Read Buku Loyera - Chichewa Deut. 27 Bible Online

Deut. 27 - Buku Loyera - Chichewa bible

Deut. 27

¹Pambuyo pake Mose, ali pamodzi ndi akuluakulu a Aisraele adauza anthu kuti, Muzimvera malamulo onse omwe ndikukupatsani leroŵa.

² Pa tsiku limene muzaoloke mtsinje wa Yordani ndi kuloŵa m'dziko limene Chauta, Mulungu wanu, akukupatsani, mudzaimiritse miyala yaitali, ndipo mudzaikulungize.

³Mutatero, mudzalembepo mau onse a malamulo ameneŵa, mukakaloŵa m'dziko lamwanaalirenjilo, limene Chauta, Mulungu wa makolo anu, adakulonjezani.

⁴Mutaoloka Yordani, mudzaimiritse miyala imeneyi pa phiri la Ebala, monga momwe ndakulamulirani lero, ndipo mukaikulungize.

⁵ Kumeneko mukamangeko guwa la Chauta, Mulungu wanu, guwa la miyala yosasema ndi chitsulo chilichonse.

⁶Guwalo likhale la miyala yosasema. Muzikapereka pamenepo nsembe zopsereza kwa Chauta, Mulungu wanu.

⁷Ndipo muzikaphera ndi kudyera nsembe zachiyanjano komwekonso, ndi kumakhala okondwa pamaso pa Chauta, Mulungu wanu.

⁸Pamiyalapo mudzalembepo mau onse a malamulo ameneŵa mooneka bwino.

⁹Pamenepo Mose pamodzi ndi ansembe Achilevi adauza Aisraele kuti: Mverani inu Aisraele, ndipo tcherani khutu. Lero mwasanduka anthu ake a Chauta, Mulungu wanu.

¹⁰Tsono mumvereni, ndipo musunge malamulo ndi malangizo ake onse amene ndikukupatsani leroŵa.

¹¹Tsiku lomwelo Mose adauza Aisraele kuti,

¹² Mukangooloka Yordani, mafuko amene adzaima pa phiri la Gerizimu, pamene madalitso adzatchulidwa pa Aisraele, ndi aŵa: Simeoni, Levi, Yuda, Isakara, Yosefe ndi Benjamini.

¹³Koma mafuko ena amene adzaimirire pa phiri la Ebala, pamene matemberero adzatchulidwe pa Aisraele, ndi aŵa: Rubeni, Gadi, Asare, Zebuloni, Dani ndi Nafutali.

¹⁴Ndipo Alevi azidzanena mau aŵa mokweza kuti,

¹⁵ “Atembereredwe aliyense wopanga fano losema kapena loumba, namalipembedza mobisa. Chauta amanyansidwa nacho chinthu chopanga mmisiricho.” Ndipo anthu onse adzayankhe kuti, “Inde, momwemo!”[2]

¹⁶ “Atembereredwe aliyense wosalemekeza atate ndi amai ake.” Ndipo anthu onse adzayankhe kuti, “Inde, momwemo!”

¹⁷ “Atembereredwe aliyense wosuntha malire a mnansi wake.” Ndipo anthu onse adzayankhe kuti, “Inde, momwemo!”

¹⁸ “Atembereredwe aliyense wosokeza munthu wakhungu.” Ndipo anthu onse adzayankhe kuti, “Inde, momwemo!”

¹⁹ “Atembereredwe aliyense woweruza mopotoza milandu ya alendo, ya ana amasiye, ndi ya akazi amasiye.” Ndipo anthu onse adzayankhe kuti, “Inde, momwemo!”

²⁰ “Atembereredwe aliyense wogona ndi mkazi wa bambo wake, chifukwa wavula mkazi wa bambo wake.” Ndipo anthu onse adzayankhe kuti, “Inde, momwemo!”

²¹ “Atembereredwe aliyense wogona ndi nyama.” Ndipo anthu onse adzayankhe kuti, “Inde, momwemo!”

²² “Atembereredwe aliyense wogona ndi mlongo wake, kapena mlongo wake wa mimba ina.” Ndipo anthu onse adzayankhe kuti, “Inde, momwemo!”

²³ “Atembereredwe aliyense wogona ndi mpongozi wake.” Ndipo anthu onse adzayankhe kuti, “Inde, momwemo!”

²⁴“Atembereredwe aliyense wopha mnzake mwachinsinsi.” Ndipo anthu onse adzayankhe kuti, “Inde, momwemo!”

²⁵“Atembereredwe onse olandira chiphuphu kuti aphe munthu wosalakwa.” Ndipo anthu onse adzayankhe kuti, “Inde, momwemo!”

²⁶ “Atembereredwe aliyense wosavomereza ndi wosatsata malamulo amene tatchulaŵa.” Ndipo anthu onse adzayankhe kuti, “Inde, momwemo!”