Read Buku Loyera - Chichewa Yoh. 4 Bible Online

Yoh. 4 - Buku Loyera - Chichewa bible

Yoh. 4

¹Afarisi adamva kuti Yesu akukopa ndi kubatiza ophunzira ambiri koposa Yohane.

²(Komabe amene ankabatiza si Yesuyo, koma ophunzira ake).

³Pamene Yesu adadziŵa kuti Afarisi azimva zimenezi, adachokako ku Yudeya napitanso ku Galileya.

⁴Pa ulendowo ankayenera kudzera m'dziko la Samariya.

⁵ Tsono adafika ku mudzi wina wa ku Samariya, dzina lake Sikari, pafupi ndi kadziko kamene Yakobe adaapatsa Yosefe, mwana wake.

⁶Kumeneko kunali chitsime cha Yakobe. Yesu adakhala pansi pambali pa chitsimecho, chifukwa anali atatopa ndi ulendo. Nthaŵi inali ngati 12 koloko masana.

⁷Tsono padafika mai wina wachisamariya kudzatunga madzi. Yesu nkunena mopempha kuti, “Zikomo mundipatseko madzi akumwa.”

⁸Nthaŵiyo nkuti ophunzira ake aja atakagula chakudya mu mzinda.

⁹Mai wachisamariya uja adayankha nati, “Inu amene muli Myuda, bwanji mukupempha madzi kwa ine, mai wachisamariya?” (Pakutitu Ayuda sayenderana ndi Asamariya.)

¹⁰Yesu adati, “Mukadadziŵa mphatso ya Mulungu, mukadadziŵanso amene akupempha madzi akumwayu, bwenzi mutampempha ndi inuyo mai, Iye nakupatsani madzi opatsa moyo.”

¹¹Maiyo adati, “Bambo, mulibe nchotungira chomwe, ndipo chitsimechi nchozama. Nanga madzi opatsa moyowo muŵatenga kuti?

¹²Yakobe, kholo lathu ndiye adatipatsa chitsimechi, chimene mwiniwakeyo ankamwapo pamodzi ndi ana ake, ndiponso zoŵeta zake. Kodi Inu mungapambane iyeyo?”

¹³Yesu adati, “Munthu aliyense womwako madzi aŵa, adzamvanso ludzu.

¹⁴Koma aliyense wodzamwa madzi amene Ine ndidzampatse, sadzamvanso ludzu konse mpaka muyaya. Madzi amene ndidzampatsewo azidzatumphukira mwa iye ngati kasupe wa madzi opatsa moyo, nkumupatsa moyo wosatha.”

¹⁵Maiyo adati, “Bambo, patsaniko ineyo madzi amenewo kuti ndisamamvenso ludzu kapena kumadzatunganso madzi kuno.”

¹⁶Yesu adati, “Pitani mukaitane amuna anu, nkukabweranso kuno.”

¹⁷Maiyo adati, “Ndilibe mwamuna.” Yesu adati, “Mwanenetsa kuti mulibe mwamuna.

¹⁸Paja mwakwatiwapo kale ndi amuna asanu, ndipo mwamuna amene muli naye tsopano si wanunso. Mwanenazi nzoona.”

¹⁹Maiyo adati, “Bambo, ndadziŵa tsopano kuti ndinu mneneri.

²⁰Makolo athu ankapembedza Mulungu pa phiri ili,[4] koma inu Ayuda mumati ndi ku Yerusalemu kumene anthu ayenera kumakapembedzerako.”

²¹Yesu adamuuza kuti, “Mai, ndithu ikudza nthaŵi pamene mudzapembedza Atate, osati pa phiri ili kapenanso ku Yerusalemu ai.

²²Asamariyanu mumapembedza chimene simuchidziŵa. Ayudafe timapembedza chimene timachidziŵa, pakuti chipulumutso nchochokera mwa Ayuda.

²³Koma ikudza nthaŵi, ndipo yafika kale, pamene anthu opembedza kwenikweni adzapembedza Atate mwauzimu ndi moona. Atate amafuna anthu otere kuti ndiwo azimpembedza.

²⁴Mulungu ndi mzimu, ndipo ompembedza Iye ayenera kumpembedza mwauzimu ndi moona.”

²⁵Maiyo adati, “Ndikudziŵa kuti akudza Mpulumutsi wolonjezedwa uja. Iyeyo akadzafika, adzatifotokozera zonse.”

²⁶Yesu adamuuza kuti, “Ndine amene, Ineyo amene ndikulankhula nanu, mai.”

²⁷Nthaŵi yomweyo ophunzira ake a Yesu adafika, ndipo ankadabwa kuti Iye akucheza ndi mkazi. Komabe panalibe amene adamufunsa kuti, “Zakhala bwanji?” Kapena kuti, “Bwanji mukulankhula naye?”

