Read Buku Loyera - Chichewa Deut. 7 Bible Online

Deut. 7 - Buku Loyera - Chichewa bible

Deut. 7

¹ Chauta, Mulungu wanu, adzakufikitsani m'dziko limene mukudzakhalamolo, ndipo mitundu ina yonse ya anthu adzaipirikitsa m'dzikomo. Iye adzachotsamo mitundu isanu ndi iŵiri ya anthu otchuka ndi amphamvu kupambana inu. Mitunduyo ndi iyi: Ahiti, Agirigasi, Aamori, Akanani, Aperizi, Ahivi ndi Ayebusi.

²Chauta, Mulungu wanu, akadzapereka anthu ameneŵa kwa inu ndipo mukadzaŵagonjetsa, mudzaŵaononge onsewo. Musakayanjane nawo, kapena kuŵachitira chifundo.

³Musakakwatirane nawo, ndiye kuti musakalole ana anu kukwatirana nawo,

⁴kuti angadzaŵasokeretse kuŵachotsa kwa Chauta, Mulungu wanu, namakapembedza nawo milungu ina. Mukadzatero, Chauta adzakukwiyirani, ndipo adzakuwonongani mwamsanga.

⁵ Anthu amenewo mudzaŵachite izi: mudzaphwanye maguwa ao, mudzaphwanye miyala yoimiritsa yopembedzapo, mudzagwetse mafano ao aja a Aserimu, ndipo mudzatenthe mafano ao osema.

⁶ Inu ndinu mtundu wopatulika wa Chauta, Mulungu wanu. Mulungu adasankha inu kuti mukhale anthu ake pakati pa anthu onse a pa dziko lapansi.

⁷Mulungu pokukondani ndi kukusankhani inu, sadachitire kuti munkaposa anthu ena onse pakuchuluka. Paja mudaali ochepa ndinuyo pakati pa mitundu yonse.

⁸Koma Chauta adakukondani, ndipo adafunadi kusunga malumbiro amene adaachita ndi makolo anu. Nchifukwa chake adakupulumutsani ndi mphamvu zake, nakusandutsani mfulu, kukuchotsani m'dziko laukapolo kwa mfumu ya ku Ejipito ija.

⁹ Nchifukwa chake mudziŵe kuti Chauta, Mulungu wanu, ndiye yekha Mulungu, ndipo ndi Mulungu wokhulupirika. Iye adzasungadi chipangano chake ndipo adzaonetsa chifundo chake chosasinthika kwa anthu a mibadwo zikwi zambirimbiri amene amakonda Iye namamvera malamulo ake.

¹⁰Koma onse amene amadana ndi Mulungu, adzaŵabwezera pakuŵaononga. Sadzamlekerera munthu wodana naye, koma adzamubwezera pakumlanga ndithu.

¹¹Motero, muzimvera mosamala malangizo ndi malamulo amene ndikukulamulani leroŵa.

¹² Ngati mumvera ndi kutsata mokhulupirika malamulo onse mwamvaŵa, Chauta, Mulungu wanu, adzapitirirabe kusunga chipangano chake chimene adachita ndi inu, ndipo adzapitiriranso kukukondani, monga momwe adalonjezera makolo anu.

¹³Adzakukondani ndi kukudalitsani, kotero kuti mudzachuluka ndi kubereka ana ambiri. Minda yanu adzaidalitsa, kotero kuti tirigu, vinyo ndi mafuta, mudzakhala nazo zonsezo. Adzakudalitsaninso pa zoŵeta pokupatsani ng'ombe zambiri ndi zoŵeta zina zomwe. Madalitso onseŵa, adzakupatsani muli m'dziko limene adalonjeza makolo anu.

¹⁴Pa dziko lapansi, palibe anthu amene adzakhale odala ngati inu. Sipadzaoneka mwamuna kapena mkazi wosabala pakati panu, ndiponso pakati pa zoŵeta zanu.

¹⁵Chauta adzakutchinjirizani pa matenda onse. Iye sadzalolanso kuti matenda oopsa a ku Ejipito amene mumaŵadziŵa aja, afikenso pa inu, koma Mulungu adzadzetsa matenda ameneŵa pa adani anu onse.

¹⁶Mitundu yonse imene Chauta, Mulungu wanu, aipereke kwa inu, muiwononge mopanda chifundo. Musapembedze milungu yao, popeza kuti kuteroko nkugwa mu msampha.

¹⁷Musanene kuti anthu ameneŵa achuluka kupambana inu, ndipo kuti simungathe kuŵapirikitsa.

¹⁸Musaŵaope. Kumbukirani zimene Chauta, Mulungu wanu, adam'chita Farao mfumu ya ku Ejipito, pamodzi ndi anthu ake omwe.

¹⁹Kumbukirani miliri yoopsa ija imene mudaiwona ndi maso anu. Mudaona zozizwitsa ndi zodabwitsa zomwe, ndiponso zinthu zazikulu zamphamvu. Zimenezi Chauta, Mulungu wanu, adazichita ndi dzanja lake lamphamvu, kuti akumasuleni. Anthu onse amene mumaŵaopaŵa, Chauta Mulungu wanu adzaŵaononga monga momwe adaonongera Aejipito.

²⁰Ndiponsotu adzatumiza mliri wa mavu pakati pao, umene udzaononga onse othaŵa ndi obisala.

²¹Musaŵaope anthu ameneŵa. Chauta Mulungu wanu ali nanu. Iyeyo ndiye Mulungu wamkulu woyeneradi kumuwopa.

²²Inu mukamayenda, Iye adzapirikitsa mitundu imeneyi pang'onopang'ono. Komatu simudzaŵatha onse nthaŵi imodzi. Mukadatero, nyama zakuthengo zikadachuluka ndi kumakuwopsani.

²³Chauta adzapereka adani anuwo kwa inu, ndipo adzaŵasokoneza kwambiri mpaka atatha onse.

²⁴Mafumu onse adzaŵapereka kwa inu. Mudzaŵapha onse, ndipo adzaiŵalika. Palibe amene adzakuletseni, mpaka mudzaŵaononga onsewo.

²⁵Mudzatenthe mafano ao ofanizira milungu yao. Musadzakhumbire siliva kapena golide amene iwo adapangira mafanowo. Musadzatengeko zimenezi kuti mungagwe mu msampha, popeza kuti zimenezo zimamnyansa Chauta, Mulungu wanu.

²⁶Musadzaloŵe nazo m'nyumba mwanu zimenezi, kuti tsoka limene lili pa iwowo lingadzakhale pa inu. Mudzadane ndi mafanowo ndi kuŵanyoza, chifukwa Chauta adaŵatemberera.