Read Buku Loyera - Chichewa Deut. 33 Bible Online

Deut. 33 - Buku Loyera - Chichewa bible

Deut. 33

¹Mose, munthu wa Mulungu uja, asanafe, adapereka madalitso kwa Aisraele.

²Poŵadalitsapo adanena mau akuti, “Chauta adabwera kuchokera ku phiri la Sinai, natitulukira kuchokera ku Seiri, ndipo adatiŵalira kuchokera ku phiri la Parani. Angelo zikwi khumi anali naye pamodzi, moto woyaka unali m'manja mwake.

³Chauta amakonda anthu ake ndipo amatchinjiriza onse amene ali opatulikira Iye. Anthuwo amaphunzira kwa Chauta, amamvera malangizo ake,

⁴ndiye kuti malamulo amene adatipatsa Mose. Malamulowo ndi chuma chopambana cha mtundu wa Yakobe.

⁵Chauta adakhala mfumu ya anthu ake Aisraele, pamene mafuko ao ndi atsogoleri ao adasonkhanitsidwa pamodzi.”

⁶Ponena za fuko la Rubeni, Mose adati, “Rubeni asafafanizike, akhalitse ndithu, ngakhale anthu ake ali pang'ono.”

⁷Za fuko la Yuda, adati, “Inu Chauta, mverani pamene iwo akulira, athandizeni, ndipo muŵalumikizenso ndi mafuko ena. Inu Chauta, muŵalimbikitse kuti adziteteze okha, ndipo muŵathandize polimbana ndi adani ao.”

⁸ Za fuko la Levi adati, “Inu Chauta, Tumimu ndi Urimu adziŵitse kufuna kwanu kudzera mwa Alevi, atumiki anu okhulupirika. Mudaŵayesa ku Masa kuja, ndipo mudalimbana nawo ku madzi a Meriba kuja.

⁹Iwo adaonetsa kuti ankakhulupirira Inu kupambana makolo ao, abale ao kapenanso ana ao. Adamvera malamulo anu, ndipo adakhulupirika pa chipangano chanu.

¹⁰Iwowo ndiwo adzaphunzitse ana a Yakobe malangizo anu ndi Aisraele malamulo anu. Adzafukiza lubani pamaso panu, adzapereka nsembe zathunthu zopsereza pa guwa lanu.

¹¹Inu Chauta, thandizani fuko lao kuti likhale lamphamvu, zochita zao zikukondwetseni. Otsutsana nawo ndi odana nawo onse muŵaononge, kotero kuti asadzadzukenso.”

¹²Za fuko la Benjamini adati, “Fuko ili ndilo limene Chauta amalikonda, ndipo amalitchinjiriza. Tsiku ndi tsiku Chauta amalisunga, pokhala m'kati mwa dziko laolo.”

¹³Za fuko la Yosefe adati, “Chauta adalitse dziko lao, likhale la mvula yambiri, ndipo la zitsime zochuluka.

¹⁴Dziko lao lidalitsidwe pokhala ndi zipatso zopsa ndi dzuŵa, likhalenso ndi zokolola zochuluka pa nyengo iliyonse.

¹⁵Mapiri ao akalekaleŵa akutidwe ndi zipatso, ndipo adzazidwe ndi zokolola zochuluka.

¹⁶Dziko lao likhale ndi dzinthu dzopambana, lidalitsidwe ndi zokoma za Chauta amene adalankhula m'chitsamba choyaka chija. Madalitso onseŵa atsikire fuko la Yosefe, popeza kuti anali mtsogoleri pakati pa abale ake.

¹⁷Yosefe ali ndi mphamvu zonga za ng'ombe yamphongo, nyanga zake ndi zonga za njati, adzapirikitsa anthu a mitundu ina ndi nyanga zimenezi. Onsewo adzaŵapirikitsira ku malekezero a dziko. Nyanga zimenezi ndi anthu zikwi khumi za Efuremu ndipo anthu zikwi za Manase.”

¹⁸Za mafuko a Zebuloni ndi Isakara, adati, “Zebuloni akondwere pa malonda ake, Isakara akondwere m'zithando mwake.

¹⁹Ku mapiri ao amaitanirako mitundu ya anthu, kumeneko amaperekako nsembe zoyenera, chifukwa choti amapeza chuma pochita malonda m'nyanja, kuchokera mu mchenga wa m'mbali mwa nyanja.”

²⁰Za fuko la Gadi, adati, “Alemekezeke Chauta amene adakulitsa dziko la Gadi. Gadi amalalira ngati mkango waukazi, amamwetula dzanja ndi bade la mutu lomwe.

²¹Adadzitengera dziko labwino kuti likhale lao, gawo la mtsogoleri lidaperekedwa kwa iwowo. Adasunga maweruzo ndi malamulo a Chauta pamene atsogoleri a Aisraele adasonkhanitsidwa pamodzi.”

²²Za fuko la Dani adati, “Dani ali ngati mwana wamkango, amene amalumpha kuchokera ku Basani.”

²³Za fuko la Nafutali, adati, “Chauta wakomera mtima Nafutali namdalitsa kwambiri. Dziko lake lifika mpaka kumwera kuchokera ku nyanja ya Galileya.”

²⁴Za fuko la Asere, adati, “Asere ndi wodalitsidwa kupambana mafuko ena. Abale ake amkonde, dziko lake likhale lachuma, la mitengo ya olivi.

²⁵Midzi yake itchinjirizidwe ndi zitseko zachitsulo m'malinga, mphamvu zake zikhalitse monga masiku a moyo wake.”

²⁶Inu Aisraele, palibe mulungu wina wofanafana ndi Mulungu wanu, amene amayenda ndi ulemerero mu mlengalenga, amakwera pa mitambo namabwera kudzakuthandizani.

²⁷Chauta ndiye amene ali kothaŵirako ndipo pa dziko lapansili amakusungani ndi mphamvu zosatha. Adathaŵitsa adani anu onse pamene munkayenda, ndipo adakuuzani kuti muŵaononge onse.

²⁸Motero Aisraele ali pa mtendere, zidzukulu za Yakobe zikusungidwa bwino m'dzikomo m'mene tirigu ndi vinyo sizisoŵa, m'mene mame amangogwa kuchokera kumwamba.

²⁹Iwe Israele, ndiwetu wodala, wofanafana nawe palibe. Ndiwe mtundu umene Chauta adaupulumutsa. Chauta weniweniyo ndiye chishango chako ndi lupanga lako, ndiye amene amakutchinjiriza ndi kukupambanitsa. Adani ako adzafika kudzapempha kuti uŵachitire chifundo, koma iwe udzaŵapondereza pansi.