Read Buku Loyera - Chichewa Ntc. 14 Bible Online

Ntc. 14 - Buku Loyera - Chichewa bible

Ntc. 14

¹Zimene zidachitika ku Antiokeya, zidachitikanso ku Ikonio. Paulo ndi Barnabasi adaloŵa m'nyumba yamapemphero ya Ayuda. Adaphunzitsa mwamphamvu, kotero kuti anthu ambirimbiri, Ayuda ndiponso anthu a mitundu ina, adakhulupirira.

²Koma Ayuda amene sadakhulupirire adautsa mitima ya akunjawo kuti adane ndi akhristu.

³Paulo ndi Barnabasi adakhala komweko kanthaŵi ndithu, akulalika molimba mtima za kukoma mtima kwa Ambuye. Ndipo Ambuye ankachitira umboni mau ao pakuŵapatsa mphamvu zochitira zizindikiro ndi zozizwitsa.

⁴Koma anthu amumzindamo adagaŵikana, ena anali mbali ya Ayuda, ena anali mbali ya atumwi.

⁵Pamenepo anthu akunja ndi Ayuda, pamodzi ndi akulu ao, adatsimikiza zoŵazunza ndi kuŵaponya miyala.

⁶Atumwi aja atamva zimenezi, adathaŵira ku Listara ndi ku Deribe, mizinda ya ku Likaoniya, ndiponso ku dziko lozungulira mizindayo.

⁷Kumenekonso adayamba kulalika Uthenga Wabwino.

⁸Ku Listara kunali munthu wina wopunduka miyendo amene ankangokhala pansi. Adaabadwa wolumala ndipo chikhalire chake sadayende.

⁹Iyeyo ankamvetsera pamene Paulo ankalankhula. Paulo adampenyetsetsa, ndipo ataona kuti munthuyo ali ndi chikhulupiriro choti nkuchira,

¹⁰adanena mokweza mau kuti, “Wongola miyendo yako, imirira.” Pomwepo munthuyo adadzambatuka nkuyamba kuyenda.

¹¹Pamene anthu onse aja adaona zimene Paulo adachita, adafuula m'Chilikaoniya kuti, “Yatitsikira milungu yooneka ngati anthu.”

¹²Motero Barnabasi adamutcha Zeusi[34] ndipo Paulo adamutcha Heremesi,[35] chifukwa ndiye ankatsogola polankhula.

¹³Nyumba yopembedzeramo Zeusiyo inali kunja pafupi ndi mzindawo. Tsono wansembe wake adabwera ku zipata atatenga ng'ombe yozekedwa maluŵa m'khosi. Iyeyo pamodzi ndi anthu onse aja adaafuna kudzapereka nsembe.

¹⁴Koma pamene atumwi aja, Barnabasi ndi Paulo, adamva zimenezi, adang'amba zovala zao, nathamangira pakati pa anthuwo. Adalankhula mokweza mau kuti,

¹⁵“Anthuni, bwanji mukuchita zimenezi? Ifenso ndife anthu monga inu nomwe. Tikukulalikirani Uthenga Wabwino wakuti musiye zinthu zachabezi ndi kutsata Mulungu wamoyo amene adalenga thambo, dziko lapansi, nyanja ndi zonse zili m'menemo.

¹⁶Kale Iye adaalekerera anthu a mitundu yonse kuti azitsata njira zaozao.

¹⁷Komabe sankaleka kudzichitira umboni mwa zabwino zimene amachita. Kuchokera kumwamba amakupatsani mvula ndi nyengo za zipatso. Amakupatsani zakudya ndi zina zambiri zodzaza mitima yanu ndi chimwemwe.”

¹⁸Ngakhale ndi mau ameneŵa, adavutika kuŵaletsa anthu aja kuti asaŵaphere nsembe.

¹⁹Koma kudabwera Ayuda ena ochokera ku Antiokeya ndi ku Ikonio nakopa anthu aja. Tsono anthuwo adamponya Pauloyo miyala, kenaka nkumuguzira kunja kwa mzinda, chifukwa ankayesa kuti wafa.

²⁰Koma ophunzira ena atasonkhana nkumzungulira, iye adauka naloŵanso mumzindamo. M'maŵa mwake iye ndi Barnabasi adapita ku Deribe.

²¹Paulo ndi Barnabasi atalalika Uthenga Wabwino ku Deribe kuja, ndi kukopa okhulupirira ambiri, adabwerera ku Listara, ku Ikonio ndi ku Antiokeya m'dera la Pisidiya.

²²Adaŵalimbitsa mtima ophunzira aja, naŵauzitsa kuti asataye chikhulupiriro chao. Adaŵauza kuti, “Kuti tiloŵe mu Ufumu wa Mulungu tiyenera kupirira masautso ambiri.”

²³Pa mpingo uliwonse adakhazika akulu a mpingo. Ndipo pakupemphera ndi kusala zakudya adaŵapereka kwa Ambuye amene anali atamkhulupirira tsopano.

²⁴Pambuyo pake adabzola Pisidiya nakafika ku Pamfiliya.

²⁵Ndipo atalalika mau a Mulungu ku Perga, adapita ku Ataliya.

²⁶Kumeneko adaloŵa m'chombo kupita ku Antiokeya kuja, kumene adaaperekedwa kwa Mulungu kuti aŵadalitse pa ntchito imene tsopano anali ataitsiriza.

²⁷Pamene adafika kumeneko, adasonkhanitsa mpingo wonse, naufotokozera zonse zimene Mulungu adaachita mwa iwo, ndiponso m'mene Iye adaatsekulira anthu a mitundu ina njira kuti akhulupirire.

²⁸Tsono adakhala komweko ndi ophunzira aja nthaŵi yaitali.