Read Buku Loyera - Chichewa Deut. 8 Bible Online

Deut. 8 - Buku Loyera - Chichewa bible

Deut. 8

¹Zonse zimene ndakulamulani lero, mumvere mokhulupirika, kuti mukhale ndi moyo, muchulukane, ndipo mukakhazikike m'dziko limene Chauta adalonjeza makolo anu.

²Kumbukirani m'mene Chauta, Mulungu wanu, adakutsogolerani m'chipululu, pa ulendo wa pa zaka zonse makumi anai zapitazi. Adakuvutani nakuyesani ndi zoŵaŵa, kuti adziŵe zimene zinali m'mitima mwanu, ndipo kuti aone ngati mudzamvera malamulo ake kapena ai.

³ Adakutsitsani pokukhalitsani ndi njala, komanso adakupatsani mana kuti mudye. Inu ndi makolo anu simudadyepo ndi kale lonse chakudya chimenechi. Adachita zimenezi kuti akuphunzitseni kuti munthu sakhala ndi moyo ndi chakudya chokha ai, koma ndi mau onse otuluka m'kamwa mwa Mulungu.

⁴Zovala zanu sizidathe, ndipo ngakhale mapazi anu omwe sadatupe konse m'chipululu pa zaka makumi anai zonsezi.

⁵Dziŵani kuti Chauta, Mulungu wanu, amakulangani monga momwe bambo amalangira ana ake.

⁶Tsono inu, muzichita monga momwe Chauta akulamulirani. Muziyenda m'njira zake ndipo muzimuwopa.

⁷Chauta, Mulungu wanu, adzakuloŵetsani m'dziko lokoma, dziko la mitsinje, la zitsime, la akasupe otumphukira m'zigwa ndi m'mapiri.

⁸Lilinso ndi tirigu, barele, mphesa, nkhuyu, makangaza, olivi ndi uchi.

⁹Kumeneko simudzakhala ndi njala, ndipo simudzasoŵa kanthu. Zitsulo zimapezeka m'miyala ya kumeneko, ndipo mungathe kukumbamo mkuŵa m'mapiri mwake.

¹⁰Mudzakhala ndi chakudya chokwanira ndipo mudzakhuta, tsono mudzathokoza Chauta, Mulungu wanu, chifukwa wakupatsani dziko lokoma.

¹¹ Samalani kuti musamaiŵala Chauta, Mulungu wanu. Musamalephera kumvera malamulo ndi malangizo ake amene ndakupatsani leroŵa.

¹²Mukadzadya ndi kukhuta, mukadzamanga nyumba zabwino zoti mudzakhalemo,

¹³mukadzakhala ndi ng'ombe, nkhosa, siliva ndi golide, ndipo chuma chanu chikadzanka chiwonjezekeraonjezekera,

¹⁴pamenepo musadzanyade ndi kuiŵala Chauta, Mulungu wanu, amene adakutulutsani ku Ejipito kumene mudaali akapolo.

¹⁵Iye adakutsogolerani, mpaka mudabzola chipululu chachikulu ndi choopsa chija, m'mene munali njoka za ululu woopsa ndi zinkhanira. Adakupatsani madzi otuluka m'thanthwe, m'dziko louma lopanda madzi lija.

¹⁶Adakupatsani mana oti mudye, chakudya chimene makolo anu anali asanadyepo, pofuna kukutsitsani ndi kukuyesani, kuti pambuyo pake akuchitireni zokoma.

¹⁷Tsono muchenjere, musamati, “Ndapeza chuma chonsechi ndi mphamvu zanga ndi nyonga zanga.”

¹⁸Kumbukirani kuti amene amakupatsani mphamvu zoti mulemerere, ndi Chauta, Mulungu wanu. Adachita zimenezi kale popeza kuti sadafune kuphwanya chipangano chake chimene adachita ndi makolo anu, chimodzimodzi m'mene akuchitira lero.

¹⁹Musamuiŵale Chauta, Mulungu wanu, ndi kutembenukira kwa milungu ina kuti muipembedze. Mukachimwa motero, ndithudi mudzaonongeka.

²⁰Mukapanda kumvera Chauta, Mulungu wanu, mudzaonongeka monga momwe Chauta akuwonongera mitundu ina pamaso panu.