²⁸Maiyo adasiya mtsuko wake napita ku mudzi nkukauza anthu kuti,

²⁹“Tiyeni, mukaone munthu amene wandiwuza zonse zimene ine ndidachita. Kodi ameneyu sangakhale Mpulumutsi wolonjezedwa uja kapena?”

³⁰Apo anthuwo adatuluka m'mudzimo kubwera kwa Yesu,

³¹Nthaŵi imeneyo ophunzira ake a Yesu ankamupempha kuti, “Aphunzitsi, idyani.”

³²Koma Iye adati, “Ine ndili nacho chakudya chimene inu simukuchidziŵa.”

³³Pamenepo ophunzirawo adayamba kufunsana kuti, “Kodi kapena wina wadzaŵapatsa kale chakudya?”

³⁴Koma Yesu adati, “Chakudya changa nkuchita zimene afuna Atate amene adandituma, kuti nditsirize ntchito imene Iwo adandipatsa.

³⁵Paja anthu amati, ‘Ikapita miyezi inai, ndiye kuti yafika nyengo yokolola.’ Koma ndithu, taonani m'mindamu, kodi simukuwona kuti mbeu zacha kale kudikira kholola?

³⁶Okolola ayamba kale kulandira malipiro, ndipo akututira mbeu ku moyo wosatha, kuti obzala ndi okolola akondwere pamodzi.

³⁷Paja amanenadi zoona aja amati, ‘Wobzala ndi wina, wokolola ndi winanso.’

³⁸Ine ndidakutumani kukakolola mbeu zimene simudagwirirepo ntchito. Anthu ena ndiwo adagwira ntchito, inu mwangolandirapo phindu la ntchito yaoyo.”

³⁹Asamariya ambiri a m'mudzi muja adakhulupirira Yesu chifukwa cha umboni wa mai uja, wakuti, “Iye wandiwuza zonse zimene ndidachita.”

⁴⁰Tsono pamene Asamariyawo adafika kwa Yesu, adampempha kuti akhale nao kwaoko. Ndipo adakhaladi komweko masiku aŵiri.

⁴¹Pamenepo anthu enanso ambiri adakhulupirira chifukwa cha mau a Yesu.

⁴²Mwakuti adauza mai uja kuti, “Takhulupirira tsopano, osati chifukwa cha mau ako, koma chifukwa tadzimvera tokha. Tadziŵa kuti ameneyu ndi Mpulumutsidi wa anthu a pa dziko lonse lapansi.”

⁴³Atapita masiku aŵiriwo, Yesu adachoka napita ku Galileya.

⁴⁴Mwiniwakeyo anali atanena kuti, “Mneneri, anthu akwao samchitira ulemu.”

⁴⁵Komabe pamene adafika ku Galileya, Agalileya adamlandira popeza kuti eniakewo nawonso adaapita ku Yerusalemu ku chikondwerero cha Paska, ndipo adaaona zonse zimene Yesu adaachita pachikondwereropo.

⁴⁶ Yesu adapitanso ku mudzi wa Kana ku Galileya, kumene Iye adaasandutsa madzi vinyo kuja. Panali Nduna ina ya mfumu imene mwana wake ankadwala ku Kapernao.

⁴⁷Pamene adamva kuti Yesu wafika ku Galileya kuchokera ku Yudeya, adadza kwa Iye nampempha kuti apite naye ku Kapernao, kuti akachiritse mwana wake amene anali pafupi kufa.

⁴⁸Yesu adamuuza kuti, “Mukapanda kuwona zizindikiro ndi zozizwitsa, simukhulupirira ai.”

⁴⁹Ndunayo idati, “Ndapota nanu Ambuye, tiyeni mwana wanga asanafe.”

⁵⁰Yesu adamuuza kuti, “Pitani! Mwana wanu wachira.” Munthuyo adakhulupiriradi mau a Yesuwo, ndipo adapita kwao.

⁵¹Pa njira adakumana ndi antchito ake, ndipo iwo adamuuza kuti, “Mwana wanu wachira.”

⁵²Adaŵafunsa za nthaŵi imene adachira mwanayo, iwo nkunena kuti, “Malungo ake adamleka dzulo nthaŵi ya 1 koloko masana.”

⁵³Bamboyo adazindikira kuti inali nthaŵi yomwe Yesu adaamuuza kuti, “Mwana wanu wachira.” Tsono iye adakhulupirira pamodzi ndi onse a m'banja mwake.

⁵⁴Ichi chinali chizindikiro chachiŵiri chimene Yesu adaonetsa atafika ku Galileya kuchokera ku Yudeya.