wamasiye musamlande chovala kuti chikhale pinyolo ya ngongole.

¹⁸Kumbukirani kuti paja mudaali akapolo ku Ejipito, ndipo kuti Chauta, Mulungu wanu, adakuwombolani kumeneko. Nchifukwa chake ndakupatsani lamulo limeneli.

¹⁹ Mukamakolola dzinthu m'minda mwanu, zina pang'ono nkuiŵalika, musabwerere kukatenga zoiŵalikazo. Zimenezo muzisiyire alendo okhala nanu, ana amasiye ndi akazi amasiye, ndipo Chauta, Mulungu wanu, adzakudalitsani pa ntchito zanu zonse.

²⁰Mutatha kukolola olivi koyamba, musapitemonso m'mitengomo kukatenga zotsala. Zimenezo ndi za alendo okhala nanu, za ana amasiye ndi akazi amasiye.

²¹Mutha kuthyola koyamba mphesa zanu, koma musapitemonso kachiŵiri m'mitengomo. Mphesa zotsalazo ndi za alendo okhala nanu, za ana amasiye ndi akazi amasiye.

²²Mukumbukire kuti mudaali akapolo m'dziko la Ejipito. Nchifukwa chake ndakupatsani lamulo limeneli.